4Mos. 32 - BUKO SIPUNENAN

Sangamberi suku bangsa Israel ka isit kabelaiat sulu bagat oinan Jordan

¹ Sangamberi suku Ruben samba Gad ai tarimeura simigi. Ka teteteret araitco bulat erunia polak Jaezer samba polak Gilead addeat putarimeugat,

² ei sia kai Mose samba kai imam Eleazar, samba leu ka sikebbukat laggai bagei sibara ka Israel. Kuarangan,

³ “Polak sangamberi laggai Atarot, Dibon, Jaezer, Nimra, Hesybon, Eleale, Sebam, Nebo samba Beon

⁴ laggai sikalaakenendra tai Israel kalulut paroman Tuhan, bulat maeru putarimeugat. Samba kalulut bulat maigi tarimeumai,

⁵ panindogatmai bule polak nene tuake ka kai ibailiunia bakkatmai. Bui' nukoiniake kai kuei kai ka silat bagat oinan Jordan.”

⁶ Aleginangannia si Mose, “Kipa galainia nukukuddu kam sene, beringan sabangsamui mei sia pasaggak?

⁷ Angoi nuoba kam masigalai ramaloto bangsa Israel masipatalipoki bagat oinan Jordan samba tuguru ka kupkumen laggai akenen Tuhan ka tubutdra?

⁸ Saukkuimui kisedda leu et aragalai, ka teteret akukoiniake sia baratdra ka Kades-Barnea raei masigejengi kupkumen laggai nenda.

⁹ Asegean sia ka Peleu Eskol samba leu araitcoan polak nenda. Tapoi ka teteret aratoli, galairangan pulotokat ka bangsa Israel, bailiu taiobarangan mei ka kupkumen laggai akenen Tuhan ka tubutdra.

¹⁰ Iageti ka teteret nenda pugolunangan si Tuhan bailiu kuanangan, “Sangamberi sirimanua nenda ta mariuriu topitdra ka tubukKu. Kalulut nenda musuppa Aku,

¹¹ sibara ka talagatdra sipururura rua pulu ngarura kapata ka teteret arakaddiuake Misir, ta anai siguruki kupkumen laggai sipalelekngakenenKu kai Abraham, Ishak samba kai Jakob.”

¹² Sangamberi sirimanua iorak ukuman nenda, tapoi si Kaleb togat Jefune, tai Kenas, samba si Josua togat Nun ta iorak sia, kalulut ruadra mariuriu topitdra kai Tuhan.

¹³ Kalulut nenda pugoluangan si Tuhan ka bangsa Israel, bailiu obaakenangan rapujaujau ka simatangeu epat pulu ngarura burunia pat aili ka reddenan sigalai sikatai ka tubuNia matei sia sangamberitdra.

¹⁴ Samba kineneiget, nugalai kam taimareddet kele sangamberitdra saukkuimui! Kirenangan kam mungkuat sirimanua sijo sibaraake golut Tuhan sabeu ka bangsa Israel!

¹⁵ Ke nukateiteiake kam si Tuhan, obaakenangan bangsa nene ramaburu ka simatangeu, samba kam le aibaraake katusubuatdra!”

¹⁶ Iageti sangamberi tai Ruben samba tai Gad nenda legreakerangan tubutdara kai Mose samba kuarangan, “Kurioake kai boiki geli sibara irip kudduat biribirimai, samba sangamberi laggai sibara irip addeat tatoga samba tainanalepmai.

¹⁷ Iageti matarekmaian mei pasaggak sambamai sasarainamai. Kai masiuteake pasaggangan nenda samba masiabbit sia masiguruki kupkumen laggai sibailiu bakkatdra. Oto tatoga samba tainanalepmai momoi rakuddu sene, ka laggai sibara irip bukku, simaaman ka saggak sikuddu ka laggai nene.

¹⁸ Ta' totoili kai ka lalepmai ke' ta'pei anai polak ikepmakenendra sangamberi tai Israel.

¹⁹ Ta' koba kai masisilo beri goiso polakdra ka silat bagat oinan Jordan, kalulut akusiloan kai rubeiatmai sene, ka isit ka belayat sulu bagat oinan Jordan.”

