5Mos. 12 - BUKO SIPUNENAN

Sara le kudduat panindogat

¹ “Nene te sangamberi surukat bulat reddenenmui ka sanganantat purimanuaiatmui ka kupkumen laggai akenen Tuhan ka tubumui, Taikamanuandra taikebbukatmui.

² Ke anugurukingan kam kupkumen laggai nenda, buita nupakatai kam sangamberi kudduat pasibuluatdra ka uddut leleu simabuak, ka patinambu-tinambu samba ka tei loina simalibbut buttet, kudduat bangsa sikukuddu sedda rapanindogi taikamanuandra.

³ Bukkatnake kam saangamberi kudduat pasibuluatdra samba pagatcamuian sangamberi arigi oniakenendra simakerek. Palabokimuian sangamberi tularat Asyera, samba pakataimuian leu tularat sabulungan buluijietdra, bailiu ta an rapaninindogi taikamanua bagei ka kudduat nenda.

⁴ Ka teteret ai kam manindou katubut Tuhan Taikamanuamui, bui' nuului kam enungan kele rapanindogi taikamanuandra.

⁵ Ka sangaliot kupkumen laggai sangamberi suku Israel, ipipili sara kudduat si Tuhan Taikamanuamui, bule ioi raoi bangsatta ka mataNia samba leu manindou ka mataNia.

⁶ Ka kudduat nenda te nuaambit kam sangamberi buluakenen rarangen samba leu buluakenen bagei, panguruat sepersepuluhanmui samba panguruat bagei, panguruat masilului sipalelekmui, buluakenen ka teu bagam samba togat jaui samba kambing ele biribirim sipututu'tu mata siboiki.

⁷ Ka kudduat nenda leu, Ka matat Tuhan Taikamanuamui, pukommuian samba puangkamuian baga sangalalepmui kalulut sangamberi uktuk sisilomui ka sigalaimui sisukatnakenen Tuhan Taikamanuamui.

⁸ Ke aiailingan teterenia nenda, bui' nugalai kam minca kele sigalaimui kineneiget. Pat aili kineneiget aipeile kam manidou siobakat bagamui,

⁹ kalulut ta pei anuguruki kam kupkumen laggai akenen Tuhan Taikamanuamui ka kam, bulat kudduijietmui simasanang.

¹⁰ Lepat nutalipoki kam bagat oinan Jordan, ropmakenangan kam Tuhan Taikamanuamui nukuuduiji samba nulaggaiji kam polak ka silat oinan nenda. Jagonangan leu kam ka sangamberi saggak, samba purimanuamuian ka bagat aban.

¹¹ Iageti pilinangan sara kudduat Tuhan Taikamanuamui iate kudduat panindogatmui katubuNia. Sedda te bulat nueei kam nuambit kam sangamberi siparentaakenenku ka tubumui, iate buluakenen rarangen samba buluakenen bagei, panguruat persepuluhan samba panguruat sikokoiakenen sipalelekngakenenmui ka tubut Tuhan.

¹² Puangka kam baga ka matat Tuhan Taikamanuamui, sambat tatogamui, sapaguguletmui samba tai Lewi sikukuddu ka sangamberi laggaimui, kalulut ka sia tai Lewi ta anai polak rubeiatdra ka kupkumen laggaimui.

¹³ Ta' momoi nupanguruatnake kam buluakenenmui ka kudduat bagei sipilimui,

¹⁴ tapoi bui' ta ka kudduat sipilit Tuhan ka sara kupkumen laggaira sasukumui. Sarat sedda le nupangunguruatnake kam buluakenen sirarak samba galaiakenenmui bagei siparentaakenenku ka tubumui.

¹⁵ Tapoi momoi nuja'ja samba nukom kam akkulat tarimeumui kaipa nukuddu kam. Momoi nukom kam kele igit siaket Tuhan Taikamanuamui. Senen sirimanua, simalina pa nia ele kasisitnakenen, momoi rakom akkula nenda, kele ioi nukom akkulat simatsura.

