5Mos. 24 - BUKO SIPUNENAN

Pagalaiat pagalangan samba putatalimou minca

¹ “Ke ai sara simanteu sitalimouake sara siokko, lepa geti taiobanangannia kalulut ai galai tubunia sibaraake katuailaat. Iageti simanteu nenda kaunangan surat pagalangan ka tubunia, lepa tuituiakenangannia ka lalepnia.

² Lepa geti ka sia sinanalep nene putalimounangan minca ka sara simanteu sabagei.

³ Tapoi ta amauju taiobanangannia simanteu nenda, iageti simanteu nenda kaunangan surat pagalangan ka tubunia samba tuituiakenangannnia. Ele simanteunia sikarua nene amatei le nia.

⁴ Oto simanteunia siboiki ta momoi iala nia minca ibailiuakenia sinanalepnia. Bui' ta iaddeake le sinanalep nene silolitnakenen. Tapoi ke italimouake le nia minca, galaiakenennia nene iate masipaloloi Tuhan Taikamanuamui. Bui' nugalaiake kam pukakatai kele nene ka laggai akenen Tuhan Taikamanuamui ka kam.”

Senengamata enungakenen

⁵ “Sara simanteu siputatalimou sibau ta momoi tukoiniakenia musaladdu samba iei pasaggak ele masigalai galajet bagei. Bui' ta tukau ka sia oggak sangarura burunia ipasikeli pulalalepnia samba bule imangka bagat sinanalepnia.

⁶ Ke nubale kam apa pa ka sabagei, bui' nuala kam silinia bukku tutuddu pakeietda manundu gandumra. Kapasiaalamui bukku nenda, anuraurau le kam pakeietda sibailiu purimanuaiatda.

⁷ Sirimanua sipasinanangkou sirimanua pasasambatda sabangsania, lepa galaiakenangan ka tubunia kele sara pagugulet ele isakiakenia, bui' ta tuukumnia simateiakenen. Kisedda te nutata'ake kam pukakatai ka talagamui.

⁸ Ke ai ka talagamui sibara besi' kusta, galaiake kam sipulelelek kele siparentaakenenda tai imam Lewi ka tubumui. Kau nutunake kam panganturat sikauku katubutda.

⁹ Repdem kam sigalai Tuhan Taikamanuamui kai Miryam ka puenungananmui anubela kam ka Misir.

¹⁰ Ke nubale kam apa pa ka pasasambamui, bui' nutuguru' kam ka lalepnia nuala kam leppeinia sibailiu silit sibalenia.

¹¹ Ngena kam ka gerat lalepnia, aileu ioi iakenia ka tubum.

¹² Tapoi ke mageba geti nia, bui' ipugogoi ka tubum leppeinia nenda ka sanganantat soibo,

¹³ toiliake le ka tubunia senen soibo, bule ibara pakeietnia merep. Bailiu kuanangan sura samba maroipo ekeu ka matat Tuhan Taikamanuamui.

¹⁴ Bui nupaoreiji kam upaijetmui simageba samba sita' anai apa pa, ele sabangsamui, samba leu tai toi sikuddu ka sara laggaimui.

¹⁵ Senen ka soibokat bui ta nulului kam upatda pugagalaira ka gogoi nenda, aipoi aile ikakaroni bulagat nenda pakeietnia. Ke ta nulului kam upatda, pusoganangan ka tubut Tuhan kalulut sigalaimui nene, oto bailiunangannia jomui.

¹⁶ Bui' nugalaiake kam ukum simateiakenen ka saepput sara toga sigalaiake sikatai, samba bui' leu nugalaiake kam ukum simateiakenen ka sara toga kalulut pukakatai sigalaiakenen ukkuinia. Sarat sirimanua sigalai sikatai nenda le momoi tuorakngake ukum simateiakenen kalulut katai sigalaiakenennia.

¹⁷ Bui' nuraurau kam bakkatda tai toi samba siputata' ina, samba bui' nuala kam bibiletda tai lumang sibailiu kele sara sili.

¹⁸ Repdem kam arapagugulenake kam ka Misir samba aibelaake kam Tuhan Taikamanuamui. Iate lulunia kuaake parenta nene ka tubumui.

¹⁹ Ke nururuake kam buat siuremanmui, bui' nutoili kam masiala gandum sigalakmui. Eddangan raalania tai toi, siputata'ina samba tai lumang, bule ipanukani kam si Tuhan Taikamanuamui ka sangamberi galaiakenenmui.

²⁰ Lepa numonei kam buat zaitun samba buat anggurmui, bui' an nutoili kam masiruruake buania sipulelegei.

²¹ Eddangan raalania tai toi, siputata'ina, samba tai lumang.

²² Repdem kam arapaguguletnake kam ka Misir. Iate lulunia kuake parenta nene ka tubumui.