5Mos. 23 - BUKO SIPUNENAN

Sirimanua sitaiaaddeakenen paamian Tuhan

¹ “Sia sinamba keikeijetnia, ta momoi ibailiu sia paamian Tuhan.

² Sirimanua sipututu'tu mata ta ka putalimogat samba sangamberi reddenannia pat aili sikapulu, ta momoi ibaili sia paamian Tuhan.

³ Tai Amon samba tai Moab samba leu reddenandra pat aili sikapulu ta momoi ibailiu sia paamian Tuhan,

⁴ kalulut ta raoba masiake kan samba oinan ka teteret kapuenungananmui anubela kam ka Misir. Sarapei arabulagani le si Bileam, togat Beor sibara ka laggai Petor ka Mesopotamia, bule ipateleiji kam.

⁵ Tapoi Tuhan Taikamanuamui ta ioba iarepi si Bileam. Bailoknia pateleijat nenda bailiu panukanan, kalulut nuntut bagaNia ka tubumui.

⁶ Ka burut puririmanuamui, bui' nuropmake kam bangsa nenda ele nupaeru kam puririmanundra teret buru-buru.

⁷ Bui' nuputata' kam tai Edom, aipoi sasarainamui le sia. Bui' leu nuputata' kam tai Misir, kalulut siburu amukuddu kam ka laggaira.

⁸ Barania ka reddenan sikatelu samba ka reddenanda sibabara, momoi ibaliu sapunuteteur paamian Tuhan.”

Masijago kalinakat kemanda tai saladdu

⁹ Ka teteret ai kam pasasaggak, jago kam tubumui ka sangamberi sikau kam ka sikatai.

¹⁰ Ke ai ka talagamui sara sirimanua kasitsitnakenen kalulut abela suat tubunia ka teteret ai nia memerep, buita ikaddiuake pukemahan samba kuddunia ka gerat.

¹¹ Kepei iaili kasoibokat samba ka teteret ibele sulu buita muraunia, momoi itoili minca ka sapou.

¹² Bui' ta nutarekngake kam kudduat pasiribbaijat ka gerat pusapougat.

¹³ Ke mei kam sedda, abbitmuian pakeietmui sedda sambat sangate'te loina pasigaigai polak kudduat pasiribbaijatmui samba labbumuiannia.

¹⁴ Tuhan Taikamanuamui masipaalei kam ka bagat sapoumui isakkeri kam samnba iake ka kam kamanangan nukalaake kam saggakmui. Oto jago kam bule imariuriu imalina sapoumui. Bui' ibara sitaimateu iitco ka talagamui si Tuhan, bailiu kaddiuakenangan kam si Tuhan.”

Senengamata enungakenen

¹⁵ “Ke ai sara pagugulet situtuitui ka tuannia, lepa oi nia ka tubumui itiddou paroman, bui' nukoiniake kamnia itoili.

¹⁶ Momoi le' ikuddu ka sara laggaimui siripot siobania, samba bui nugalaiake kam paoreiat ka tubunia.

¹⁷ Bui' ibara katalagamui tai Israel, taimanteu ele tainanalep ibailiu siolopmake tubunia ka uma pasibuluat sabulungan.

¹⁸ Kisedda leu et bulagat sisilonia, bui iabbitnia ka Uman Tuhan Taikamanuamui ilului sipalelekngakenennia, aipoi malaga bagania si Tuhan Taikamanuamui ka tubutdra sipuolop tubu samba bulagat sibara ka puoloman tubu.

¹⁹ Tapoi ke nubaleake kam bulagat katubutda ele komen ele bibilet bagei kasabangsamui, kau kam baleetdra nenda sita' bunga.

²⁰ Tapoi ke nubaleake kam bulagat ka tubutdra tai toi, momoi nutiddou kam ogo'nia. Reddet kam parenta nene, bule ipanukani kam si Tuhan Taikamanuamui ka sangamberi galaiakenenmui ka laggai kudduijietmui.

²¹ Ke ai sipalelekngakenenmui kai Tuhan Taikamanuamui, bui' maore bagamui nugalaiake kamnia sipalelekmui nenda, aipoi mariuriu le itiddounia Tuhan Taikamanuamui, samba ke ta nugalaiake kam bailiunangannia jomui.

²² Ta' babara jomui ke ta nugalai kam palelengan ka tubut Tuhan.

²³ Tapoi ke sibara ka teu bagamui nugalai kam palelengan ka tubut Tuhan Taikamanuamui, bui' ta nugalaiake le kam.

²⁴ Ke ai kam mueenung nusabau kam monen anggurda sabagei, momoi nukom kam buat anggur kipa igit siobamui, tapoi ta momoi nururuake kamnia ka bagat karakjang

²⁵ Ke ai kam mueenung nusabau kam monen gandumra sabagei, momoi nukom kam gandum siappekmui, tapoi bui' nugetaiake kam sasabit.”