4Mos. 31 - BUKO SIPUNENAN

Pasaggangan pasiala lumun ka tai Midian

¹ Kuanangan si Tuhan kai Mose,

² Galaiake pasiala lumun ka tai Midian karena apa sigalaiakenendra ka bangsa Israel. Lepa nenda matei ekeu.”

³ Lepa kuanangan si Mose ka bangsa Israel, “Patarek kam tubumui pasaggak, nusasagangi te kam tai Midian addeat masigalaiake ukuman Tuhan ka tubutdra.

⁴ Senen sibara ka suku Israel, buita nutarekngake sangaribu saladdu siei pasaggak.”

⁵ Iageti tupili sangaribu sia sibara ka suku bangsa Israel, taddera sangamberidra pulu rua ngaribu sia simatarek pasaggak.

⁶ Koiniakenangan sia si Mose pasaggak pasambatdra si Pinehas togat Imam Eleazar. Si Pinehas masiabbit bibilet sipunenan samba sangamberi trompet addeat masikau toggaiat.

⁷ Siripot parentat Tuhan kai Mose, saggangirangan tai Midian tai Israel samba mateiakerangan sangamberi taimanteu,

⁸ kisedda leu rimata Midian, iate Ewi, Rekem, Zur, Hur samba Reba. Si Bileam, togat Beor, mateiakerangan sia.

⁹ Sangamberidra tai Israel masitangsiake tainanalep samba tatogatdra tai Midian, samba rauraurangan sangamberi tarimeura, samba leu pukayoatdra.

¹⁰ Sangamberi laggai samba perkemahandra laborangannia.

¹¹ Lepa nenda sangamberi tai Israel masiala sangamberi sirauraura nenda, kisedda leu et sitangsiakenendra samba tarimeu,

¹² lepa abbitdrangannia kai Mose samba kai imam Eleazar samba ka sangamberi paamian Israel. Ka teteret nenda ai sia musapou ka polak simagaktuk ka Moab, ka be'bet bagat oinan Jordan, legret laggai Jerikho.

Toili saladdu Israel

¹³ Iageti si Mose, imam Eleazar samba sangamberi sikebbukat laggai sibara ka paamian Israel bela sibara ka pusapougat addeat masiailiake saladdut Israel.

¹⁴ Golunangan sangamberi saladdu si Mose, sia saute saladdu samba sautet saladdut simaruei le aratoli ka pasaggangan.

¹⁵ Kuanangan ka tubutdra, “Angoi nuobaake kam rapurimanua sangamberi tainanalep nenda?

¹⁶ Ta' pa sangamberitdra tainanalep nenda sipasitututnake nganturat Bileam, bailiu tubbuinangan paamian Israel ka Peor bule rakaddiuake si Tuhan? Samba nenda iate sibaraake pugejaat baga ka paamian Tuhan!

¹⁷ Oto, kineneiget mateiake kam tatoga taimanteu samba senen tainanalep sitaimalina.

¹⁸ Tapoi taiokko simalina momoi nuala kam sia bakkatmui.

¹⁹ Samba kam sangamberimui simateiake sirimanua ele sibekbek tubut sirimanua simamatei buita mukuddu kam ka ujat perkemahan pitu ngagogoi burunia. Ka gogoi sukatelu samba sikapitu kam samba sangamberi tainanalep sitangsiakenenmui nenda buita nugalaiake kam enungan pasilinat tubu.

²⁰ Senen leppei samba apapa sigalai sibara ka kulit, bulut kambing ele loina, buita tulinaake.”

²¹ Iageti kuanangan si imam Eleazar ka tubutdra sitotoili simaruei sibara ka pasaggangan nenda, “Nene te sangamberi enungakenen siaket Tuhan kai Mose.

²² Sangamberi apapa sitaimalalaboket, kele mas, perak, tembaga, laba', timah simabulau samba timah simapusu, buita tulinaake ka bagat obengan. Iageti bibilet nenda buita tulinaake leu et ka oinan punen pasilina bule itata' kasitsinnakenen.

²³ Sangamberi bibilet bagei simalaboket buita tulinaake ka oinan punen pasilina.

²⁴ Ka gogoi sikapitu buita nutaptap kam leppeimui, iapeite ta ibailiu kam kasitsinnakenen, samba momoi nutuguru' kam ka perkemahan.”

