5Mos. 18 - BUKO SIPUNENAN

Rubeiatda tai imam

¹ “Sangamberidra tai suku Lewi tukau galajetdra muimam, kalulut nene ta momoi rasilo ka sia rubeiat polak ka Israel. Ka panguruat samba ka buluakenen bagei sikau Tuhan le purimanuaiatdra.

² Ta' momoi rabakkati ka sia polak kele suku-suku bagei, aipoi Tuhan le ka sia ikepmakenendra, kele sipalelekngakenen Tuhan katubutda.

³ Ke ai sia sipanguruatnake buluakenen jaui ele biribiri, bui' ta tukau rubeiatadra tai imam iate, bakkapat ka mata, bakkla samba tinanai tarimeu nenda.

⁴ Bua siboiki ka gandum, suat anggur, tulat zaitun samba bulut biribiri, rubeiatdra leu et tai imam.

⁵ Ka talagat sangamberi suku Israel, aipilingan si Tuhan suku Lewi sibailiu imam teret buru-buru.

⁶ Ke ai sara tai Lewi sibara ka laggai bagei ka Israel, ioi ka kudduat sipilit Tuhan samba ioba mukuddu sedda,

⁷ momoi igalaiake pupasikelanan kai Tuhan Taikamanuania kele tai imam sabagei sipugagalai sedda.

⁸ Bui' ta isilo leu et komen sikere iginia kele ka tai imam sabagei. Aponia sisilonia ka lalepnia, nenda leu et ka sia.”

Galaiakenen keraet Tuhan Taikamanua

⁹ “Ke anugurukingan kam kupkumen laggai akenen Tuhan Taikamanuamui ka kam, Bui' nuului kam pukakatai sigalaiakenendra bangsa-bangsa sikukuddu sedda.

¹⁰ Bui' ibara ka talagamui sipanguruatnake tatogania sibailiu buluakenen rarangen. Samba bui' ibara berisara sipukerei tubuna ikua apa pa sibabara, masigaba toggaiat, masipakei kuanen susukat ele

¹¹ puagai musihir, ele ragalaiake patabbarat ka ketsat sirimanua simamatei.

¹² Sirimanua sigalaiake galajet sikatai nenda malaga bagania si Tuhan Taikamanuamui, samba iate lulunia aituituiake sia si Tuhan ka matamui.

¹³ Oto kau nubuluake kam tubumui ka tubut Tuhan ka muinet paatuatmui.”

Palelengan Taikamanua bule ikoiniake sara nabi

¹⁴ Iageti kuanangannia si Mose, “Sanganberi bangsa ka laggai kudduijietmui nenda airatututnake nganturatdra sipukerei tubuna sipasikua supuaaili ka sibabara samba masigaba toggaiat. Tapoi si Tuhan Taikamanuamui ta iobaake nugalaiake kam kele nenda.

¹⁵ Bailoknia, ikokoiniake te' sara nabi si Tuhan ka tubumui sibara ka bangsatta kele aku nene, samba bui'ta mareddet kam ka tubunia.

¹⁶ Ka gogoi parurukatmui ka leleu Sinai, anutiddou kam bule bui'an nuarep kam ngangan Tuhan Taikamanuamui samba nuitco kam ioi ka bagat obengan sipujujulu, kalulut lotomui matei.

¹⁷ Kalulut nene kuanangan ka matakku si Tuhan, “Panindogatra nene bulat maeru.

¹⁸ Kukokoiniake te sara nabi sibara ka bangsadra kele ekeu. Kukua ka matania aponia kuanennia, lepa segeakenangannia parentakKu katubutda bangsa nene.

¹⁹ Ka bagat oningKu le ipanibo, samba kasei sitaioba masiarepi nia ukumakekungan sia.

²⁰ Tapoi ke ai sara nabi simagege masisegeake sara patonekat ka bagat oningKu, sitaikokoiakenenKu igalaiake kele nene, buta mateinia. Kisedda leu et tai nabi sipaninibo ka onin taikamanua bagei bui'ta matei sia.”

²¹ Kupaatu babara parerekat ka patuatmui, “Kipa ioi kuagainia patonekat sara nabi nenda sibara kai Tuhan ele ta?”

²² Ke manibo sara nabi ka onin Tuhan, tapoi ta muaaili sikuania, oto sibalat nenda ta sibara kai Tuhan. Ka oninia le aipanibo nabi nenda, oto bui numaloto kam ka tubunia.”