5Mos. 15 - BUKO SIPUNENAN

Rura sikapitunia

¹ “Ka senen pangampulat rura sikapitunia buita' nubaraake kam pasitatakat utak.

² Oto kise enungannia. Senen tai Israel sipasibabaleake bulagatnia ka pasasambadda tai Israel, buita' itata'ake utak nenda, kalulut siripot siteuakenen Tuhan le aitutata'ake utak nenda, oto tat momoi itutiddou minca.

³ Ka tai toi geti momoi nutiddou kam bulagat sibaletdra ka tubumui, tapoi ka tai bangsamui geti tat momoi nutiddou kam minca bulagat sibaletdra.

⁴ Isusukatnake kam Tuhan Taikamanuamui ka kupkumen laggai akenenNia ka kam. Oto ta'an babara ka talagat bangsamui simageba,

⁵ sarat kau le mareddet kam kai Tuhan Taikamanuamui, samba bulat sipinagaba nugalaiake kam sangamberi siparentaakenenku ka tubumui gogoi nene.

⁶ Ipanunukani kam Tuhan Taikamanuamui kele sipalelekngakenenNia, maigi te nubabaleake kam bulagat katubutda tai bangsa, tapoi kam geti ta masibabale kam. Maigi te bangsa kukupmakenenmui, tapoi kam geti ta momoi rakupkupmake kam.

⁷ Ke amukuddungan kam ka laggai akenen Tuhan Taikamanumui ka kam, lepa bara ka sara laggaimui sabangsamui simageba, bui' sarat tubumui nupasisikeli kam, samba bui' nupisik kam nuropmake kam nia.

⁸ Tapoi kau imaanggai bagamui samba nubaleake katubutda simemet pakeietdra.

⁹ Bui' nupisik kam nia nukau kam baleetnia, kalulut nupaatu kam amalegrengan rura pasitatakat utak. Bui' nuobaake kam iguruki patuatmui sikatai. Ke ta noba kam masibaleake, pusoganangan te sirimanua nenda inganduake kam ka tubut Tuhan, oto kuattangan ekeu simasele.

¹⁰ Kau sibara ka angkat baga samba ka teu bagamui nukau kamnia, oto sukatnakenangan sangamberi galajetmui si Tuhan Taikamanuamui.

¹¹ Ka talagamui mareirei le ibara piga pa simageba samba simagulai apapa. Oto kalulut nene kuparentaake kam bule imaanggai bagamui katubutda.”

Enungan galaiakenenmui katubutda sapagugulet

¹² “Ke ai ka talagamui taimanteu ele tainanalep sipasisasakiake tubunia bailiu paguguletnu, bui' ta mugalainia ka tubumui enem ngarura burunia. Ka rura sikapitunia belaakemuian nia.

¹³ Pagugulet sibelaakenen nenda bui' nuobaake kam ituitui sita' abbinen.

¹⁴ Tapoi kau le kam sibara ka aggai bagamui siripot panukanan Tuhan Taikamanumui ka tubumui iate kambing biribiri, gandum samba anggur.

¹⁵ Repdem kam, siburu pagugulet le kam ka Misir lepa belaakenangan kam si Tuhan Taikamanumui; iate lulunia akuake parenta nene ka tubumui.

¹⁶ Tapoi ke ta'an ioba toili pagugulet nenda kalulut manuntu bagania ka tubumui samba ka sangalalepmui samba ioba mukuddu ka talagamui,

¹⁷ ambit le kam nia ka matatbaliu lalepmui, iageti lobokmuian talingania, oto bailiunangannia pagugulet ka sanganantat purimanuaiatnia. Kisedda leu te nugagalaiake kam ka pagugulet sinanalep.

¹⁸ Ke nubelaake kam sara pagugulet, bui' bara selet bagamui, kalulut enem ngarura aipugalai ka tubumui isilo upa sitenga upadra sara pagugulet. Oto galaiake kam parenta nene, bule isukatnake sangamberi galajetmui si Tuhan Taikamanuamui.”

Togat jaui samba kambing biribiri sipututu'tu mata siboiki

¹⁹ “Togat jaui samba kambing biribiri simanteu sipututu'tu mata siboiki, bui' ta nupanguruatnake kam ka tubut Tuhan Taikamanuamui. Jaui nenda ta momoi tukaunia masikuiluk, samba biribiri nenda ta momoi tusapu bulunia.

²⁰ Senen rura kam sangalalepmui bui ta nukom kam akkulania ka matat Tuhan Taikamanuamui, ka kudduat sipilit Tuhan.

²¹ Tapoi ke ai simakatai katubut tarimeu nenda, ele majegeu, mapeset samba ai katai tubunia bagei, ta momoi nupanguruatnake kam nia katubut Tuhan Taikamanuamui.

²² Senen sirimanua, simalina pa nia ele kasitsitnakenen, momoi nukom kamnia ka lalep, kele masikom akkulat simatsura ele akkulat kijang.

²³ Bui' nukom kam logaunia, tapoi bui' ta nupiliake le kam ka polak kele oinan.”