4Mos. 33 - BUKO SIPUNENAN

Puenunganan barania ka Misir siei ka Moab

¹ Nene te sangamberi kudduat puariadra tai Israel, lepat arabela baratdra ka Misir, senen saladdudra, ka paneneiat Mose samba si Aron.

² Parentaakenangan si Mose si Tuhan masisurat onin senen kudduat puariatdra.

³ Arakaddiuake Misir tai bangsa Israel ka gogoi sikapulu lima ka laggo sara, sangagogoi lepat Paskah siboiki. Ka bagat paroman Tuhan kaddiuakerangan laggai Rameses, airaitco sabangsa Misir,

⁴ airarateiake tatogatdra sikebbukat simateiakenen Tuhan. Ka bagat sipuaaili nenda, si Tuhan masipakoinong Nia peile maron ka sangamberi taikamanuandra tai Misir.

⁵ Lepat arakaddiuake Rameses tai Bangsa Israel, pusapourangan ka Sukot.

⁶ Lepa tuitui sia minca samba pusapourangan ka Etam, ka bebet simatangeu.

⁷ Baratdra sedda toili sia ka Pi-Hahirot, ka isit kabelaiat sulu Baal-Zefon, lepa pusapourangan ka be'bet Migdol.

⁸ Iageti kaddiuakerangan Pi-Hahirot, masitalipoki koat samba guru' sia ka simatangeu Etam, lepat telu ngagogoi puenunganan, pusapourangan ka Mara.

⁹ Baratdra sedda riuriuakerangan musapou ka Elim, ai sedda pulurua bubuakat oinan samba pitu loinat kurma.

¹⁰ Iageti kaddiuakerangan Elim samba musapou ka be'bet Koat Tiberau.

¹¹ Tuitui sia baratdra ka Koat Tiberau, lepa pusapourangan ka simatangeu Sin.

¹² Tuitui sia baratdra ka simatangeu Sin, lepa pusapourangan ka Dofka.

¹³ Tuitui sia baratdra ka Dofka, lepa pusapourangan ka Alus.

¹⁴ Tuitui sia baratdra ka Alus, lepa pusapourangan ka Rafidim, samba sedda ta anai oinan loketdra bangsa nenda.

¹⁵ Tuitui sia baratdra ka Rafidim, lepa pusapourangan ka simatangeu ka Sinai.

¹⁶ Tuitui sia baratdra ka simatangeu Sinai, lepa pusapourangan ka Kibrot-Taawa.

¹⁷ Tuitui sia baratdra ka Kibrot-Taawa, lepa pusapourangan ka Hazerot.

¹⁸ Tuitui sia baratdra ka Hazerot, lepa pusapourangan ka Ritma.

¹⁹ Tuitui sia baratdra ka Ritma, lepa pusapourangan ka Rimon Peros.

²⁰ Tuitui sia baratdra ka Rimon-Peros, lepa pusapourangan ka Libna.

²¹ Tuitui sia baratdra ka Libna, lepa pusapourangan ka Risa.

²² Tuitui sia baratdra ka Risa, lepa pusapourangan ka Kehelata.

²³ Tuitui sia baratdra ka Kehelata, lepa pusapourangan ka Har-Syafer.

²⁴ Tuitui sia baratdra ka Har-Syafer, lepa pusapourangan ka Harada.

²⁵ Tuitui sia baratdra ka Harada, lepa pusapourangan ka Makhelot.

²⁶ Tuitui sia baratdra ka Makhelot, lepa pusapourangan ka Tahat.

²⁷ Tuitui sia baratdra ka Tahat, lepa pusapourangan ka Tarah.

²⁸ Tuitui sia baratdra ka Tarah, lepa pusapourangan ka Mitka.

²⁹ Tuitui sia baratdra ka Mitkah, lepa pusapourangan ka Hasmona.

³⁰ Tuitui sia baratdra ka Hasmona, lepa pusapourangan ka Masoret.

