4Mos. 6 - BUKO SIPUNENAN

Surukat pagalaiat masikokoiake tubu kai Tuhan

¹ Kuanangan si Tuhan kai Mose:

² “Panibo le' ka tai Israel samba kua katubutda: Ke'bai sara sirimanua, taimanteu ele tainanalep, sigalai palelengan simakokoi, iate palelengan sara pagugulet Tuhan, ikokoiake purimanuaiatnia kai Tuhan,

³ oto buita iareuake tubunia ka anggur samba mulo simapuinengen, bui ilo anggur simalaga' ele lo' simalaga' simapuinengen samba bui ilo bagei simapuinengen sigalai sibara ka anggur, samba bui ikom buat anggur, buat anggur sibau ele simagarak.

⁴ Ujut ikokoiake tubunia kai Tuhan ta' momoi ikom buat anggur sibau ele simagarak, ele apapa bagei sibara ka loinat anggur, luikunia ele roronia leu ta momoi ikomnia.

⁵ Burut ikokoiake tubunia kai Tuhan ta' momoi isapu alainia. Burunia nenda alai samba bulut ngungunia buita iobaake iputu'tu' simananta. Iapra le nia palelengannia teret iaili gogoi pasikokoiat tubunia kai Tuhan.

⁶ Alainia nenda iate toggaiat atukokoiakeania kai Taikamanua.

⁷ Burut kapalelengannia ta momoi ilolitake tubunia, ta momoi ilegreake tubunia ka tubut sirimanua simamatei, kenanen tubut simamatei nenda ukkuinia, inania ele sasarainania.

⁸ Burunia sara sipaguguletake tubu kai Tuhan, nia iate sikokoiakenen addeat Tuhan.

⁹ Ke alai sara sirimanua sipaguguletake tubunia kai Tuhan silepa kokoiake ibailiu malolit kalulut ainia ka bebet sara sirimanua simamatei sinulut, oto buita ingena pitu ngagogoi burunia, lepa nenda buita isapu alainia samba bulut ngungunia, iapeite ibailiunia simalina.

¹⁰ Ka gogoi sikabalunia buita iabit rua ngamuneng uma ngorut ele limendeu ka tai imam ka matatbaliu Sapou Tuhan.

¹¹ Bui' ta ipanguruatake si imam sangamuneng uma addeat pasiappet jo, samba sangamuneng addeat buluakenen rarangen katukaunannia pasitatat pulolinannia. Ka gogoi nenda leu et buita ikokoiake minca alainia kai Tuhan

¹² samba ibaugi sesegeakena tubunia sibaliu sipaguguletake tubu kai Tuhan. Oggak gogoi situsasabau, ta'an tuaadde minca kalulut aipalolitan tubunia. Sibailiu buluakenen silit rugi, bui ta ipanguruatake sangamuneng biribiri sipurura sangarura.

¹³ Ke aiailingan tetere palelengan sara sirimanua sipasiguguletake tubunia kai Tuhan, bui' tugalaiake enungan punen nene. Sirimanua nene bui'ta tutaroake ka matatbaliu Sapou Tuhan

¹⁴ samba abbitnangan kai Tuhan telu ngamuneng tarimeu sita' anai katai tubu, sangamuneng togat biribiri simanteu sipurura sangarura addeat buluakenen rarangen, sangamuneng togat biribiri sinanalep sipurura sangarura addeat buluakenen pasiappet jo, samba sangamuneng biribiri simanteu addeat buluakenen paabanan.

¹⁵ Bui' ta ipanguruatake leu et sangagaraga' roti sita' anai pusioman, iate roti simamuine sigalai sibara ka tapung sigalu tulat zaitun, samba kue simanimpi siloloiji tulat zaitun. Samba leu bagei buita ipanguruatake buluakenen komen buluakenen loket.

¹⁶ Sangamberinia nenda buita iabit si imam ka matat Tuhan, lepa panguruatakenangan buluakenen pasiappet jo samba buluakenen rarangen.

¹⁷ Pasamba sangagara'ga roti nenda, buita ipanguruatake biribiri simanteu nenda kai Tuhan sibailiu buluakenen paabanan. Samba leu buluakenen komen samba buluakenen loket nenda bui' ta tupanguruatake kai Tuhan.

¹⁸ Sirimanua sipaguguletake tubunia kai Tuhan nenda buita isapu alainia ka matatbaliu Sapou Tuhan, samba ribbaiakenangannia ka obengan kudduat buluakenen paabanan ka teteret ailalabo buluakenen nenda.

¹⁹ Lepa nenda, ke atuseuan bakkapat biribiri kamata, bui' iala si imam samba galakakenangannia simakere pasamba roti simamuine samba sara kue simanimpi sibara ka gara'ga nenda, ka kabei sirimanua sipaguguletake tubunia kai Tuhan.

²⁰ Lepa si imam buita ipatoila komen nenda sibailiu panguruat sikokoiakenen kai Tuhan, nenda iate rubeiat sipunenan sibailiu rubeiat imam, samba leu ru'rukat samba bakkapat biribiri simanteu siripot aturan ibailiu rubeiat imam. Lepa nenda iapeite momoi ilo anggur sirimanua sipaguguletake tubunia kai Tuhan.

²¹ Nene te aturan addeat ka sirimanua sipaguguletake tubunia kai Tuhan, tapoi ke sara sirimanua sipaguguletake tubunia kai Tuhan mapalelekake buluakenen sisaliu enungakenen palelengannia, buita igalaiake kele sipalelekakenennia.

Tiboiet panukanan imam

²² Koiniakenangan si Mose si Tuhan

²³ isegeake kai Aron samba ka tatogania, buita rangangaake tiboiet nene ka teteret rapanukani bangsa Israel:

²⁴ Bule ipanukani samba ipasikeli ekeu si Tuhan.

²⁵ Bule maeru bagaNia si Tuhan samba maaggai baga ka tubumui.

²⁶ Bule ipununtuki kam baga si Tuhan samba iake aban ka kam.

²⁷ Samba kuanangan si Tuhan, “Ke rakua oningKu sibailiu panukanan ka bangsa Isarel, iageti sukatakekungan leu sia.”