5Mos. 1 - BUKO SIPUNENAN

Si Mose masipumumuan pagalaiat puririmanua ka leleu Horeb

¹ Ka bagat buko nene ai tiboiet Mose sisegeakenennia ka bangsa Israel ka teteret ai sia ka su'su simangai ka gilak leleu Jordan. Gilak nenda ai ka isit kabelaiat sulu bagat oinan Jordan, ka be'bet Suf, ka talagat laggai Paran samba Topel, Laban, Haserot samba Di-Zahab.

² Barania ka leleu Sinai pat aili ka Kades-Barnea sabau laggai simaleleu ka Edom, pulu sara ngagogoi pusilaijat.

³ Ka tanggal sara laggo pulusara ka rura si kaepat pulunia lepat arakaddiuake Misir, segeakenangan si Mose ka tai bangsa nenda, sangamberi siparentaakenen Tuhan, kele sangamberi sisegeakenen katubutda.

⁴ Aibara kele nene iate lepat aikalaake Sihon si Mose, rimatadra tai Amori, siuteake laggai Hesibon, samba Og, rimata Basan, sipasiuteake laggai Asytarot samba Edrei.

⁵ Oto, aipakolounia si Mose siboiki surukat samba parenta Tuhan, iate kateteret ai sia saigit kabelaiat sulu Jordan ka polakdra tai Moab, Kuanangan si Mose,

⁶ “Kateteret ai sita ka leleu Sinai, aikua Tuhan Taikamanuanta,” Bulat amaburuan nukuddu kam ka leleu nene.

⁷ Oto kineneiget ragatnan kam sapoumui samba kenan kam ka laggai simatinambu ka Amori, samba ka sangaliot laggai simalegre sedda, iate ka peleu leleu Jordan, ka laggai simatinambu samba laggai simagaktuk simaepe, laggai Negeb samba be'bet Koat Tenga. Kenan kam nukuidduiji kam laggai Kanaan samba peleleu-leleu Libanon, pat aili ka Oinan Efrat sabeu.

⁸ Aku, Tuhan, amasipalelekngake sangamberi polak taikebbukatmui si Abraham, Ishak samba Jakob samba leu sapunuteteura. Oto kenan kam nukudduiji kam polak nenda.”

Si Mose masipauddet sangamberi sipasiukum

⁹ Iageti kuanangan si Mose ka matadra bangsa nenda, “Ka teteret ai sita ka leleu Sinai, aku masikua ka matamui: Pupasikelanan masiuteake kam bulat masane' kaku. Ta' momoi kugalaiakenia sarakku, kalulut

¹⁰ aituppai poi igimui si Tuhan Taikamanuam kele igit panyanyat ka manua.

¹¹ Buleu Tuhan, Taikamanuandra taikebbukatmui mariuriu ituppai igimui pat aili sangaribu ngaoleat iginia, samba bailiuakenangan kam bangsa simaeru puririmanua kele sipalelekNia!

¹² Tapoi kipa iooi ke sarakku masipasikeli galajet simasane masilepaake sangamberi sibabara ka talagamui?

¹³ Pili katalagat senen suku piga pa taimanteu simasiku patuat, simaigi siagai samba simasut pukokolu kabaga, bule kuuddetnake sia rauteake kam.

¹⁴ Silomuian sikuakku nenda ka erut baga.

¹⁵ Kalulut nenda ka talagadra saute sipilimui, pauddetkungan piga pa sia simasiku paatuat samba simaigi siagai masiuteake kam. Piga pa kupauddet sibailiu sipasiukum siuteake sangaribu sia igidra, sabagei siuteake sangotu sia, siuteake lima pulu sia samba siuteake pulu sia. Samba kupauddet leu sia sabagei masipasikeli sasukumui.

¹⁶ Ka teteret nenda kaukungan galajetdra kise: Lelekngake kam paukkelat ka talagadra sabangsamui. Kau kam katakkikat simaroipo, ele pakaroat siorak sia sabangsamui, ele siorak sirimanua siooiake ka talagamui.

¹⁷ Kau sitakkiakenenmui nenda bui masane sangasila. Senen sirimanua nupakaroake kam sia ka enungan simakere, ta anai pabaggeijatnia. Bui' numaloto kam ka tubut kasei pa, aipoi sitakkiakenenmui nenda sibara ka Taikamanua le. Iageti ke' ai sara pakaroat simabesi' nutakkiake kam, akemuiannia katubukku, bule akungan le itakkiake pakaroatdra.

¹⁸ Ka teteret nenda leu et, pangantrukkungan kam pagalaiat pabagei-bagei galaiakenenmui.”

Sipananaiko sikoiniakenen sibara ka Kades-Barnea

¹⁹ “Oto siripot siparentaakenen Tuhan Taikamanuata, kaddiuaketangan leleu Sinai samba pusilattangan leu et taenungi su'sut simangai simalio samba kalotoakenen taailiake kam laggaira tai Amori simaleleu. Kele atasege kam ka laggai Kades-Barnea,

²⁰ kuakungan ka tubumui: Kineneiget asegean kam ka laggai Amori simaleleu, iate polak akenen Tuhan Taikamanuanta.