³¹ Tuitui sia baratdra ka Masoret, lepa pusapourangan ka Bene-Jaakan.

³² Tuitui sia baratdra ka Bene-Jaakan, lepa pusapourangan ka Hor-Gitgad.

³³ Tuitui sia baratdra ka Hor-Gitgad, lepa pusapourangan ka Jotbata.

³⁴ Tuitui sia baratdra ka Jotbata, lepa pusapourangan ka Abrona.

³⁵ Tuitui sia baratdra ka Abrona, lepa pusapourangan ka Ezion-Geber.

³⁶ Tuitui sia baratdra ka Ezion-Geber, lepa pusapourangan ka simatangeu Zin, iate Kadesh.

³⁷ Tuitui sia baratdra ka Kadesh, lepa pusapourangan ka leleu Hor, ka pasongan polakdra tai Edom.

³⁸ Siripot parentat Tuhan, panatranangan si Aron ka leleu Hor, samba sedda mateinia ka gogoi sikasara laggo lima ka rura sikaepat pulu kalepat arakaddiuake Misir tai Israel.

³⁹ Ka teteret aimatei, sangotu telu pulu limangarurania si Aron.

⁴⁰ Ka teteret nenda rimata kupkumen laggai Arad, ka polak Negeb, Kanaan isit kaiaman, arepnangan katuagaiat airaailiake kupkumen laggainia tai Israel.

⁴¹ Tuitui sia baratdra ka leleu Hor, lepa pusapourangan ka Zalmona.

⁴² Tuitui sia baratdra ka Zalmona, lepa pusapourangan ka Funon.

⁴³ Tuitui sia baratdra ka Funon, lepa pusapourangan ka Obot.

⁴⁴ Tuitui sia baratdra ka Obot, lepa pusapourangan ka bebet karaganan ka Abarim ka kupkumen laggai Moab.

⁴⁵ Tuitui sia baratdra ka karaganan nenda, lepa pusapourangan ka Dibon-Gad.

⁴⁶ Tuitui sia baratdra ka Dibon-Gad, lepa pusapourangan ka Almon-Diblataim.

⁴⁷ Tuitui sia baratdra ka Almon-Diblataim, lepa pusapourangan ka simaleleu Abarim ka matat Nebo.

⁴⁸ Tuitui sia baratdra ka simaleleu Abarim, lepa pusapourangan ka polak simagaktuk Moab ka bebet oinan Jordan ka bebet Jerikho.

⁴⁹ Pukemandrangan ka be'bet bagat oinan Jordan, barania ka Bet-Jesimot pat aili ka Abel-Sitim ka polak simagaktuk ka Moab.

⁵⁰ Ka polak simagaktuk ka Moab nenda, ka bebet Gabat Oinan Jordan, legret laggai Jerikho, kaunangan si Tuhan kai Mose

⁵¹ sangamberi parenta nene ka bangsa Israel, “Ke nutalipoki kam bagat oinan Jordan nutuguru' kam ka kupkumen laggai Kanaan,

⁵² buita nukekle kam sangamberi sipulalaggai ka kupkumen laggai nenda. Subuake kam sangamberi bulungandra sigalai sibara ka bukku samba ka logam samba leu sangamberi kudduat panindogatdra.

⁵³ Polak nenda buita nuala samba nukudduiji kam, kalulut Aku masiake ka tubumui.

⁵⁴ Iageti buita nurubeiake kam ibailiunia ikepmakenendra samuntogatmui ka enungan masigalai pauktungan. Ka tubutdra muntogat sabeu buita nukau kam rubeiat sabeu, samba muntogat sigoiso, rubeiatdra sigoiso.

⁵⁵ Tapoi ke ta noba kam masikekle sipulalaggai sedda, sangamberi sirimanua siturerere mukuddu sedda masipaoreiji kam kele ngai ka matamui ele rui ka reremui. Sia te geti masisasaggangi kam.

⁵⁶ Ka ta nukekle kam sia, subuakekungan kam kele sipinaatukKu ka tubutdra.”