5Mos. 2 - BUKO SIPUNENAN

¹ Kalepakatnia toili sita ka simatangeu ka enungan sieei ka Gunggung Akaba, kele siparentaakenen Tuhan. Maburu atasilaiji laggai simaleleu ka Edom.

² Iageti kuanangan si Tuhan ka tubuku

³ bulat amakopean buru atapueppek ka laggai nene. Oto bui' ta mei sita ka saigit bare.

⁴ Iageti koiniakenangan aku si Tuhan masingantru kam pagalaiat nene, ‘Ta'an te mauju nuguruki kam laggai Edom, iate laggaira sasarainam, sapunuteteu Esau. Malotorangan te geti ka tubumui,

⁵ tapoi ta momoi nusaggangi kam sia, aipoi beri goiso polakra nene kuake ka kam, kalulut polak Edom akukauan ka sapunuteteu Esau.

⁶ Momoi nusaki kam komen samba lo katubutda.’

⁷ Repdep kam kipa aipanukani kam Tuhan Taikamanuamui ka sangamberi galajetmui. Ipasikeli le kam ka burut pueppanganmui ka simatangeu simalio nene. Jagonangan kam ka bagat epat pulu ngarura burunia samba akenangan leu sangamberi simagulai ka kam.

⁸ Iageti riuriuaketangan kam muenung, kaddiuaketangan enungan sieei ka laggai Elat sambat Ezion-Geber taailiake kam Koat Simamatei, lepa biluaketangannia taei kam ka saigit sikalaut bare masiailiake Su'sut ngai' Moab.

⁹ Kuanangan si Tuhan ka tubuku, ‘Tai Moab, sapunuteteu Lot, ta momoi nugeugeu kam sia. Samba leu bui' nusaggangi kam sia. Aipoi laggai Ar, Akukauan katubutda samba beri goiso ta kuake polakra ka tubumui.’ ”

¹⁰ Siburu laggai Ar tai Emin ikukudduijinia. Tubutda mabeu kele raksasa, makere kele tai Enak.

¹¹ Kele tai Enak, sia leu et tuoniake tai Refaim, tapoi ka sia geti tai Moab raoniake sia tai Emim.

¹² Siburu tai Hori le mukukuddu ka Edom, tapoi lepa keklerangan sia sambat subuakerangan leu sia sapunuteteu Esau, iageti kudduijirangan polakdra. Kisedda te ka sia bangsa Israel ka gogoi sibabara rakekle sangamberi saggakdra ka polak akenen Tuhan katubutda.

¹³ “Lepa talipokittangan Oinan Zeret kele siparentaakenen Tuhan ka tubutta.

¹⁴ Aipuaili nenda telu pulubalu ngarura lepat atakaddiuake Kades-Barnea. Sangamberi saladdu sibara kareddenan nenda amateian sia kele sikuat Tuhan.

¹⁵ Riuriu le isaggangi sia si Tuhan, kalepakatnia subu sia sangamberidra.

¹⁶ Lepa aramatei sangamberidra,

¹⁷ Kuanangan si Tuhan ka tubutta,

¹⁸ ‘Gogoi nene enungimuian laggai Moab, iate laggai Ar.

¹⁹ Iapei sege kam ka be'bet polakdra tai Amon, sapunuteteu Lot. Bui' nugeugeu kam sia ele nusaggangi kam sia, aipoi beri goiso polak sikauKu katubutda ta kuaake katubumui.’ ”

²⁰ Laggai nenda abeu katuareman oninia kele sara laggai Repaim, onin sara bangsa sikukuddu sedda. Tai Amon raoniake sia tai Zamzumin.

²¹ Kele tai Enak, abeu leu putubuatdra. Bulat maron tubudra, samba maigi sia. Tapoi aisubuake le sia si Tuhan, oto oppurangan polak nenda tai Amon, lepa kuddu sia sedda.

²² Kele kisedda leu aigalaiake si Tuhan katubutda ka sia tai Edom, sapunuteteu Esau, sikudduiji laggai leleu Edom. Subuakenangan si Tuhan tai Hori, bailiu oppurangannia tai Edom polakdra nenda, iageti riuriu arakudduijinia teret kineneiget.

²³ Polak ka sanganantat be'bet Koat Ka Tenga, tai Kreta aikudduijinia. Subuakerangan leu et tai Awi, bulat siturerere sedda, lepa kudduijirangannia teret aili ka sanganantat laggai Gaza isit ka kaiaman.

²⁴ “Lepa ataenungi laggai Moab, Kunangan si Tuhan katubutta, ‘Kenan kam masitalipoki bagat oinan Arnon. Ai leu kuake sia kakabeimui tai Sihon, rimatadra tai Amori, siuteake Hesibon, sambat laggainia. Saggangi kam sia, lepa kudduijimuian laggaira.

²⁵ Barania kineneiget kubailiake kam kalotoakenendra senen bangsa. Senen sirimanua mugeret tubu kalulut loto ke' raarep pagalaiat kam.’ ”

Tai Israel masikalaake Rimata Sihon

²⁶ “Lepa koniakekungan sia piga pa baradra ka simatangeu Kademot ka tubut Rimata Sihon sibara ka Hesybon raei rasegeake panindogat paabanan nene:

²⁷ “Obaake kutusabau kai ka laggainu Tuanku, riuriu le kupuenung kai samba ta tusosoip kai ka enungan sabeu.

²⁸ Luluimaian komen sikommai samba oinan silomai. Sarat masisabau laggai nene le kugagalai kai,

²⁹ teret talipokimai bagat oinan Jordan bule kutuguru' kai ka laggai akenen Tuhan Taikamanua ka tubumai. Sapunuteteu Esau sikuddu ka Edom samba tai Moab sikukuddu ka Ar leu araobaakean kusabau kai laggaira.”

³⁰ Tapoi Rimata Sihon ta aiobaake tatusabau laggaira. Aipoi aikelaake le patuatnia si Tuhan Taikamanuamui, bule ioi takalaake kamnia. Oto laggainia nenda, aipeile takukudduiji teret kineneiget.

³¹ Lepa kuanangan si Tuhan ka tubuku, “Rimata Sihon sambat laggainia Kuake ka tubumui; ala kam samba kudduijimuian laggai nenda.”

³² Iagei oi si Sihon samba sangamberi saladdunia masisaggangi sita ka be'bet laggai Jahas.

³³ Tapoi Tuhan Taikamanuanta iakenia ka tubutta, lepa kalaaketangannia sambat tatogania samba leu sangamberi saladdunia.

³⁴ Ka gogoi nenda leu et opputtangan samba pakataitangan senen laggai samba mateiaketangan sia sangamberidra sikukuddu sedda, taimanteu samba tainanalep, samba leu et tatoga. Bulat berisara sia sipuririmanua.

³⁵ Alatangan tarimeura samba parauraugittangan pukayoat ka bagat palaggai-laggai.

³⁶ Kalulut paroman Tuhan Taikamanuanta, oinangan taoppu kam sangamberi laggai, barania ka Aroër, ka ngungun belet leleu Arnon, samba laggai ka tengan belet leleu nenda, pat aili ka laggai Gilead, ta anai berisara irip laggai simakope ron ka sita.

³⁷ Tapoi ta atalegreake tubutta ka laggaira tai Amon ele ka be'bet bagat oinan Jabok ele sangamberi laggai simaleleu ele ka senen kudduat bagei sikerat Tuhan Taikamanuanta.”