²¹ Itco kam, ka matamui aitunganang polak nenda. Kenan kam nukudduiji kamnia kele siparentaakenen Tuhan, Taikamanuanda taikebbukatmui. Bui' numaloto kam samba bui imakaratbagamui.

²² Tapoi oi kam ka tubukku samba kuamuian, “Maeru peile takoiniake piga pa sirimanua muboiki ka sita rataiko laggai nenda bule rakua kamatatta kaipa enungan taenungi kam samba kipa pagalaiat laggai ailiakenenta.”

²³ Silokungan sikuamui nenda, kalulut nene pilikungan pulurua sia, sara sia senen suku.

²⁴ Iageti eirangan leu et ka laggai simaleleu ka sanganantat peleu leleu ka Eskol, lepa lelekngakerangannia.

²⁵ Lepa toili sia ka tubutta ai araambit pabua-buat kaju siala'ra sedda samba segeakerangan gabrut polak laggai akenen Tuhan Taikamanua ka tubutta.

²⁶ Tapoi anusaggangi le kam parentat Tuhan Taikamanuamui, ta noba kam mei ka laggai nenda.

²⁷ Amungunyu' le kam nukua kam kise, “Malaga bagania si Tuhan ka tubutta. Iate lulunia aibelaake sita ka laggai Misir, bule ikau sita ka kabeira tai Amori, ramateiake sita.

²⁸ Oto apananta mei sedda? Sarapei sia sikoiniakenenta arabaraake pulotokatta arakua bangsa nenda peile maron ka tubutta samba maigi sia, samba rakukuddu ka laggai sibara kekre bukku simabuak kele buak manua, samba leu araitco sedda sirimanua sabeu tubu kele raksasa!”

²⁹ Tapoi kuakungan ka matamui: Bui' numaloto kam katubutda.

³⁰ Aileu iuteake kam Tuhan Taikamanuamui, ipasaggak punu tubumui kele siitcomui ka laggai Misir

³¹ samba ka kudduat simatangeu. Anuitcoan kam kipa aiabbit kam si Tuhan Taikamanuamui ka angkat baga ka sanganantat puenungananmui, pat aili ka kudduat nene, ta aisili kele sara ukkui ibeila togania.

³² Tapoi kenanen akukuangan kele nene, ta'pei leu matotonem bagamui ka tubut Tuhan Taikamanuamui,

³³ sipueenung ka matamui, samba sipasigagaba kudduat pukemahanmui. Isau'sau enunganmui ka teteret sinoibo pasamba arigi sibara obengan, samba sinago ka bagat arigi sibara tinobut.”

Tuhan masiukum tai Israel

³⁴ Kele aiarep hoihomui si Tuhan pugolunangan. Pusuppanangan,

³⁵ “Bulat beri te' sia sara ka reddenan sikatai nene masiguguruki laggai simagabru silelekngakenenKu katubutda taikebbukatmui.

³⁶ Sarat si Kaleb, togat Jefune le igugurukinia, aipoi ka sia riuriu le' topitnia ka tubuKu. Kukakau te kai Kaleb samba ka sapunuteteunia laggai sigejenginia nenda.”

³⁷ Kam leu aikabaraiji aipugoluki aku si Tuhan, kuanangan, “Beri ekeu leu et, Mose, ta leu tuguguru' ekeu ka laggai nenda.

³⁸ Tapoi kaunuparon patuat paguguletnu, iate si Josua togat Nun. Nia te masiuteake Israel masioppu laggai nenda.”

³⁹ Iageti kunangan ka matatta sangamberitta si Tuhan, “Tatogam simakope goiso peile sitaiagai peile masipabaggei simaeru samba sikatai, tatogam kuanenmui sirauraura tai saggakmui, katubutda te Kukakau polak nenda, samba sia te geti masikukudduiji.

⁴⁰ Tapoi kam geti, toiliake kam ka simatangeu muenung ka enungan sieei ka Gunggung Akaba.”

⁴¹ Alegimuiannia, “Ale Mose, amajongan kai ka tubut Tuhan. Tapoi kineneiget kuoba kai mei pasaggak kele siparentaakenen Tuhan Taikamanuanta.” Lepa patarekrangan tubudra sene-senendra ka talagamui raei pasaggak, ka bagadra poi malabbei masisaggangi laggai simaleleu.

⁴² Tapoi kuanangan si Tuhan ka tubukku, “Bui' nuobaake raei pasaggak. Kalulut ta Kupaalei sia, babara rakakalaake sia tai saggakra.”

⁴³ Iageti segeakekungannia ka matamui sikuat Tuhan ka tubukku, tapoi ta anupuletcei kam. Anusaggangi le kam parentat Tuhan, ka buak patuatmui ei kam ka leleu nenda.

⁴⁴ Lepa geti bela sia tai Amori sikuddu sedda rasaggangi kam. Bulat maigi sia ka sia, kele mungkuat mani. Kukrurangan kam pat aili ka Horma, iageti kalaakerangan kam ka laggai simaleleu ka Edom.

⁴⁵ Lepa toili kam, pusogamuian ka tubut Tuhan nutiddou kam paroman, tapoi bulat ta ioba iarepi kam ele ipuuku kam.”

Sipururura ka simatangeu

⁴⁶ “Lepa nenda kuddu sita simakope buru ka laggai Kades.