4Mos. 8 - BUKO SIPUNENAN

Pasigalangan alito

¹ Kuanangan si Tuhan kai Mose,

² “Kua kai Aron ka teteret ikau alito ka reret alito nenda, buita ikau simakolou bule itoroiji reret alito rubeiat kamata.”

³ Galaiakenangan si Aron kele siparentaakenen Tuhan. Kaunangan sangamberi alito nenda ka isit rubeiat kamata.

⁴ Kudduat alito nenda, pat aili ka pata samba pulaingeannia paogo-ogo sigalai sibara ka mas sipaddai, kele siripot uluiet sipatoilat Tuhan kai Mose.

Pasiriokatda tai Lewi

⁵ Kuanangan si Tuhan kai Mose,

⁶ “Saraake le tai Lewi ka talagatda tai Israel samba galainungan enungan punen nulinaake sia

⁷ ka enungan kele nene: So'soake ka tubutda oinan addeat enungan pasilina samba koiniakenungan sia rakirit sangaliot tubutda samba rataptap bibiletda. Kalulut kisedda malinarangan.

⁸ Lepa koiniakenungan sia masiala sangamuneng jaui simateu sibau samba buluakenen komen sibara ka tapung sigalu tula. Lepa alanungan sangamuneng jaui simanteu bagei addeat buluakenen pasiappet jo.

⁹ Lepa geti koiniakenungan sangamberi paamian Israel samba koiniakenungan tai Lewi murio ka matat SapouKu.

¹⁰ Bui' ta ragalakake kabeira sapaamian Israel ka utera tai Lewi,

¹¹ Lepa panguruatakenangan tai Lewi si Aron sibailiu panguruat sikokoi sibara ka tai Israel ka tubuKu, bule ioi ragalai galaiakenen imam.

¹² Lepa galakakerangan kabeira tai Lewi ka utet rua ngamuneng jaui simanteu nenda, sangamuneng buita tupanguruatake addeat buluakenen pasiappet jo, sangamuneng addeat buluakenen rarangen. Ka bagat enungan punen nenda itupalina tai Lewi.

¹³ Kokoiake le tai Lewi addeatKu samba koiniakenungan sia masipuuku si Aron samba tatogania.

¹⁴ Ka bagat enungan punen nenda saraakenungan tai Lewi ka talagatda tai Israel sabagei, bule ibailiu sia bakkatKu.

¹⁵ Lepa nugalaiake enungan punen pasisesegeake tai Lewi nenda, iapeite ioi rapugalai ka SapouKu.

¹⁶ Akubailiuakean sia silit sangamberi tatogatda tai Israel taimanteu sikebbukat, oto sia iate sikokoi addeatKu.

¹⁷ Ka teteret Akumateiake sangamberi tatoga sikebbukat ka Misir, tatoga sikebbukat sibara ka senen lalep ka tai Israel samba senen tarimeu sipututu'tu mata siboiki Akukokoiakean ibailiu bakkatKu.

¹⁸ Kineneiget sibailiu silit sangamberi togatda simanteu sikebbukat tai Israel, Kuala tai Lewi,

¹⁹ samba tai Lewi nenda segakekungan sia kai Aron samba ka tatogania, bule ioi rapugalai addeatda tai Israel ka bagat SapouKu. Samba leu bule ratiddou Kuappeake sia bangsa Israel bule ta iorak sia pugejaat baga ke bulat ralegreake tubutda ka kudduat sipunenan nenda.”

²⁰ Kalulut nenda si Mose, si Aron samba sangamberi paamian Israel masipanguruatake tai Lewi ka tubuKu, kele siparentaakenen Tuhan kai Mose.

²¹ Tai Lewi nenda masigalaiaake enungan punen pasilinat tubu samba masitaptap bibiletda, lepa si Aron masipanguruatake sia sibailiu kaunen sikokoi kai Tuhan. Galaiakenangan enungan punen pasilinat tubu addeat.

²² Galaiakerangan tai Israel sangamberi siparentaakenen Tuhan sisegeakenenNia kai Mose pagalaiat tai Lewi. Kalulut kisedda bara gegetda rapugalai ka bagat Sapou Tuhan, iuteake sia iate si Aron samba tatogania.

²³ Kuanangan si Tuhan kai Mose,

²⁴ “Senen tai Lewi sipurura rua pulu lima ngarura kapata, bui' ragalaiake pupasikelananda ka bagat SapouKu,

²⁵ samba ke ailingan rurania lima pulu belaakenia ka galajet nenda.

²⁶ Ka lepat nenda momoi iropake tai Lewi sipugagalai ka bagat SapouKu, tapoi ta'an momoi iukkaake pupasikelanan nenda. Kisedda te enungan tupasikeli galajetda tai Lewi.”