4Mos. 34 - BUKO SIPUNENAN

Sangamberi pasongan kupkumen laggai Kanaan

¹ Kaunangan si Tuhan kai Mose

² sangamberi parenta nene ka bangsa Israel, “Ta'an mauju nuguruki kam kupkumen laggai Kanaan, laggai akenenKu ka tubumui sibailiu ikepmakenenmui. Nene te sangamberi pasongan kupkumen laggaimui nenda.

³ Saigit kaiaman, pasongan nenda barania ka simatangeu Zin siriringi Edom. Ka kabelaiat sulu barania ka tu'tut isit kaiaman Koat Simamatei,

⁴ biluk ka kaiaman siaili ka Enungan Akrabim samba riuriu ka Zin teret ka Kadesh-Barnea ka isit kaiaman. Barania sedda biluk ka sikaleleu teret ka Hazar-Adar, samba riuriu ka Azmon.

⁵ Sedda biluk ka su'su ka pasongan Misir samba kapplu ka Koat Tengah.

⁶ Koat Tenga iate pasongan kupkumen laggaimui ka isit sikalelelu.

⁷ Ka bare, pasongan nenda barania ka Koat Tenga siaili ka leleu Hor

⁸ samba barania sedda ka Enungan Hamat, lepa riuriu ka Zedad

⁹ samba ka Zifron samba kapplu ka Hazar-Enan.

¹⁰ Ka sikalaut, pasongan nenda barania ka Hazar-Enan ka Sefam.

¹¹ Barania sedda gorosot ka Ribla ka isit sikalaut Ain, lepa riuriu ka simaleleu ka bebet koat isit sikalaut Danau Galilea,

¹² lepa ka kaiaman sanganantat bagat oinan Jordan teret ka Koat Simamatei.

¹³ Kuanangan si Mose ka bangsa Israel, “Nenda te polak siloketmui ka enungan masigalai pauktungan, polak kele siparentaakenen Tuhan buita turubeiake ka tubutdra siba sitenga suku bangsa Israel.

¹⁴ Sangamberi suku Ruben samba Gad samba leu sitenga sibara ka suku Manasye arasiloan rubeiatdra, samba polak nenda leu aturubeiakean ka sangamberi muntogatra.

¹⁵ Polak ikepmakenendra nenda ka isit sikalaut bagat oinan Jordan ka lagret laggai Jerikho.”

Sia saute sikoiniakenen sipasirurubeiake polak

¹⁶ Kuanangan si Tuhan kai Mose,

¹⁷ “Sipasirurubeiake polak nenda ka talagamui iate Imam Eleazar, samba si Josua togat Nun.

¹⁸ Sau'sau leu kam sara siuteake sibara ka senen suku sipasiropmake si Eleazar samba si Josua masirubeiake polak nenda.”

¹⁹ Nene te sangamberi oninda: sibara ka suku Jehuda: si Kaleb togat Jefune,

²⁰ sibara ka suku Simeon iate si Samuel togat Amihud,

²¹ sibara ka suku Benjamin iate si Elidad togat Kislon,

²² sibara ka suku Dan sara saute iate si Buki togat Jogli,

²³ sibara ka totogat Josep, iate sibara ka suku Manasye sara saute iate si Haniel togat Efod,

²⁴ samba sibara ka suku Efraim sara saute iate si Kemuel togat Siftan,

²⁵ Sibara ka suku Zebulon sara saute iate Elisafan togat Parnah,

²⁶ sibara ka suku Isakhar sara saute iate Paltiel togat Azan,

²⁷ sibara ka suku Asyer sara saute iate Ahihud togat Selomi,

²⁸ sibara ka suku Naftali sara saute iate Pedael togat Amihud.

²⁹ Iate sangamberi siparentaakenen Tuhan sipasirubeiake polak ikepmakenendra tai Israel ka kupkumen laggai Kanaan.”