4Mos. 36 - BUKO SIPUNENAN

Ikepmakenendra tainanalep siputatalimou

¹ Sia saute ka bagat lalep ka muntogat Gilead, togat Makhir, iate punuteteu Manasye, togat Josep, mei kai Mose samba ka sikebbukat laggai ka Israel.

² Kuarangan, “Aikoiniake ekeu si Tuhan masirubeiake polak ka tai Israel ka enungan masigalai pauktungan. Nia leu et ikoiniake ekeu nukau polak ikepmakenen sarainamai si Zelafehat ka tatogania tainanalep.

³ Tapoi buita nurepdep, ke mutalimou sia ka taimanteu sibara ka suku bagei, polakdra bakkatirangannia suku nenda. Oto polak siteuakenen sibailiu kupkumenmai belekinangannnia.

⁴ Ka bagat Rura Pasitoiliat, ka teteret sangamberi pukayoat sisakiakenen tutoiliake ka sibakkatnia siboiki, polakdra tatogat Zelafehad tainanalep nenda bailiunangannia bakkatdra taimanteura, bailiu belekinangan polak sukumai.”

⁵ Lepa segeakenangan si Mose parenta nene ka tai Israel, “Aisesengan sikuatdra muntogat Josep,

⁶ samba kalulut nenda kuanangan si Tuhan, tatogat Zelafehad tainanalep momoi raputalimou ka siobakat bagatdra, tapoi buita ka simakere sukutdra.

⁷ Senen polak ikepmakenendra tai Israel ibailiu le nia bakkat sukunia.

⁸ Senen tainanalep siikepmake polak ka talagat sara suku bangsa Israel, buita italimouake sirimanua sibara ka suku nenda leu et. Bailiunangan tai Israel masiikepmake polakdra taikebbukatdra,

⁹ kalulut polak ikepmakenendra nenda ta momoi iei ka suku bagei. Senen bangsa Israel masibakkati polak ikepmakenendra.

¹⁰ Oto siripot parentat Tuhan kai Mose, ka lima tainanalep tatogat Zelafehad nenda,

¹¹ iate si Mahla, Tirza, Hogla, Milka samba si Noa mutalimou ka sasarainan ukkuira.

¹² Talimouakerangan sibara ka muntogat ka suku bangsa Manasye, togat Josep. Bailiunangan polak ikepmakenendra mariuriu rabakkatinia suku bangsa ukkuira.

¹³ Nenda te enungakenen samba siteuakenen siake Tuhan ka bangsa Israel sikauNia kai Mose, ka teteret tai bangsa Israel ai sia ka polak simagaktuk ka Moab ka bebet bagat oinan Jordan, legret Jerikho.