4Mos. 3 - BUKO SIPUNENAN

Tai Lewi

¹ Nene te muntogat Aron samba Mose kateteret aipanibo si Tuhan kai Mose ka leleu Sinai.

² Oninda tatogat Aron, iate sikebbukat Nadab, iageti si Abihu, Eleazar samba si Itamar.

³ Nenda te oninda tatogat Aron, tai imam sinulaiji, sisukatakenen ibailiu siukka galajet puimam.

⁴ Tapoi si Nadab samba si Abihu atataan sia ka matat Tuhan ka simatangeu ka Sinai, kateteret airapangunguruatnake obengan bagei ka matat Tuhan. Ruadda taanai tatogatda. Oto kateteret ai peile muririmanua ukkuira si Aron, siukkaake galajet imam iate Eleazar samba Itamar.

⁵ Kuanangan si Tuhan kai Mose,

⁶ “Koiniake suku Lewi ramalegre samba raei kai imam Aron, bule rapasikelinia.

⁷ Buita ragalaiake galajet kai Aron samba ka sangamberi paamian Israel ka matat Sapou Paailiat samba kisedda te ragalaiake galajet ka Sapou Sipunenan.

⁸ Buita rapasikeli sangamberi bibilet Sapou Paailiat, samba masigalaiake galajet ka tai Israel samba kisedda te ragalaiake galajet ka Sapou Sipunenan.

⁹ Tai Lewi buita nusegeake sia katubut Aron samba tatogania; sibara katalagatda tai Israel buita sangamberitda nenda tusegeake katubunia.

¹⁰ Tapoi si Harun samba tatogania buita nukau sia masiukkaake galajet sibailiu imam, tapoi siberikabaga silegreake tubutda buita tuukum simateiakenen.”

¹¹ Kunangan si Tuhan katubut Mose,

¹² “Bulatnia te, Kuala tai Lewi ka talagatda tai Israel silit sangamberi tatogatda sikebbukat, siputututu mata siboiki sibara ka suruket, bule tai Lewi ibailiu bakkatKu,

¹³ kalulut Aku le sibakkat sangamberi tatoga sikebbukat. Kateteret Akumateiake sangamberi tatoga sikebbukat ka laggai Misir, iageti kokoiakekungan addeatKu sangamberi tatogatda tai Isarel sikebbukat, sirimanua samba tarimeu; sangamberinia nenda Aku sibakkatnia; Aku te Tuhan.”

¹⁴ Kuanangan si Tuhan kai Mose ka simatangeu ka Sinai:

¹⁵ “Suratnake oninda tai Lewi siripot mungkuat samba muntogatda; sangamberi taimanteu sipurura sangalaggo kapata buita nusuratake.”

¹⁶ Lepa suratakenangan sia si Mose siripot sikuat Tuhan, kele sikoiniakenen katubunia.

¹⁷ Nene te onin tatogat Lewi: Gerson, Kehat samba Merari.

¹⁸ Nene te oninda tatogat Gerson samba samuntogatda: Libni samba si Simei.

¹⁹ Tatogat Kehat samba samuntogatda iate Amram, Jizhar, Hebron samba Uziel.

²⁰ Tatogat Merari samba samuntogatda iate Mahli samba si Musi. Nene te samuntogatda tai Lewi ka bagat mungkuatda.

²¹ Mungkuat Gerson iate muntogat Libni samba muntogat Simei.

²² Igitda sitususurat kateteret sangamberi taimanteu sipurura sangalaggo kapata tusurat ai pitu ngaribu lima ngotu sia.

²³ Sangamberi muntogat Gerson nene musapou ka teitei Sapou Sipunenan ka isit sikaleleu.

²⁴ Siuteake mungkuat Gerson iate si Elyasaf togat Lael.

²⁵ Bulat pasikelietda samuntogat Gerson kabagat Sapou Paailiat iate Sapou Sipunenan samba Sapou samba tabbonia, komak ka matatbaliu gugurukatnia Sapou Paailiat,

²⁶ komak kekret laibokat samba kekre matatbaliu laibokat ka sangaliot Sapou Sipunenan samba kudduat pasibuluat, samba apprania, samba leu sangamberi galajet sipaakkup ka sangamberinia nenda.

²⁷ Mungkuat Kehat iate muntogat Amram, Jizhar, muntogat Hebron samba muntogat Uziel; iate samuntogat Kehat.

²⁸ Taddera sisuratakenen kateteret sangamberi taimanteu sipurura sangalaggo kapata tusurat ai balu ngaribu enem ngotu sia, iate sipasikeli bibilet sipunenan.

