4Mos. 27 - BUKO SIPUNENAN

Tatogat Zelafehad tainanalep

¹ Si Zelafehad ai lima tatogania tainanalep, iate Mahla, Noa, Hogla, Milka samba Tirza. Ukkui Zelafehad iate si Hefer, ukkui Hefer iate si Gilead. Ukkui Gilead iate si Makhir, ukkui Makhir iate si Manasye, samba ukkui Manasye iate si Josep.

² Ka lima tatogat Zelafehad nene ei sia kai Mose, samba kai Imam Eleazar, samba leu ka sikebbukat laggai samba ka sangamberi paamian siparururu ka bebet matatbaliu Sapou Tuhan. Kuarangan,

³ “Ukkuimai amateiannia ka simatangeu samba ta anai togania simanteu. Nia ta sipasitutut si Korah sisaggangi si Tuhan. Aimatei ukkuimai nenda kalulut jo nia le sarania.

⁴ Tapoi angoi aitata oninia ka bangsa Israel, kalulut ta anai togania simanteu? Ake le kam ikepmakenenmai polak bakkatdra ka talagat sasarinan ukkuimai.”

⁵ Lepa segeakenangan si Mose pagalaiat nene kai Tuhan,

⁶ samba kuanangan si Tuhan kai Mose,

⁷ “Aponia sikuadra tatogat Zelafehad nenda kirenangan aisesengan. Oto kau le ikepmakenendra polak ka talagat bakkat sasarainan ukkuira.

⁸ Kua kamatatdra bangsa Israel, ke matei sara simanteu samba ta anai togania simanteu, iageti polak ikepmakenenia buita ikau ka togania sinanalep.

⁹ Ke ta anai togania sinanalep, polak ikepmakennia nenda buita ikau ka sasarainania simanteu.

¹⁰ Ke ta anai sasarainania simanteu, polak nenda sasarainan ukkuinia simanteu sibakkatinia.

¹¹ Ke ta anai sasarainania simanteu, samba ta anai sasarainan ukkuinia taimanteu, polak nenda saeppu simalegre ka muntogatnia sibakkatnia.” Nene te galaiakenendra tai Israel sibailiu surukat siparentaakenen Tuhan kai Mose.

Tupili si Josua sibailiu silit Mose

¹² Kuanangan si Tuhan kai Mose, “Tatraake ekeu ka leleu Abarim, samba ai ekeu sedda mattainungan kupkumen laggai kaunenKu ka tai Israel.

¹³ Lepat numattainia, matei ekeu kele kebbunu si Aron,

¹⁴ kalulut ruamui anusaggangikam parentakKu ka simatangeu Zin. Ka teteret arapungunyuk ka tubukKu sangamberi paamian Israel ka Meriba, ta anupatoila kam gegekKu ka matatdra ka pagalaiat oinan nenda.” (Aipuaili nenda ka iate ka bubuakat oinan Meriba ka Kades, ka simatangeu Zin.)

¹⁵ Lepa panindounangan si Mose,

¹⁶ “Ale, Tuhan Taikamanua, siake purimanuaiat ka sangamberi sipuririmanua, panindogatku, sau'sau sara sirimanua sioi masiuteake bangsa nene,

¹⁷ sara sioi ibaliu utera saladdu ka teteret rapasaggak. Bui' nuobaake paamianNu nene kele mungkuat biribiri sita' anai sipasikelinia.”

¹⁸ Kuanangan si Tuhan kai Mose, “Sogai si Josua, togat Nun. Nia te sara simaagai. Galakngake kabeinu ka utenia.

¹⁹ Koiniakenia ipurio ka matat Imam Eleazar samba ka sangamberi paamian. Samba paagainungan ka matatdra si Josua iate silim.

²⁰ Kau katubunia sitenga pubebeunan tiboi tubum, bule mareddet tai Israel ka tubunia.

²¹ Si Josua buita itiddou enungan sibara kai Imam Eleazar, samba si Eleazar buita inounou obaket bagakKu pasamba ipakei Urim samba Tumim.

²² Galaiakenangan si Mose kele siparentaakenen Tuhan ka tubunia. Koiniakenangan si Josua murio ka matat Imam Eleazar samba ka sangamberi paamian nenda.

²³ Lepa galakngakenangan kabeinnia ka utet Josua samba paagainangannia, si Josua iate silinia, kele siparentaakenen Tuhan ka tubunia.