4Mos. 30 - BUKO SIPUNENAN

Palelenganda muntogat sinanalep

¹ Kaunangan si Mose sangamberi enungakenen nene ka tubutdra sautet sangamberi suku bangsa Israel.

² Ke ai sara taimanteu mupalelengan ele matiboake palelengan pasamba suppa kai Tuhan, bailiu appranangannia ka sara palelengan, buita igalaiake aponia sipalelekngakenennia nenda, samba ta momoi ipasabau tiboietnia.

³ Ke ai sara siokko sikukuddu ka lalep ukkuinia mupalelengan kai Tuhan, samba appranangannia sara palelengan,

⁴ samba ta anai ikua apapa ukkuinia ka teteret aiarep pagalaiat nenda, oto siokko nenda buita igalaiake sangamberi sipalelekngakenennia samba palelengannia nenda.

⁵ Tapoi ke ikeraake ukkuinia ka teteret aiarep pagalaiat nenda, oto siokko nenda ta iaprannia ka sipalelekngakenenia samba palelengannia. Iappeakenia si Tuhan, kalulut aikeraakenia ukkuinia.

⁶ Ke ai sinanalep sitaiputatalimou mupalelek ele iapprania ka sara palelengan, ele rapatiboijinia boiki ele kisedda, oto iappra le nia ka sipalelekngakenenia ele palelengannia,

⁷ ele ioba bagania simanteunia ka teteret aiarep pagalaiat nenda.

⁸ Tapoi ke ikeraake simanteunia ka teteret aiarepnia, oto ta iapprania ka sipalelekngakenenia samba palelengannia nenda. Iappeakenia si Tuhan.

⁹ Ke sara silumang ele sara sinanalep sisaraakenen masigalai palelengan siapprania, iapprania le nia palelengan nenda samba buita igalaiake.

¹⁰ Ke sara sinanalep silepa mutalimou masigalai palelengan sipprania,

¹¹ buita igalaiake sangamberi sipalelekngakenennia nenda, ke simanteunia ioba bagania ka teteret aiarep pagalaiat nenda.

¹² Tapoi ke ikeraakenia simanteunia ka teteret aiarep pagalaiat nenda, oto sinanalep nenda ta iapprania ka palelengannia. Iappeakenia si Tuhan, kalulut aikeraakenia simanteunia.

¹³ Ai ron simanteunia iobaake ele ikeraake senen palelengan sigalai sinanalepnia.

¹⁴ Tapoi ke ioba bagat simanteunia ka teteret aiarep pagalaiat nenda, sinanalep nenda buita igalaiake sangamberi palelengannia. Ioba simanteunia ka palelengan nenda ka teteret aiarepnia.

¹⁵ Ke ka gogoi sibabara ikeraake simanteunia palelengan sinanalepnia, oto simanteunia nenda te masisilo siripot taipuririuriunia nenda.

¹⁶ Nenda te enungakenen sikau Tuhan kai Mose pagalaiat palelengan sigalai sara siokko sikuddu ka lalep ukkuinia, ele sara sinanalep silepa mutalimou.