Pasirubeiat bibilet siraurau

²⁵ Kuanangan si Tuhan kai Mose,

²⁶ “Ekeu samba si imam Eleazar, sambamui sikebbukat laggai sabagei sibata ka paamian Israel, buita nuadde kam sangamberi sirauraumui, kisedda leu et sitangsiakenen samba tarimeu.

²⁷ Bibilet siraurau nenda buita nurubeiake kam rua ngarubeiat simakere igi, sitenga rubeiatdra tai saladdu silepa pasaggak, samba sitenga rubeiatdra sapaamian.

²⁸ Addeat kaunen sikokoiakenen Kaku, Tuhan, sibara ka rubeiatdra saladdu nenda buita nuala kam sara sibara ka senen lima ngotu – sibara ka sitangsiakenen, ka jaui, keliddai, biribiri samba kambing.

²⁹ Kau kam nenda kai imam Eleazar sibailiu panguruat sikokoi Kaku, Tuhan.

³⁰ Sibara ka rubeiat sikau ka paamian Israel, buita nuala kam sara ka senen lima pulu, sibara ka sirimanua sitangsiakenen, ka jaui, kalidei, biribiri samba kambing. Kau kam sangamberinia nenda ka tai Lewi sipasikeli SapouKu.”

³¹ Si Mose samba imam Eleazar masigalaiake kele siparentaakenen Tuhan.

³² Bagei siala'ra saladdu addeat saratdra, iginia siraurau nenda enemngotu pitupululimangaribu ngamuneng biribiri

³³ samba kambing pitu puluruangaribu ngamuneng jaui,

³⁴ samba enem pulusarangaribu ngamuneng kalidei

³⁵ samba leu telu puluruangaribu sia tainanalep simalina sitangsiakenen.

³⁶ Iletalaga sibara ka sangamberinia nenda tukau ka tubutdra saladdu ka parubeiat kele kise: telungotu telupulupitungaribu limangotu ngamuneng biribiri samba kambing,

³⁷ samba sibara ka sangamberinia nenda tukokoiake enemngotu pitupululima ngamuneng kaunen kai Tuhan,

³⁸ jaui telu puluenemngaribu ngamuneng, pitu pulurua ngamuneng tukokoiake kaunen kai Tuhan,

³⁹ kalidei telu puluruangaribu limangotu ngamuneng, enem pulusara ngamuneng tukokoiake kaunen kai Tuhan,

⁴⁰ taiokko simalina pulu enemngaribu sia, telu pulurua sia tukokoiake kaunen kai Tuhan.

⁴¹ Lepa kaunangan si Mose kai Imam Eleazar sikokoiakenen nenda addeat panguruat kai Tuhan, kele siparentaakenen Tuhan.

⁴² Rubeiatdra sapaamian Israel makere iginia rubeiatdra tai saladdu,

⁴³ iate telu ngotu telupulupitungaribu limangotu ngamuneng biribiri samba kambing,

⁴⁴ jaui telu puluenemngaribu ngamuneng,

⁴⁵ kalidei telu pulungaribu limangotu ngamuneng,

⁴⁶ samba pulu enemngaribu sia taiokko simalina.

⁴⁷ Siripot siparentaakenen Tuhan, alanangan sara si Mose sibara ka senen lima pulu sia sitangsiakenen samba tarimeu, lepa kaunangannia ka tai Lewi sipugagalai ka Sapou Tuhan.

⁴⁸ Iageti si sautet saladdu Israel, ei sia kai Mose

⁴⁹ samba kuarangan, “Tuan, akuaddengan kai tai saladdu uteakenenmai. Sangamberitdra ai sia, ta anai sia sara simapepepe.

⁵⁰ Kalulut nenda abbitmaian pulaingean mas, letcut kabei, letcut rere, sipsip, subang samba inu sialamai senemai. Sangamberinia nenda kaumaiannia kai Tuhan sibailiu panguruatmai, bule mariuriu ipasikeli kai.”

⁵¹ Lepa si Mose samba Imam Eleazar masisilo mas nenda, sangamberinia kele putubuat pulaingean.

⁵² Panguruatdra saladdu nenda malegre iali rua ngotu kilo sane'nia.

⁵³ Tapoi sangamberi saladdu nenda senendra araalaan siraurau nenda ka sia.

⁵⁴ Iageti si Mose samba imam Eleazar masiabit mas nenda ka Sapou Tuhan bule ipasikeli bangsa Israel.