4Mos. 35 - BUKO SIPUNENAN

Palaggai-laggai bakkatdra tai Lewi

¹ Kuanangan si Tuhan kai Mose ka polak simagaktuk ka Moab ka bebet bagat oinan Jordan ka legret Jerikho,

² “Segeake ka bangsa Israel, sibara ka polak ikepmakenendra siloketdra nenda, piga pa laggai pasamba se'se simalio ka bebenia buita rakau ka tai Lewi bule ioi rakuddu sedda.

³ Sangamberi laggai nenda bakkatdra tai Lewi addeat pulaggaiatdra. Polak su'su simaturuturu ka bebenia iate addeat sangamberi tarimeura.

⁴ Liot polak su'su simaturuturu nenda sangaribu ngeto ka senen matat rusa, tukireki barania ka irip laggai.

⁵ Oto kupkumen laggaira tai Lewi putubuatnia siepat tuddak, kirekatnia ruanga ribu ngaeto senen taimingnia, pasamba laggai ka talagania.

⁶ Buita nukau kam ka tai Lewi enem laggai pulippunan sibailiu kudduat eijanandra sirimanua simateiake sirimanua sabagei sitaipapaliket baga. Samba leu buita rakau ka tai Lewi epat pulu rua laggai bagei

⁷ pasamba polak su'su simaturuturu. Oto sangamberinia ai epat pulu balu laggai bakkatdra tai Lewi.

⁸ Sangamberi laggaira tai Lewi ka bagat kupkumen senen suku Israel buita nukau kam siripot iginia laggai samba lionia kupkumen laggai nenda.”

Laggai pulippunan

⁹ Koiniakenangan si Mose si Tuhan

¹⁰ masisegeake ka bangsa Israel tiboiet kele nene, “Lepat nutalipoki kam bagat oinan Jordan samba nuguruki kam kupkumen laggai Kanaan,

¹¹ buita nupili kam laggai pulippunan, bule sirimanua simateiake sirimanua sabagei taipapaliket baga, momoi iei sedda.

¹² Ka laggai nenda maamannia sirimanua nenda ka sasarainan simateiakenennia sioba masiala lumun. Kalulut sirimanua sisuksukdra simateiake sirimanua sabagei, ta momoi tumateiake ke ta'pei tuabbitnia patiboat ka paamian itupakaroake.

¹³ Pili kam enem laggai pulippunan,

¹⁴ telu ka saigit kabelaiat sulu bagat oinan Jordan samba telu ka polak Kanaan.

¹⁵ Ka enem laggai nenda ibailiu laggai pulippunanmui, tai Israel samba siooiake ele siturerere mukuddu ka talagamui. Kasei simateiake sirimanua sabagei taipapaliket baga, momoi iei ka sara laggai nenda.

¹⁶ Tapoi ke imateiake sirimanua nenda ipakei laba masimateiake sirimanau nenda, oto nia te sipamamatei, buita matei sipamamatei nenda.

¹⁷ Samba ke imateiake sirimanua nenda ipakei bukku masimateiake sirimanua nenda, oto nia te sipamamatei, buita matei sipamamatei nenda.

¹⁸ Ele ke imateiake sirimanua nenda ipakei loina masimateiake sirimanau nenda, oto nia te sipamamatei, buita matei sipamamatei nenda.

¹⁹ Sasarainan simalegre ka sirimanua simateiakenen nenda momoi igalaiake ukum simateiakenen. Ke iaili sipamamatei nenda, momoi imateiakenia.

²⁰ Ke sara sirimanua masipulagaki baga sirimanua sabagei, lepa mateiakenangannia imomoakenia ele ibaijuknia sipalit bagania,

²¹ ele ibukkunia pasamba bubuku, sirimanua nenda iate sipamamatei, maselenia samba buita tuukumnia simateiakenen. Sasarainan simalegre ka tubut simateiakenen nenda momoi igalaiake ukum simateiakenen. Ke iaili sipamamatei nenda, momoi imateiakenia.

²² Tapoi momoi ipuaili sara sirimanua ta sipalit bagania imateiake sirimanua sabagei sitaipulagakietnia baga, ele ibaijukake ka tubunia apapa.

²³ Ele sara sirimanua ta anai iitco, beleakenangan sara bukku bailiu matei sirimanua sabagei ta saggaknia, samba ta anai pinatunia masimateiake sirimanua nenda.

²⁴ Ka pagalaiat kele nene buita patiboat ka paamian masipakaroake sirimanua sipamamatei, samba sioba masiala lumun kamateiat sirimanua simamatei nenda.

²⁵ Samba buita patiboat paamian masibelaake sipamamatei ka kabeira sipasila lumun, samba buita patiboat paamian masitoiliakenia ka laggai pulippunan, ka kudduat pulippunannia, sedda te ikukuddu teret matei imam sabeu sisukatnakenen pasamba tula sipunenan.

²⁶ Tapoi ke muaili, belania sipamamatei nenda ka pasongan laggai pulippunan, kudduat pulippunannia,

²⁷ samba ailirangannia sipasiala lumun nenda ka ujat pasongan laggai pulippunannia, samba mateiakerangannia sipasiala lumun nenda, oto ta'an muutaknia logau

²⁸ kalulut buita mukuddu sipamamatei nenda ka laggai pulippunan teret matei imam sabeu, tapoi ke amateian imam sabeu momoian itoili sipamamatei nenda ka laggainia.

²⁹ Nenda sangamberinia buita ibailiu galaiakenenmui ka sanganantania ka sangamberi kudduatmui.

³⁰ Ka pagalaiat pamamatei, sirimanua sisuksuk sibailiu sipamamatei, sarat momoi ituseleakenia samba tuukumake simateiakenen ke sigalainia nenda momoi rapoiliatnia rua sipasimuneng ele legei. Tapoi sara sipasimuneng ta'pei momoi tuseseake panungsungan nenda sibulatnia.

³¹ Sara sipamamatei buita tuukum simateiakenen. Ta' momoi ikau bulagat masitebui ukuman nenda.

³² Ke sara sirimanua masituituiake tubunia iei ka sara laggai pulippunan, bui' nuobaake kam ikau bulagat bule tuobaake itoili ka lalepnia ke ta'pei amatei Imam sabeu.

³³ Ke nugalaiake kam kisedda, masipalolit polak kudduatmui le anugalai kam. Pamamatei masilolitnake laggai, oto ta anai enungan bagei masilinaake laggai nenda, sarat sara le' enungan bule imaaban laggai nenda iate masimateiake sirimanua sipamamatei nenda.

³⁴ Bui' nupalolit kam laggai kudduijietmui, kalulut Aku le Tuhan, samba Aku mukuddu ka talagat bangsa Israel.”