¹⁶ Sarat logaunia le ta momoi tukom, tapoi bui' ta tupiliake ka polak kele oinan.

¹⁷ Ka kudduatmui ta momoi nukom kam panguruat sepersepuluhan sibara ka gandummui, ka anggur, tulat zaitun, jaui ele kambing biribirimui sipututu'tu mata siboiki, buluakenen pasilului palelenganmui, buluakenen ka teu bagamui ele panguruat bagei.

¹⁸ Kam samba tatogamui, sapaguguletmui samba tai Lewi sikuddu ka laggaimui, bui'ta rakom panguruat nenda ka matat Tuhan Taikamanuamui, ka kudduat sipilit Tuhan Taikamanuamui, samba ka kudduat nenda bui' ta muangka kam baga ka lulut sangamberi sigalaimui.

¹⁹ Jago kam bui' nuobaake kam imakatai puririmanuandra tai Lewi burumui murimanua ka laggai nenda.

²⁰ Lepa aipalio pasongan laggaimui si Tuhan Taikamanuamui kele sipalelekNia, momoian nukom kam akkula siobat bagamui.

²¹ Ke mareunan kudduat sipilit Tuhan Taikamanuamui barania ka kudduatmui, momoi nuja'ja kam sangamuneng jaui, biribiri ele kambing siaket Tuhan ka kam, samba kommuian akkulania siobat bagamui, kele sikuakku ka tubumui.

²² Senen sirimanua, simalina pa nia ele kasisitnakenen, momoi rakom akkula nenda, kele ioi nukom kam akkulat simatsura.

²³ Tapoi ke ai peile logau ka akkulania bui' nukom kam nia, kalulut ai peile enga ka bagania, samba ta momoi nukom kam enga sambat akkulania.

²⁴ Sarat logaunia le ta momoi tukom, tapoi bui'ta tupiliake ka polak kele oinan.

²⁵ Ke nureddet kam parentat Tuhan nene, mangkanangan bagania si Tuhan, samba maerunangan puririmanuamui samba purimanuaiatdra sapunuteteumui.

²⁶ Sangamberi buluakenen samba panguruat sipalelekngakenenmui ka tubut Tuhan, bui' ta nuambit kam ka kudduat sipilit Tuhan.

²⁷ Buluakenen rarangen samba buluakenen komen akkulania bui' ta nupanguruatnake kam ka uddut kudduat pasibuluat Tuhan Taikamanuamui samba logaunia tupiliake ka uddut kudduat pasibuluat nenda.

²⁸ Lelekngake kam sipulelelek sangamberi siparentaakenenku ka tubumui, oto galaimuian simaeru samba simateu ka matat Tuhan Taikamanuamui, bailiu kam samba sapunuteteumui maarau samba maerunangan purimanuaiatmui teret buru-buru.”

Tuparepdem sia pagalaiat pasibubuluiji tularat bulungan

²⁹ “Isusubuake te sia si Tuhan tai bangsa sikuddu ka kupkumen laggai nenda, bailiu oinangan nukudduiji samba nulaggaiji kam nia.

³⁰ Oto ke ai subuakean tai bangsa nenda, jago kam bui nuului kam sia masipanindogi taikamanua bagei, aipoi galajet kele nenda sibaraake kamateiat le.

³¹ Ka teteret nupanindogi kam Tuhan Taikamanuamui, bui nuului kam bangsa-bangsa nenda kele rapanindogi taikamanuandra, aipoi enungan rapanindou ka sia ragagalaiake le galajet sikatai simalaga bagat Tuhan. Beri tatogadra ralalaboake sia ka uddut kudduat pasibuluat sibailiu buluakenen ka taikamanuandra.

³² Galaiake kam sangamberi siparentaakenenku ka tubumui. Bui' nutuppai ele nupabele' kam nia.