5Mos. 19 - BUKO SIPUNENAN

Laggai pulippunan

¹ “Lepa aisubuakean bangsa-bangsa nenda si Tuhan Taikamanuamui samba akenangan kupkumen laggaira ka kam, samba ke anualaan kam kupkumen samba lalepdra samba amukuddungan kam sedda,

² rubeimuian laggai nenda telu ngarubeiat,

³ senenia bui'ta bara sara laggai pulippunan simalabbei tuailiake bule senen sipapamatei momoi raei sedda.

⁴ Ke ai sara sirimanua ta sipalit bagania imateiake sirimanua sabagei ta saggaknia, momoi iputuitui iei ka sara laggai nenda samba momoi ikuddu sedda.

⁵ Pasikatnia ai rua sirimanua sieei ka leleu manande loina. Aitatadde loina ka sia sara, goloknangan sot kampaknia, iageti oraknangan aleinia pat matei. Oto sipamamatei ta sipali baga nenda ta maselenia samba momoi iei ka sara laggai ka talagat sitelu laggai sikokoiakenen pulippunan nenda bule ta ramateiakenia ka sia.

⁶ Aipoi ke sara le laggai pulippunan, ele mareunannia ka kudduat sipamamatei nenda, bailiu raaili peilenia sasarainan simateiakenennia sipasiala lumun kamamatei sasarainandra, oto kalulut oloi golu'ra mateiakerangan sirimanua sita' anai sele.

⁷ Iate lulunia kuparentaake kam bule nutarekngake kam telu laggai kokoiakenen pulippunan.

⁸ Ke ailioakean kupkumen laggaimui si Tuhan Taikamanuamui kele sipalelekNia ka taikebbukatmui, samba aiakean sangamberi kupkumen laggai ka tubumui,

⁹ bui' ta nupili kam minca telu laggai pulippunan. Iaake kupkumen laggai nenda ka tubumui ke nugalaiake kam sangamberi siparentaakenenku ka tubumui gogoi nene, samba ke makate bagamui ka tubut Tuhan Taikamanuamui samba muparaboat kam siripot nganturatNia.

¹⁰ Galaiake kam nene bule bui' numajo kam kalulut nuobaake kam ramateiake sirimanua sita' sele ka laggai akenen Tuhan Taikamanuamui ka kam.”

¹¹ “Tapoi sara le galainia sipulilipput itaiko saggaknia samba mateiakenangania kalulut lagat bagania, lepa tuituinia ka sara laggai pulippunan bule raropmakenia.

¹² Ka bagat nene sia siuteake laggai buita rasogai sirimanua nenda, lepa kaurangannia katubutda sipusasaraina ka tubut simamatei nenda bule raala lumun ioi ramateiakenia.

¹³ Bui' imanuntu bagamui ka tubunia. Kau le nubelaake kam ka Israel ka jo pamamatei nenda, bule imaeru puririmanuamui.”

Ta' momoi masiparitci song polak

¹⁴ “Ke asegean kam ka kupkumen laggai akenen Tuhan Taikamanuamui ka kam, bui' nuparitci kam song polak pabebeakenenmui siripot siteuakenen ka teteret siburu.”

Enungakenen pagalaiat sipasimumuneng

¹⁵ “Ke sara le sipasimuneng ta'pei momoi itubulatnake puseleat sara sirimanua. Simatata'nia bui'ta rua sia sipasimunengake puseleat nenda.

¹⁶ Ke ai sara sirimanua sioba masinganduake sabagei ka pakaroat, rakua pabokoat ka pakaroat, oto

¹⁷ bui'ta mei sia ruadda ka kudduat panindogat ka siteuakenen Tuhan bule rapakaroake sia tai imam samba tai sipasiukum sipugagalai sedda.

¹⁸ Bui'ta ralelekngake simakolou pakaroat nenda tai sipasiukum, samba ke sibulatnia paloloiatnia le ka pasasambatdra tai Israel,

¹⁹ bui'ta tuukumnia pasamba ukum siripokat ukuman siloket saggaknia nenda. Kisedda te nutata'ake kam pukakatai.

²⁰ Raarep te sangamberi sirimanua pagalaiat nenda samba malotorangan, bailiu ta'an babara minca sigalaiake katai kele nenda.

²¹ Bui' imanuntu bagamui ka sirimanua sipasilololoi nenda. Ukumannia iate: Enga silit enga, mata silit mata, sot silit sot, kabei silit kabei samba rere silit rere.”