5Mos. 16 - BUKO SIPUNENAN

Gogoi Punen Paskah

¹ “Punennake kam Paskah ka laggo Abib nusuru' kam si Tuhan Taikamanuamui, kalulut ka bagat laggo nene, ka teteret sinoibo aibelaake kam ka laggai Misir.

² Kenan kam ka kudduat sipilit Tuhan, nuja'ja kam sangamuneng kambing ele biribiri samba jauimui sibailiu buluakenen ka Paskah nusuru kam Tuhan Taikamanuamui.

³ Buluakenen Paskah nenda bui' ta nukom kam pasamba roti sita'sioman. Pitu ngagogoi burunia buita nukom kam roti sita'sioman, kele ka teteret anukaddiuake kam laggai Misir sipinaola. Kom kam roti nenda, oniakenen roti pangoringan, bule ka sanganantat purimanuaiatmui ainurerepdem kam gogoi anukaddiuake kam Misir, kudduat pangoringanmui.

⁴ Ka bagat pitu ngagogoi burunia bui' ibara sara sirimanua ka sangaliot laggaimui sipasikokoiri sioman komen ka lalepdra. Akkulat tarimeu sija'ja sinoibo ka gogoi siboiki, ka soibo nenda leu et bui ta sappru nukom kamnia.

⁵ Tarimeu ka Punen Paskah bui' ta nuja'ja kam ka kudduat sipilit Tuhan Taikamanuamui, bui' ka kudduat bagei ka sangalio laggai akenenNia ka tubumui.

⁶ Oto nugalaiake kam nenda, bui' ta ka teteret ibele sulu, kele ka gogoi anukaddiake kam kupkumen laggai Misir.

⁷ Seu kam akkula nenda samba kommuiannia ka kudduat sipilit TuhanTaikamanuamui, mancep geti toili kam ka lalepmui.

⁸ Ka bagat enem ngagogoi, bui'ta nukom kam minca roti sita'sioman. Ka gogoi sikapitunia leu parurumuian bule manindou kam ka tubut Tuhan Taikamanuamui. Bui' nupugalai kam ka gogoi nenda.”

Punen Pasimoneiat

⁹ “Adde kam pitu ngamenggui burunia, barania ka gogoi siboiki pasimoneiatmui gandum,

¹⁰ lepa punenimuian Punen Pasimoneiat nusuru kam Tuhan Taikamanuamui. Ka gogoi nenda ambitmuian panguruatnakenenmui sibara ka teu bagamui ka tubuNia siripot igit puukutungan siakeNia ka tubumui.

¹¹ Puangka kam baga ka matat Tuhan Taikamanuamui, ka kudduat sipiliNia, kam samba tatogamui, sapagugeletmui samba leu tai Lewi, sitoi, sita' ina, tai lumang sikuddu ka laggaimui.

¹² Kau nureddet kam sangamberi parentaNia ka bagat riuriu topit, samba bui' nukalipogi kam nia siburu kam nene pagugulet ka Misir le.

Punen Sapou Buluk

¹³ Lepa nupabo'boki kam gandummui samba nupiot kam buat anggurmui, buita' mupunen kam Punen Sapou Buluk ka bagat pitu ngagogoi burunia.

¹⁴ Puangka kam baga sambamui tatogamui samba sapaguguletmui, tai Lewi, tai toi, sita' ina, tai lumang sikukuddu ka laggaimui.

¹⁵ Pitu ngagogoi burunia nupunenake kam punen nenda bule nusuru kam Tuhan Taikamanuamui ka kudduat sipilit Tuhan. Puangka kam baga, kalulut aisukatanakean poi si Tuhan Taikamanuamui buat siuremanmui samba galajetmui.

¹⁶ Sangamberidra taimanteu tai Israel buita' moi manindou ka tubut Tuhan Taikamanuamui ka kudduat sipiliNia telu ngaminca ka bagat sangarura, iate ka Punen Paskah, Punen Pasimoneiat samba Punen Sapou Buluk. Senen tubu buita masiambit panguruatdra

¹⁷ siripot sibabara katubutda, siripot igit puuktungandra sikau Tuhan Taikamanuamui katubutda.”

Enung itugalaiake katuroipoat

¹⁸ Ka senen laggai siaket Tuhan Taikamanuamui ka kam, buita nurioake kam tai sipasiukum samba sipugagalai bagei bule raenungake pakaroat ka siberikabaga ka simaroipo.

¹⁹ Masitakkiake pakaroat, ta momoi ragalai siobara ele matutru sia ka sisara. Sia leu et ta momoi masisilo bulagat ka enungan sitaimaroipo, kalulut mareirei ipetpetnake matat sirimanua, beri leu sirimanua simasiku paatuat samba sitaimapajoat, bailiu taimaroiponangan raala katakkikat.

²⁰ Kau imariuriu roipomui, bule ioi imariuriu nukuddu kam samba imalelek puririmanuamui ka laggai akenen Tuhan Taikamanuamui ka kam.

²¹ Ke nugalai kam kudduat pasibuluat kai Tuhan Taikamanuamui, bui' nukau kam buluat loina tularat Asyera ka be'benia,

²² samba bui' nurioake kam arigi bukku nubuluiji kam sabulungan, aipoi bulat malaga bagania si Tuhan Taikamanuamui ka galaiakenen kele nenda.