5Mos. 22 - BUKO SIPUNENAN

Pagalaiat parom simakere

¹ Ke ai jaui ele biribiritdra sabangsamui simapepepe, samba sesemuian tarimeu nenda, bui' nupakele kamnia, tapoi taroake le kam tarimeu nenda ka tubut sibakkatnia.

² Ke mareunan lalep sibakkat tarimeu nenda, ele ta nuagai kam kasei sibakkat jaui nenda, bui' ta nuambit terimeu ka lalepmui, Ke moi sibakkat jaui nenda masigaba, kaumuian nia ka tubunia.

³ Galaiake leu kam kele nene ke nusese kam sangamuneng kalidei, sara bibilet, ele apa pa bagei bakkatdra sabangsamui.

⁴ Ke ai sangamuneng kalidei ele jauira sabangsamui sipurarappo ka enungan, bui' nupakele kam nia, tapoi ropmake le kam nusuruake kam tarimeu nenda.

Senengamata enung galaiakenen

⁵ Tainanalep ta momoi rapuleppei kele taimanteu samba taimanteu ta momoi rapuleppei kele tainanalep, kalulut sigalaiake kele nenda bulat malaga bagania si Tuhan Taikamanuamui.

⁶ Ke nusese kam rumun uma ka buttet loina ele ka polak samba ai mukukuddu inania ka uddut attelunia ele ainia mukukuddu sambadda tatogania, bui' nuala kam inan uma nenda.

⁷ Momoi nuala kam togat uma nenda, tapoi obaake le kam tuburut inania, bule imananta purimanuaiatmui samba imaeru puririmanuamui.

⁸ Ke nugalai kam lalep, bui' ta nugalai kam kekre ka sangaliot ebbei tobatnia. Oto ta ioorak kam sele ke ai simamatei sibebele ka uddut tobat lalepmui.

⁹ Bui' nuurep kam siureman bagei ka monen anggurmui, sarat anggur le lepa. Tapoi ke nuurep le kam bagei, ta momoi nuala kamnia buat siureman nenda, ele anggur, ele siureman bagei.

¹⁰ Bui' nusaraake kam sangamuneng jaui samba kalidei ka sara bajak.

¹¹ Bui' nupakei kam bibilet sigalai sibara ka wol ele ka linen sibara ka sara bibilet komang.

¹² Kau nugalai kam simajai sitikai ka epat taiming leppeimui.”

Enungakenen pagalaiat putalimougat

¹³ Ke ai sara simanteu siputatalimou ka sara siokko, lepa geti taiobanangannia,

¹⁴ iageti baraakenangan pasuksukngan pabokoat, ikua sinanalepnia nenda ta'an siooko ka teteret araputalimou.

¹⁵ Ka bagat nene saepput sinanalep buita raala leppei putalimoura sibara sisappokat logaunia, masipakoinong pusisiokkonia peile togatdra. Komang nenda bui' ta rapatoila ka siabeu tiboi tubu ka laggai ka matabaliu gugurukat laggai.

¹⁶ Ukkui sinanalep nenda bui'ta ikua katubutda, “Akukauan togakku nene ka sirimanua nene ibailiu sinanalepnia, tapoi kineneiget ta'an aiobania.

¹⁷ Baraakenangan pasuksukngan pabokoat, ikua ta an siokko nia ka teteret araputalimou. Tapoi aikoi toggaiatnia pusisiokkonia togakku ka teteret araputalimou. Lelekngake pei kam sisappokat logau ka komang nene!”

¹⁸ Oto sia siabeu tiboi tubu ka laggai, bui' ta rasogai simanteu nenda iageti pabo'bokirangannia.

¹⁹ Bui' ta rautakngakenia sangotu bulagat perak samba kaunangan bulagat nenda ka talikunia, kalulut pakakataina onin sara sinanalep tai Israel. Samba leu et minca bui' ta ibaliunia sinanalepnia, samba ta momoi isaraakenia ka burut purimanuaiatnia.

²⁰ Tapoi ke' bai sineseat le pasuksukngan nenda samba ta anai toggaiatnia pusisiokkonia sinanalepnia ka teteret araputalimou,

²¹ oto sinanalep nenda bui' ta tuabbit nia ka matatbaliu lalepdra saeppunia. Ka kudduat nenda leu pabajungirangannia bukku taimanteu sikuddu ka laggai nenda pat matei. Aipoi sinanalep nenda aigalaiake sara puailaat ka bangsatta kalulut paeeletnia ainangan peile ta mutatalimounia ka teteret ai peile nia mukukuddu ka lalep ukkuinia. Oto kapasiuukummuinia nene, iate enungan nutata'ake pukakatai.

²² Ke nuali bai kam sara simanteu ai nia ipapeperepmake sinanalepdra sabagei, oto ruadda bui' ta tuukum sia simateiakenen. Kisedda te enungan nutata'ake kam pukakatai.

²³ Ke ai sara simanteu ka bagat laggai nuaili kam nia ai nia ipapeperepmake sara siokko sibara tunangan,

²⁴ ka bagat nene bui' ta nuambit kam sia ka teitei irip laggai, iageti pabaijungimuian sia bukku teret matei. Siokko nenda bui' ta tumateiake kalulut ta amugereinia itidddou paroman, siripokatnia buita' mugereinia itiddou paroman aipoi aipuaili nenda ka talagat laggai, momoi tuarep gereinia. Samba simanteu nenda bui' ta tumateiakenia kalulut aipaperepmake siokko sibara tunangan. Oto kapasiuukummui ruadda nene, kisedda enungan nutata'ake kam pukakatai.

²⁵ Tapoi sara le galainia ke sara simanteu ke ipajo sara siokko ka mone sibara tunangan. Ka bagat nene sarat simanteu le tuukumake simateiakenen.

²⁶ Tapoi ta momoi nugalaiake kam apapa ka tubut siokko nenda kalulut ta anai aigalaiake apapa simateu tuukumakenia simateiakenen. Sibabara nene makere le sara sieei masisaggangi sabagei, iageti mateiakenangan nia.

²⁷ Aipoi paelenan nenda aipuaili ka mone le, samba kenanen siokko nenda amugereinia itiddou paroman, tapoi ta anai sirimanua siropmakenia.

²⁸ Ke ai sara simanteu nuaili kam nia aipajojo sara siokko sita' tunanangan.

²⁹ Ka bagat nene bui' ta ilului ka ukkui siokko nenda mas putalimou lima pulu perak iginia. Siokko nenda bui' ta ibailiu sinanalepnia, kalulut simanteu nenda le aibesiake ipajonia samba ka burut purimanuaiatnia ta momoi isaraakenia.

³⁰ Ta' momoi berisara sirimanua masipaloloi ukkuinia kalulut ipaperepmake sara ka talagat sinanalep ukkuinia.”