5Mos. 21 - BUKO SIPUNENAN

Pakaroat pagalaiat pamamatei sitaioi tutakkiake

¹ “Ke rasese sara sirimanua simamatei ka mone ka laggai akenen Tuhan Taikamanuamui samba ta tuagai kasei amasimateiake,

² oto bui' ta mei sia sautemui samba tai sipasiukum masikire reunan aitusese sirimanua simamatei nenda ka senen laggai simaleggre sedda.

³ Lepa sia siabeu tiboi tubu sibara ka laggai simakope legre bui'ta rapili sangamuneng jaui sibau tubu sitaipapakeiet peile mugalai.

⁴ Bui'ta rambit jaui nenda ka sara kudduat ka be'bet oinan sitai magagarak samba sita' pei papakkuret polaknia ele sita' pei atupauremi. Ka kudduat nenda te rababakngake lolokkat tarimeu nenda.

⁵ Sia tai Imam Lewi leu et bui'ta mei sia sedda, aipoi sia le masiala katakkikat senen pakaroat pagalaiat pukakatai. Aipilingan sia si Tuhan Taikamanuamui bule rapaguguletnake tubutdra ka tubuNia samba masikua panukanan ka bagat oniNia.

⁶ Lepa sangamberidra siabeu tiboi tubu sibara ka laggai simakope legre bui' ta rabui kabeira ka uddut jaui nenda

⁷ samba masikua, “Ta' ka kabeimai aimapili logau nene samba ta akuitco kai! Lepa tai imam Lewi buita rakua,

⁸ “Ale Tuhan, appeake jodra tai Israel sibelaakenenNu ka Misir. Appeake sia samba bui iorak sia kalulut kamamatei sirimanua sita' anai puseleat.”

⁹ Anugalaiakean poi kam kele sikuat Tuhan, bailiu ta'an ioorak kam kalulut kamateiat sirimanua nenda.”

Enungakenen pagalaiat tainanalep sitangsiakenen ka bagat pasaggangan

¹⁰ “Ke pasaggak kam samba akenangan kamanangan ka kam Tuhan Taikamanuamui, lepa bailiuakemuian saggakmui tangsiakenen,

¹¹ ele ai ka talagatdra sara sinanalep simalainge tubu siobat bagamui samba noba nubailiuakenia sinanalepmui.

¹² Ambit le sinanalep nenda ka lalepmui. Sinanalep nenda bui'ta isapu alainia, iabba suletnia,

¹³ samba silinangan leppeinia. Buita mukuddunia ka lalepmui samba mureureu baga ka bagat sangalaggo burunia kalulut kamamatei ukkui samba inania. Lepa nenda iapeite momoi nutalimouakenia.

¹⁴ Ke ka sara tetere ta'an anuobania, momoi nukoiniakenia ituitui iei ka siobat bagania. Ta' momoi nugalaiake ka tubunia kele sara pagugulet ele nusakiakenia, kalulut ekeu le amasibesiake nupalalepmakenia.”

Enungakenen pagalaiat ikepmakendra toga sikebbukat

¹⁵ “Ke ai sara simanteu sibara rua sinanalepnia, samba ruadra tu'tuakerangan matat togatdra simanteu, tapoi toga siputu'tutu mata siboiki ta ka sinanalepnia simanuntu bagania.

¹⁶ Ke sirimanua nenda ioba iteuake kipa enungan iparubei pukayoatnia ka tatogania, ta momoi ikau rubeiat ka togat sinanalepnia simanuntu bagania ikau ka tubut toga nenda rubeiat siripot ikepmakenennia sara toga sikebbukat.

¹⁷ Buita ikau rua ngarubeiat sibara pukayoatnia ka tubut toga simanteu sikebbukat, kenanen toga nenda ta sibara ka sinanalepnia simanuntu bagania. Buita iseseake ukkuinia ikepmakenen toga sikebbukat, samba buita tukau ikepmakenenia siripot enungan siteuakenen.”

Enungakenen pagalaiat toga sikatai

¹⁸ “Ke ai sara toga simanteu simakela patuat, simalawan samba ta mareddetnia ka ngangan ukkuinia kenanen aiukuman nia.

¹⁹ Oto bui' ta rambitnia saeppunia ka siabeu tiboi tubu ka laggaira samba ratiddou bule tupakaroakenia

²⁰ Bui' ta rakua ka matadra siabeu tiboi tubu ka laggai nenda, “Togamai nene bulat makela patuatnia, maukkatnia samba ta mareddetnia ka tubumai. Maemunia ka bulagat samba ioba mulo' simapuinengen.”

²¹ Lepa sangamberi taimanteu ka laggai nenda bui' ta rabajuknia bukku teret matei. Kele kisedda te nutata'ake kam pukakatai nenda. Iageti areprangannia sangamberidra tai Israel sipuaaili nenda samba bailiu bara loto'ra.”

Pasirateiat sirimanua sininggotnakenen

²² “Ke atuorakngakean ukum simateiakenen ka sara sirimanua kalulut pukakatai, samba tubunia simamatei nenda tutoakngake ka arigi,

²³ Ta' momoi tuobaake ikuddu sedda tubut simamatei ka sanganantat soibo nenda, tapoi bui' ta turateiake ka gogoi nenda leu et. Tubut simamatei siputotoak ka arigi sibaraake peteleijat ka bagat laggai. Oto, rateiake kam tubut simamatei nenda bule ta nupalolit kam laggai siaket Tuhan Taikamanua ka kam.