5Mos. 10 - BUKO SIPUNENAN

Sikaruania si Mose masisilo surukat Taikamanua Sipulungamata

¹ “Iageti kuanangan si Tuhan ka tubuku, “Mose, pae' rua ngaba'ba bukku kele siboiki, samba galainungan leu sara peti loina kudduatnia, lepa oi ekeu ka tubuKu ka uddut leleu.

² Ka bukku nenda te Kusuratnake tiboiet simakere kele ka bukku siragatnakenennu. Lepa geti kaunungan bukku nenda ka bagat peti.”

³ Lepa galaikungan peti sibara ka loinat akasia, samba pae'kungan rua bukku kele siabbitku siboiki samba abbitkungannia ka uddut leleu.

⁴ Suratnakenangan si Tuhan Surukat Sipulungamata ka bukku lei' nenda simakere kele siboiki, iate surukat siakeNia ka tubumui, ka teteret aipanibo ka talagat obengan ai kam paruru' ka reret leleu. Kele ailepa nenda akenangan si Tuhan bukku lei' ka tubuku

⁵ samba toili aku masigorosoni leleu. Lepa geti kele siripot parentat Tuhan, kaukungan karuania bukku nenda ka bagat peti sigalaiku. Barania ka teteret nenda pat aili kineneiget karuania bukku lei' nenda ai peile sedda.”

⁶ Iageti tuitui tai Israel baradra ka uggungandra tai Jaakan, raei ka Mosera. Sedda te aitata' samba aiturateiake si Harun. Iageti sailinangannia togania si Eleazar sibailiu imam.

⁷ Baradra sedda ei sia ka Gudgod, lepa riuriruakerangannia ka Jotbata, kupkumen laggai simaigi oinan.

⁸ Ka leleu nenda te aikokoiake suku Lewi si Tuhan masipasikeli Peti Pakerekat Baga samba rapuuku si Tuhan, samba leu masikua panukanan ka bagat oniNia. Iate nenda galaiakenendra teret kineneiget.

⁹ Kalulut nenda te suku Lewi ta arasilo ka sia polak ikepmakenendra kele suku-suku bagei, karena si Tuhan le ka sia rubeiat ikepmakenendra, kele sikuat Tuhan Taikamanuamui katubutda.

¹⁰ Epat pulu ngagogoi samba epat pulu ngasoibo akukuddu ka leleu kele sigalaiku siboiki. Sangaminca nene leu aiarepi panindogatku si Tuhan, samba ioba ta imateiake kam.

¹¹ Iageti koiniakenangan aku masiuteake kam bule ioi nubakkati kam polak sipalelekNia ka taikebbukatmui.”

Besiakenen Tuhan

¹² “Kineneiget, kam sasaraina, lelekngake kam aponia besiakenen Tuhan Taikamanuamui ka tubumui: Kau nusuru kam Tuhan Taikamanuamui samba galaiake kam sangamberi parentaNia. Kau imakate bagamui ka tubuNia samba panindou kam ka tubuNia ka muinet paatuatmui.

¹³ Kau nurededet kam parentat Tuhan sisegeakenenku ka tubumui kineneiget iate kaerukatmui.

¹⁴ Tuhan Taikamanuamui le sibakkat manua, kisedda leu et polak samba sangamberi sibabara ka bagania.

¹⁵ Tapoi bulat abeu nuntut bagania si Tuhan katubutda taikebbukatmui, bailiu kam le aipili si Tuhan ka talagadra sangamberi bangsa, sambat pat aili kineniget kam leu et paamian sipiliNia.

¹⁶ Oto barania kineneiget bui' ta mareddet kam kai Tuhan samba bui'an nukelaake kam minca paatuatmui.

¹⁷ Aipoi Tuhan Taikamanuamui Nia le mabuak ka sangamberi taikamanua bagei samba sisaliu sangamberi gege. Nia te Taikamanua sipulubeunan samba sipulugege bulat reddenen. Ta' ioba imare're' samba leu masisilo bulagat ka enungan sitaimaroipo.

¹⁸ Nia te masipuuku sita'ina samba tailumang bule tugalaiake simaroipo katubutda. Manuntu bagaNia ka tai toi sikukuddu ka talagat bangsatta samba ikau leu komen samba bibilet.

¹⁹ Oto kakam leu bui ta nupatoila kam nuntut bagamui katubutda tai toi, aipoi siburu tai toi le kam ka laggai Misir.

²⁰ Suru' kam Tuhan Taikamanuamui samba sarat ka tubuNia le panindou kam. Kau imariuriu topitmui ka tubuNia samba sarat ka oniNia le nupusuppa kam.

²¹ Umun kam Nia kalulut Nia poi Taikamanuamui. Bulat tubumuian amasiitco sangamberi sigalaiakeneneNia siabeu samba simakisei ka bagatta sibailiu uktukmui.

²² Ka teteret araei taikebbukatmui ka Misir, pitu pulu le sia igitdra. Tapoi tuppainangan igimui si Tuhan Taikamanuamui kele igit panyanyat ka manua.”