5Mos. 20 - BUKO SIPUNENAN

Enungakenen pagalaiat pasaggak

¹ “Ke mei kam pasaggak masisaggangi saggakmui, bui' ibara lotomui nuitco kam kereta pasaggak samba kuro'ra simigi sambat saladdutdra sisaliu igimui. Kalulut Tuhan Taikamanuamui sibelaake kam ka Misir, Nia leu te iropmake kam.

² Kepei nutaddaake kam pasaggak, sara imam bui'ta mei ka matamui masikua kise,

³ “Kam sasaraina, arepmake kam! Gogoi nene nuei kam pasaggak. Bui' numaloto ele makarat baga samba ipaingo kam.

⁴ Aile iropmake kam Tuhan Taikamanuamui, samba iaake kamanangan ka kam.”

⁵ Iageti ute'ra saladdu samba sia saladdu bui'ta rasegeake kuanenda ka tubumui kise, “Taleu ai ka talagamui sirioake lalepnia sibau, tapoi ta'pei aibaraake punennia? Ke ai sia, momoi itoili ka sia. Aipoi ke mateinia ka bagat pasaggangan, kudduijirangan lalepnia sabagei.

⁶ Taleu ai ka talagamui sipasiurep monen anggur sibau samba ta pei aimonei buat anggurnia? Ke ai sia, momoi itoili ka sia. Aipoi ke mateinia ka bagat pasaggangan, ta'an inanam buat anggurnia, sirimanua sabageian le inanam buat anggurnia.

⁷ Taleu ai ka talagamui sipututunangan samba aiisiake mutalimou? Ke ai sia, momoi itoili ka sia. Aipoi ke mateinia ka bagat pasaggangan, sirimanua sabageian le itatalimouake tunangannia.”

⁸ Sautera saladdu samba tai saladdu leu buita' rakua kise ka tubumui, “Taleu ai ka talagamui simasedde baga samba simaloto? Ke ai sia, momoi itoili ka sia, bule bui' ipakatai ron patuatdra sabagei.”

⁹ Ke alepaan rapanibo sautera saladdu katubutda saladdu, buita nusausau kam sara saute ka bagat senen mungkuatdra.

¹⁰ Ke mei kam masisaggangi sara laggai, kau kam boiki oggak ka sia bule nusegeake pananakat paaban.

¹¹ Ke rabukaake matatbaliu laggaira samba ta rasasaggangi kam, sangamberidra bui' ta ibailiu paguguletmui samba ragalaiake galajet simasane'.

¹² Tapoi ke ta roba sipulalaggai sedda ta nupasaggak kam samba bulat raoba le pasaggak, buita nugoilik kam laggai nenda.

¹³ Iageti, ke iobaake si Tuhan Taikamanuamui iake laggai nenda ka tubumui, buita numateiake kam sia sangamberi taimanteu sikuddu ka laggai nenda.

¹⁴ Tapoi momoi nuala kam tainanalep, tatoga, tarimeu samba apa pa bagei sibabara ka bagat laggai nenda. Sangamberi pukayoatdra tai saggakmui momoi nupakei kam nia. Aipoi aiakean ka tubumui sangamberinia si Tuhan Taikamanuamui.

¹⁵ Kele kisedda te galaiakenenmui ka senen laggai simareunan ka laggai kudduatmui.

¹⁶ Tapoi ke laggai nenda ai nia ka kupkumen polak akenen Tuhan Taikamanuamui ka kam, bui' ta numateiake kam sangamberi supulalaggai sedda.

¹⁷ Kele siparentaakenen Tuhan Taikamanuamui, buita numateiake kam tai Het, Amori, Kanaan, Feris, Hewi samba tai Jebus.

¹⁸ Mateiake kam sia, bule bui' ibara jomui kai Tuhan Taikamanuamui ragelaiake kam masigalaiake galajet kasitsitnakenen ka taikamanuadra.

¹⁹ Ke nusaggangi kam sara laggai samba goilikmuiannia simaburu, bui' nupataddeiji kam loinat buat kaju sibabara sedda. Kom le kam buania, tapoi bui' nupakatai kam loinania, aipoi loina nenda ta saggakmui.

²⁰ Paloina-loina bagei geti momoi nutadde kam nia nubailiuake kam nia kekre pasigoilikmui teret ioi nukalaake kam laggai nenda.”