5Mos. 14 - BUKO SIPUNENAN

Enungan keraet ka pureureugat baga

¹ “Kam nene iate paamian Tuhan Taikamanuamui. Oto ka teteret ai kam murereureu baga kalulut sirimanua sitatata', bui' nubaraake kam mauju' ka tubumui ele nusapu kam alaimui ka mata kele sigalaiakenendra tai bangsa bagei.

² Kam iate bakkat Tuhan Taikamanuamui; ka sangamberi bangsa ka polak, kam te aipili Taikamanua ibailiu paamianNia.”

Komen simakeikei samba sitaimakeikei

³ “Bui' nukom kam komen keikeijet kele sikuat Tuhan.

⁴ Tarimeu sioi nukom kam iate: jaui, biribiri, kambing,

⁵ simatsura, biribirit leleu, kambing leleu, kijang

⁶ samba sangamberi tarimeu sita' rubat sulet samba sipasimeme kan nia rua ngaminca.

⁷ Ta' momoi nukom kam tarimeu sita' rubat sulet samba sitaimeme kan nia rua ngaminca. Ta' momoi nukom kam unta, kelinci ele marmot. Tarimeu nenda takeikei itukom kenanen rua ngaminca imeme kan nia tapoi ta maruba suletnia.

⁸ Bui' nukom kam sakkoilo. Tarimeu nenda takeikei itukom, kenanen maruba suletnia tapoi ta rua ngaminca imeme kan nia. Bui' nukom kam akkulania, samba bui' nurape kam tubunia simamatei.

⁹ Momoi nukom kam sene ngamata iba sibara saggarat samba sibara susru.

¹⁰ Tapoi iba sikuddu ka oinan sita' saggarat samba sita' susru takeikei nukom kam nia, oto ta momoi tukom.

¹¹ Momoi nukom kam uma sita' keikeiakenen.

¹² Tapoi ai piga ngamata pa ta'momoi nukom kam: manyang sabeu, ering janggut, manyang koat;

¹³ manyang simabonan, piligi, kailea, uma unta, aro, kaileat koat

¹⁴ samba sene ngamata seggu,

¹⁵ uma unta, uma popo, uma saksa samba leituak;

¹⁶ uma kaileak, uma popo sabeu, uma popo simabulau;

¹⁷ uma liddai, uma ering samba uma liddai oinan;

¹⁸ uma mangkakak, samba seggu siripot ngamataatnia, reigureigu samba leituak.

¹⁹ Sangamberi sigep sibara kappo iate takeikei tukom, oto ta momoi tukom.

²⁰ Tarimeu sibara kappo ta takeikei itukom, momoi le itukom.

²¹ Tarimeu simamatei ta momoi nukom kam nia, tapoi momoi rakom nia tai toi sikukuddu ka laggaimui, ele nusakiake kam ka tai toi. Kalulut kam te paamian sikokoiakenen bakkat Tuhan Taikamanuamui. Akkulat togat biribiri ele togat kambing bui' nuseu kam nia sigaluakenen ka suat tottot inania.”

Enungan pagalaiat panguruat sepersepuluhan

²² “Senen rura bui' ta nukeleiake kam sepersepuluhan sibara ka buat siuremanmui.

²³ Oto bui' ta nukom kam sepersepuluhanmui nene iate gandum, suat anggur, tulat zaitun, togat jaui samba kambing biribirimui sipututu'tu mata siboiki ka matat Tuhan Taikamanuamui, ka kudduat sipiliNia kudduatmui manindou ka tubuNia. Galaiake kam nene bule imariuriu nugelai kam masisuru' Tuhan Taikamanuamui.

²⁴ Tapoi ke mareunan kudduatmui nenda ka kudduat sipilit Tuhan Taikamanuamui, bailiu ta momoi nuambit kam sedda panguruat sepersepuluhan sibara ka buat siuremanmui siaket Tuhan Taikamanuamui,

²⁵ iageti sakiakean le kam rubeiat buat siuremanmui nenda, samba ambit kam bulagat nenda ka kudduat sipilit Tuhan Taikamanuamui.

²⁶ Pasaki kam bulagat nenda nuala kam aponia siobat bagamui: jaui ele kambing biribiri, suat anggur ele lo' simapuinengen, iageti ka kudduat nenda, ka matat Tuhan Taikamanu mui, kam samba sangalalepmui bui' mukom kam simakere samba muangka baga.

²⁷ Bui' nuobaake kam ramalimai tai Lewi sikuddu ka laggaimui. Repdem kam sia nene ta anai polak ikepmakenendra.

²⁸ Ka senen pangampulat rura sikatelu, kau nuambit kam panguruat sepersepuluhan buat siuremanmui samba ruruakemuiannia ka laggaimui.

²⁹ Komen nenda iate komenda tai Lewi kalulut ta anai ka sia polakdra, samba leu ka tai toi, sita' ina samba tai lumang sikukuddu ka laggaimui. Momoi raoi masiala sangamberi komendra ka sia. Ke nugalaiake kam kele nene, iageti sukatnakenangan sangamberi galajetmui si Tuhan Taikamanumui.”