²⁰ Aleginagannia si Mose, “Ke bulatnia mataerek kam obamui pasaggak addeat Tuhan,

²¹ samba sangamberi ka talagamui sioi pasaggak masitalipoki bagat oinan Jordan, samba iuteake kam si Tuhan masisaggangi tai saggak pat subuakenangan sia si Tuhan,

²² bailiu kupkumen laggai nenda murekkuk ka tubuNia, iageti momoi nutoili kam, samba belaakenangan kam ka galaiakenenmui kai Tuhan samba ka sasarainamui, samba akenangan polak si Tuhan ka isit kabelaiat sulu sibaliu bakkatmui.

²³ Tapoi reddet kam, ke tanugalaiake kam palelenganmui, majomuian kai Tuhan samba ukumakenangan kam kalulut jomui.

²⁴ Kenan kam masirioake laggai samba gelit biribirimui, samba bui' nukalipogi kam apa sipalelekngakenenmui nenda!”

²⁵ Lepa kuarangan tai Gad samba tai Ruben, “Tuan, kugagalaiake kai apa siparentaakenen Tuan.

²⁶ Tatoga samba tainanalepmai samba tarimeumai jaui samba leu biribirimai mukuddu senen, ka laggai Gilead.

²⁷ Tapoi kai nene matarek mei pasaggak Tuhan utemai. Talipokimaian bagat oinan Jordan samba pasaggakmaian kele sikuat Tuan.”

²⁸ Iageti Kaunangan parenta nene si Mose kai Imam Eleazar, kai Josua samba ka sikebbukat laggai Israel,

²⁹ “Ke ratutnake perentat Tuhan tai Gad samba tai Ruben samba ratalipoki bagat oinan Jordan addeat pasaggak, samba ke kalulut roropmakemui sia le ioi rakalaake kupkumen laggai nenda, iageti polak Gilead buita nukau kam ka tubutdra sibailiu bakkatdra.

³⁰ Tapoi ke ta ratalipoki bagat oinan Jordan raei pasaggak sambamui, oto buita rasilo rubeiat polak ikepmakenendra ka laggai Kanaan, kele ka kam.”

³¹ Lepa kuarangan tai Gad samba tai Ruben, “Tuan, kugagalaiake kai apa siparentaakenen Tuan.

³² Ka bagat paneineiat Tuhan talipokimaian kupkumen laggai Kanaan samba ei kai pasaggak, tapoi polak ka isit kabelaiat sulu bagat oinan Jordan buita ibailiunia bakkatmai.”

³³ Iageti kaunangan si Mose ka sangamberi suku Gad samba suku Ruben samba ka sitenga suku Manasye sangalio kupkumen Sihon, rimatatdra tai Amori, samba kupkumen Og, rimatadra tai Basan, kisedda leu sangamberi laggai samba polak ka be'benia.

³⁴ Suku Gad masirioake minca laggai Dibon, Aratot, Aroër,

³⁵ Atarot-Sofan, Jaezer, Jogbeha,

³⁶ Bet-Nimra, samba Bet-Haran sibailiu laggai sipuirip bukku sibailiu kudduat gelit biribiri.

³⁷ Suku Ruben masirioake minca laggai Hesybon, Eleale, Kiryataim,

³⁸ Nebo, Baal-Meon, samba Sebam. Sangamberi laggai sirioakenendra minca nenda silirangan oninia.

³⁹ Muntogat Makhir, togat Manasye, saggangirangan polak Gilead, lepa alarangannia samba keklerangan tai Amori sikukuddu sedda.

⁴⁰ Kalulut nenda kaunangan si Mose polak Gilead nenda ka tubutdra samuntogat Makhir, samba kuddurangan leu sedda.

⁴¹ Jair, sibara ka suku Manasye, saggangirangan samba alarangan piga pa desa, lepa oniakerangannia “Desa-desa Jair”.

⁴² Sagganginangan si Nobah samba alanangan Kenat samba leu sangamberi laggai sigoiso ka be'benia, lepa oniakenangannia Nobah, kele oninia.