5Mos. 11 - BUKO SIPUNENAN

Pubebeunannia si Tuhan

¹ “Pununtuki kam baga Tuhan Taikamanuamui, samba kau imariuriu reddetmui ka sangamberi parentaNia.

² Repdem kam kineneiget aponia siagaimui pagalaiat Tuhan ka purimanuaiatmui. Ka sia ka tatogamui ta araitco samba ta raagai pagalaiat nene. Kam le amasiitco pubebeunan Tuhan Taikamanuamui, ronNia, gegeNia

³ samba sangamberi kiseiet sigalaiakeneNia. Anuitcoan kam aponia sigalaiakenenNia ka tubut rimata Misir samba ka sangalio kupkumen laggainia.

⁴ Anuitcoan leu kam aisubuake saladrudra tai Misir si Tuhan sambat sangamberi kuro samba leu et kereta pasaggakdra. Loulouakenangan sia sangamberidra ka Koat Tiberau ka teteret arakukru kam.

⁵ Anuagaian kam aponia aigalaiake si Tuhan ka tubumui ka simatangeu kepei sege kam sene.

⁶ Samba ai le nurerepdem kam sigalai Tuhan ka tubut Datan samba Abiram, tatogat Eliab sibara ka suku Ruben. Ka matamui leu et sangamberimui, masilaknangan polak iageti labbunangan sia sambat sangalalepdra, kemandra, sangamberi sapaguguletdra samba leu tarimeura.

⁷ Bulatnia, kam le saramui amasiitco sangamberi kiseiet sigalaiakenen Tuhan.”

Panukanan katubutda simareddet, samba pateleijat katubutda sitaimareddet

⁸ “Kau nureddet kam sangamberi surukat siakeku ka tubumui gogoi nene, iageti oinangan leu nutalipoki kam bagat oinan samba nuguruki kam kupkumen laggai tat mauju nukudduiji kamnia.

⁹ Samba maburunangan leu purimanuaiatmui ka laggai simakayo samba simagabru, sipalelek Tuhan ka taikebbukatmui samba ka sapunuteteura.

¹⁰ Kupkumen laggai kudduijietmui nenda, ta kele polak ka Misir, ka kudduatmui siburu. Sedda mugalai le kam simaron, nugurungake kam oinan ka mone ka teteret pasikaraman uremen.

¹¹ Tapoi kupkumen laggai kudduijietmui geti iate laggai simaleleu samba su'su, samba urat le masisusuaiji polak nenda.

¹² Si Tuhan Taikamanumui le masijajago laggai nenda samba masipasisikeli ka sanganantat rura.

¹³ Oto reddet kam sangamberi parentaNia sisegeakenenku ka tubumui kineneiget. Pununtuki kam baga Tuhan Taikamanuamui samba panindou kam ka tubuNia ka muinet patuat samba purimanuaiatmui.

¹⁴ Ke nugalaiake kam kisedda, akenangan leu urat si Tuhan ka polakmui siripot teterenia, lepat nupasimonei kam, samba leu ka panandaat nupangurep kam. Iageti bara ka kam gandum, anggur samba tulat zaitun,

¹⁵ samba leu puo komen tarimeumui. Matareknangan leu sangamberi komenmui.

¹⁶ Bui' nuoba iareuake kam ka tubut Tuhan nuei kam masibuluiji samba masipaguguletnake tubu ka taikamanua bagei.

¹⁷ Ke nupasabau kam parenta nene, golunangan leu kam si Tuhan. Ta'an iaake urat. Magaraknangan leu polak bailiu ta babara buat siuremanmui. Oto ka bagat oggak simaruei, matei kam ka polak simagabru akenen Tuhan ka tubumui.

¹⁸ Repdem kam samba lelekngake kam sangamberi parenta nenda. Appraake kam ka para samba ka bukkut utemui bule nurepdem kam nia.

¹⁹ Gelaiake kam ka tatogamui. Tiboi kam ai kam ka bagat lalep, ele ai kam ka puenunganan, teteret ai kam muari samba mugagalai.

²⁰ Suratnake kam ka arigit matatbaliu lalepmui samba ka matatbaliu gugurukat.

²¹ Iageti manantanangan ruramui samba tatogamui ka kupkumen laggai sipalelek Tuhan Taikamanua ka taikebbukatmui. Kipa burunia ibara manua ka uddut polak, kisedda leu burunia nukudduiji kam polak nenda.

²² Kau imariuriu nureddet kam sangamberi surukat sisegeakenenku ka tubumui: Pununtuki kam baga Tuhan Taikamanumui, galaiake kam sangamberi siparentaakenenNia ka tubumui, samba kau imariuriu topitmui ka tubuNia.

²³ Oto keklenangan leu sangamberi bangsa ka matamui, samba kudduijimuian polakdra tai bangsa-bangsa siabeu samba simaron sisaliu ronmui.

²⁴ Senen kupkumen laggai sigejengimui bailiunangannia bakkatmui. Barania ka simatangeu ka saigit ka kaiaman aili ka leleu Libanon saigit ka bare, samba barania ka oinan Efrat saigit kabelaiat sulu pat aili ka Koat Tenga saigit kabelekat sulu.

²⁵ Ka sangalionia kupkumen laggai nenda ibabaraake te Tuhan Taikamanuamui loto'ra ka tubumui kele sipalelekNia, bailiu ta anai beri sia sara sisaila kam.

²⁶ Ka gogoi nene momoi nupili kam panukanan ele pateleijat.

²⁷ Isusukatnake te kam ke mareddet kam ka sangamberi parentat Tuhan Taikamanuamui, sisegeakenenku ka tubumui gogoi nene.

²⁸ Tapoi ipateleiji le kam ke ta mareddet kam ka sangamberi parentat Tuhan Taikamanuamui, samba nupitca kam teiteimui masipanindogi taikamanua bagei sitaipaninindogietmui.

²⁹ Ke aiambitnan kam si Tuhan Taikamanuamui masiguruki kupkumen laggai kudduijietmui, bui' ta nukua kam panukanan ka uddut leleu Gerizim samba pateleijat ka uddut leleu Ebal.

³⁰ Ka ruania leleu nenda ai nia ka saigit kabelekat sulu bagat oinan Jordan ka kupkumen laggaira tai Kanaan sikukuddu ka peleu leleu Jordan, simatai kabelekat sulu ta areunia ka loina kudduat parurukat ka More ka be'bet laggai Gilgal.

³¹ Ta'an mauuju nutalipoki kam bagat oinan Jordan samba nukudduiji kam polak akenen Tuhan Taikamanumui ka tubumui. Lepat nuoppu kam polak nenda samba pukuddumuian sedda,

³² kau nureddet kam sangamberi surukat sisegeakenenku ka tubumui ka gogoi nene.”