5Mos. 13 - BUKO SIPUNENAN

¹ Ke ai sara nabi ele siagai mupangamutet masipalelek ka kam sara kerek ele kiseiet,

² sipinatunia poi bule nupanindou samba nupaguguletnake kam ka tubut taikamanua sitaiagaijetmui, kenanen muaali sangamberi sipaleleknia,

³ bui' nupuuku kam nia. Aipakei le sirimanua nenda Tuhan Taikamanuamui isibo kam, bule iitco bulatnia leu pa manuntu bagamui kai Tuhan ele ta.

⁴ Si Tuhan, Taikamanuamui, buita nutut kam samba buita nukalotoake kamNia, buita nuungkaake kam surukatNia, ngangaNia buita nuarepi kam, katubuNia bui tamupagugulet samba mutopit.

⁵ Nabi ele saute nenda bui' ta tuukum matei le', kalulut ainanaan mujo kai Tuhan Taikamanuam, sibelaake kam ka laggai Misir samba sitebui ekeu ka lalep paoreat – ioba ipepeake kam ka enungan siparentaakenen Tuhan Taikamanuamui, ka tubumui bule tuenung. Kisedda te' bui'tanutataake sikatai nenda ka talagamui.

⁶ Ke ai sasarainamui ele tatogamui taimanteu ele tainanalep, ele sinanalepmui simanuntu bagamui ele sasuruakmui igalai sipinakele ina'na' kam: Sitakam musipaguguletnake tubu ka taikamanua bagei sitaiagaietmui ele sitaigaijetdra taikebbukatmui,

⁷ sara taikamanuadra tai bangsa sikukuddu ka bebemui ele simareunan katubumui, barania ka tutut polak aili ka tutut polak,

⁸ bui' numakala kam katubunia samba bui' nuarepikamnia. Bui' leu nupununtuki kamnia baga samba nusakkeri kam katainia,

⁹ tapoi mateiake le nia! Siboiki kabeinu le masittadda masimateiakenia, lepa sangamberi taikauma.

¹⁰ Bui' ta nubajuk nia bukku teret matei, kalulut ioba masiareuake kam kai Tuhan Taikamanuamui sibelaake kam ka laggai Misir, ka uma paoret.

¹¹ Iageti malotorangan sangamberidra tai Israel raarep katumateiat nene, bailiu berisara sia sigalai minca sikatai.

¹² Ke amukuddungan kam ka laggai akenen Tuhan Taikamanuamui ka kam, kupaatu maagai te katuareman

¹³ ai sia piga pa sirimanua sikatai sibara ka bangsamui sipasipepeake sipulalaggai bule rapanindogi taikamanua sitaiagaietmui.

¹⁴ Ke nuarep bai kam katuareman nenda, gabamuiannia sipulelelek. Ke sikatai nenda bulatnia amuaili,

¹⁵ iageti mateiakemuian sia sangamberi sipulalaggai sedda samba leu tarimeura. Subuakemuian leu laggai nenda.

¹⁶ Sangamberi pukayoat sibabara ka laggai nenda bui' ta nururu'ake kam samba labbumuiannia ka polak simalio, lepa labomuian sangamberi pukayoat samba laggaira sibailiu buluakenen kai Tuhan Taikamanuamui. Lepa sangamberinia nenda kaddiuakemuiannia ai nia karaganan samba ta'an momoi ragalainia minca.

¹⁷ Oto sangamberi bibilet siorak pateleijat nenda ta momoi nukoiriake kam nia bailiu bakkatmui, tapoi bui' ta nusubuake kam. Bailiu maleppetnangan golut Tuhan samba patoilanangan nuntut bagaNia ka tubumui. Maerunangan bagaNia ka tubumui samba bailiuakenangan kam bangsa sabeu kele sipalelekNia ka taikebbukatmui,

¹⁸ sarat kau le numareddet kam ka sangamberi parentaNia sisegeakenenku ka tubumui gogoi nene, samba nugalaiake kam sangamberi siobat bagaNia.”