5Mos. 17 - BUKO SIPUNENAN

¹ Bui nubuluake kam jaui ele biribiri sibara katai tubu ka tubut Tuhan Taikamanuamui, aipoi bulat malaga bagaNia ka buluaakenen kele nenda.

² Ke nuarep kam ka sara laggaimui sara sirimanua sigalai jo ka matat Tuhan Taikamanuamui kalulut aipasabau palelengan

³ samba parentaNia ipanindogi samba ibuluake tubunia ka tubut taikamanua bagei ele ka sulu, ka laggo ele ka panyanyat,

⁴ oto bui'ta nutaiko kam sipulelelek. Ke sibulatnia bai amuaili katai nenda ka talagamui tai Israel,

⁵ sirimanua sijo nenda tuambit ka teitei irip laggai samba baijukmuiannia bukku teret matei.

⁶ Ke ai rua sia sipasimumunengake selenia momoi nuukumake kamnia simateiakenen. Tapoi ke sara le sia sipasimuneng ta momoi tugalaiake ukuman simateiakenen.

⁷ Sia sipasimumuneng nenda buita sia le siboiki masibajuiknia bukku, lepa siangan sirimanua simigi. Kele kisedda te nutata'ake kam pukakatai.

⁸ Ke ai pakaroat sitaioi ratakkiake tai sipasiukum ka laggaimui kalulut besi'nia itutakkiake pakaroat nenda, kele pagalaiat pamamatei sipalit baga ele taipapaliket baga, ele paukkelat pagalaiat pubabakkat ele rabaraake pumaujukatdra ka pasasambadra, iageti buita mei kam ka kudduat sipilit Tuhan Taikamanuamui.

⁹ Segeake kam pakaroat nenda katubutda tai imam Lewi samba ka tai sipasiukum sipugagalai sedda, oto eddangan raala katakkikat.

¹⁰ Sia te masiake katakkikat, samba buita nugalaiake kam kele sikuatdra ka tubumui.

¹¹ Silo kam katakkikat nenda samba galaiake kam siteuakenendra pat aili ka sigoisonia.

¹² Kasei simagege masiasoli tai sipasiukum samba tai imam sipugagalai sedda, buita tuukumake nia simateiakenen. Kisedda nutataake kam pukakatai ka Israel.

¹³ Iageti sangamberi sirimanua areprangan sipuaaili nenda, malotorangan bailiu ta'an babara sigalaiake kele nenda.”

Enungakenen pagalaiat rimata

¹⁴ Ke aibailiuan bakkatmui polak akenen Tuhan Taikamanuamui ka kam, samba amukuddungan kam sedda, ele nuoba kam ibara sara rimata kele bangsa bagei sikuddu ka be'bemui.

¹⁵ Lelekngake kam simakolou bule sirimanua rioakenenmui sibailiu rimatamui bui'ta sirimanua sipilit Tuhan Taikamanuamui. Buita sibara ka bangsamui; bui' nurioake kam sirimanua tai toi sibailiu rimatamui.

¹⁶ Sara rimata ta momoi masiigiake saladdunia sipukukuro samba ta momoi ikoiniake sabangsania ratoili ka Misir bule rasaki kuro, kalulut aikuangan poi si Tuhan bulat ta momoi ratoili minca sapaamianNia ka laggai nenda.

¹⁷ Sara rimata ta momoi ipusinanalep simigi, bule bui' ikateiteiake si Tuhan. Nia leu et ta momoi ipakayo tubunia ka perak samba mas.

¹⁸ Ke turioake sara sirimanua sibailiu rimata, buita tukau sara buko ka tubunia sibara ka bagania surukat Taikamanua sinurat sibara ka buko siburu sikoiriakenendra tai Lewi.

¹⁹ Buko nenda buita ai ka bebenia simariuriu, samba buita ibasa ka sanganantat purimanuaiatnia bule igelai masisuru Tuhan Taikamanuania samba ireddet sangamberi sitususurat ka bagat buko nenda.

²⁰ Ke ibasa bai buko nenda sipulelelek, ta ikukua tubunia nia peile maeru katubutda sabangsania, samba kenanen kipa pa ta ipasasabau parentat Tuhan. Iageti nia samba puuterangan sapunuteteunia masiuteake bangsa nene sipururura.”