²⁹ Rapusasapou samuntogat suku Kehat nene ka bebet Sapou Sipunenan isit kaiaman.

³⁰ Siuteake mungkua Kehat samba samuntogatnia iate Elisafan togat Uziel.

³¹ Pasikeliatda iate Peti Pakerekat baga, meja, reret alito, kudduat pasibuluat, bibilet kudduat sipunenan pakeiet masigalaiake panindogat, kisedda leu et kekre, samba leu sangamberi galajet sipaakkup ka sangamberinia nenda.

³² Ute bulat sabeu ka tai Lewi iate si Eleazar, togat Aron, sipasijago sia sipuuku sangamberi bibilet sipunenan.

³³ Mungkuat Merari iate muntogat Mahli samba muntogat Musi; iate samuntogat Merari.

³⁴ Taddera sisuratakenen kateteret sangamberi taimanteu sipurura sangalaggo kapata tusurat ai enem ngaribu rua ngotu sia.

³⁵ Siuteake mungkuat Merari samba samuntogatnia iate si Zuriel togat Abihail. Rapusasapou iate ka bebet Sapou Sipunenan isit bare.

³⁶ Galaiakenenda muntogat Merari iate masijago lapprit Sapou Sipunenan, loina silittengania, sangamberi ariginia, aponia, sangamberi bibiletnia, samba leu sangamberi galajet sipaakkup ka sangamberinia nenda,

³⁷ kisedda leu et arigi laibokat ka sangaliot kudduat sipunenan, aponia, turi' samba apprania.

³⁸ Sipusasapou ka matat Sapou Sipunenan ka isit ka belaiat sulu, ka matat Sapou Paailiat iate si Mose samba si Aron samba leu tatogania, sipasigagalaike galajet masijago kudduat sipunenan addeatda tai Israel; tapoi siberikabaga silegreake tubunia, buita tuukum simateiakenen.

³⁹ Taddera tai Lewi siripot sikuat Tuhan isuratakenia si Mose samba si Aron, siripot muntogatda, iate sangamberi taimanteu sipurura sangalaggo kapata, ai rua pulu rua ngaribu sia.

⁴⁰ Lepa kuanangan si Tuhan kai Mose, “Suratnake sangamberi tatogatda tai Israel taimanteu sikebbukat sipururura sangalaggo kapata, lepa addenungan igitda,

⁴¹ samba alanungan tai Lewi addeatKu – Aku te Tuhan – sibailiu silit sangamberi tatoga sikebbukat sibabara ka tai Israel, kisedda leu et tarimeura tai Lewi silit sangamberi toga sikebbukat katalagat tarimeura tai Israel.”

⁴² Iagei suratakenangan si Mose sangamberi toga sikebbukat sibabara ka tai Israel, siripot sikoiniakenen Tuhan katubunia.

⁴³ Sangamberi toga sikebbukat taimanteu sisuratakenen kabagat pasisuranan nenda, iate sipurura sangalaggo kapata, ai rua pulu rua ngaribu rua ngotu pitu pulu telu sia.

⁴⁴ Lepa kuanangan si Tuhan kai Mose,

⁴⁵ “Ala tai Lewi silit sangamberi toga sikebbukat sibabara ka tai Israel, kisedda leu et tarimeura tai Lewi silit tarimeura, bule tai Lewi nenda ibailiu bakkatKu; Aku te Tuhan.

⁴⁶ Sibailiu bulagat panebui ka rua ngotu pitu pulu telu tatogatda tai Israel sikebbukat sisabau igitda tai Lewi nenda,

⁴⁷ buita nuala lima syikal sara sirimanua; buita nualania siripot syikal sipunenan – syikal nene rua puluh gera sanenia –.

⁴⁸ Kaunungan perak nenda katubut Aron samba ka tatogania sibailiu bulagat panebui ka sangamberi sirimanua sipulelegei nenda.”

⁴⁹ Lepa alanangan si Mose bulagat panebui addeatda sangamberi sirimanua sisabau igitda sitebuira tai Lewi;

⁵⁰ sibara ka tatogatda tai Israel sikebbukat alanangan perak nenda, sangaribu telu ngotu enem puluh lima syikal, tukilo siripot syikal sipunenan,

⁵¹ iageti kaunangan si Mose bulagat panebui nenda katubut Aron samba ka tatogania siripot sikuat Tuhan, kele sikoiniakenen Tuhan katubut Mose.