4Mos. 26 - BUKO SIPUNENAN

Pangandeat sikarua

¹ Lepat aitukapplu pugejaat baga nenda, kuanangan si Tuhan kai Mose samba kai Eleazar, togat Imam Aron,

² “Buita nubaraake kam pangandeat igit sirimanua ka sangamberi paamian Israel senen muntogat. Sangamberi taimanteu sipurura rua pulu ngarura kapata sioi ibailiu saladdu, buita nusuratnake kam.”

³ Si Mose samba si Eleazar masigalaiake parenta nenda.

⁴ Sogairangan sangamberi taimanteu sipurura rua pulu ngarura kapata samba ruruakerangan sia ka polak simagaktuk ka Moab, ka silat bagat oinan Jordan, ka be'bet laggai Jerikho. Nene te oninda tai Israel sibebela sibara ka Misir:

⁵ Sibara ka suku Ruben, togat Jakob sikebbukat: muntogat Henokh, Palu,

⁶ Hezron samba Karmi.

⁷ Taimanteu ka bagat sangamberi muntogat nenda igitdra epat pulutelu ngaribu pitungotu telupulu sia.

⁸ Togat Palu iate si Eliab,

⁹ samba tatogat Eliab, iate Nemuel, Datan samba si Abiram. Si Datan samba si Abiram nenda arapilingan sia sapaamian, tapoi apatadde le sia pasamba sangamberi sipasitutut si Korah masiaggangi si Mose samba si Aron samba masisaggangi si Tuhan.

¹⁰ Lepa tubukanangan polak samba guknangan sia bailiu matei sia pasamba si Korah samba sipasitututnia ka teteret obengan masisubuake rua ngotulima pulu sia taimanteu. Pagalaiat nenda ibailiu repdemen ka bangsa Israel.

¹¹ Tapoi tatogat Korah ta amatei sia.

¹² Sibara ka suku Simeon: Muntogat Nemuel, Jamin, Jakhin,

¹³ Zerah samba Saul.

¹⁴ Igitdra taimanteu ka muntogat nenda iate rua puluruangaribu ruangotu sia.

¹⁵ Sibara ka suku Gad: Muntogat Zefon, Hagi, Syuni,

¹⁶ Ozni, Eri,

¹⁷ Arod samba Areli.

¹⁸ Igitda taimanteu ka suku nenda iate epat pulungaribu limangotu sia.

¹⁹ Rua togat Jehuda: iate si Er samba Onan, amateian sia ka laggai Kanaan.

²⁰ Sibara ka suku Jehuda: Kaum Syela muntogatdra tai Syela, barania kai Peres samba kai Zerah muntogatdra tai Zerah.

²¹ Peres, Zerah, Hezron samba Hamul.

²² Igitdra taimanteu ka muntogat nenda iate pitu puluenem ngaribu limangotu sia.

²³ Sibara ka suku Isakhar: Muntogat Tola, Pua,

²⁴ Jasub samba Simron.

²⁵ Igitdra taimanteu ka suku nenda iate enem puluepat ngaribu telungotu sia.

²⁶ Sibara ka suku Zebulon: Muntogat Seret, Elon samba Jahleel.

²⁷ Igitdra taimanteu ka suku nenda iate enem pulungaribu limangotu sia.

²⁸ Sibara ka suku Josep, sibara rua tatoga taimanteu: suku Manasye samba suku Efraim.

²⁹ Suku Manasye: Makhir, tohat Manasye, iate ukkui Gilead, samba sangamberi muntogat nene:

³⁰ Muntogat Iezer, Helek,

³¹ Asriel, Sekhem,

³² Semida samba Hefer.

³³ Zelafehad togat Hefer ta anai tatogania simanteu, sarat tainanalep le. Onindra iate Mahla, Noa, Hogla, Milka samba Tirza.

³⁴ Igitdra taimanteu ka suku nenda iate lima puluruangaribu pitungotu sia.

³⁵ Sibara ka suku Efraim: muntogat Sutelah, Bekher, samba Tahan.

³⁶ Muntogat Eran iate paninikat Sutelah.

³⁷ Igitdra taimanteu ka suku nenda iate telu puluruangaribu limangotu sia. Iate sangamberi muntogat painikat Josep.

³⁸ Sibara suku Benjamin: muntogat Bela, Asybel, Ahiram,

³⁹ Sefufam samba Hufam.

⁴⁰ Muntogat Ared samba Naaman iate paninikat Bela.

⁴¹ Igitdra taimanteu ka bagat muntogat nene iate epat pululimangaribu enemngotu sia.

⁴² Sibara ka suku Dan: muntogat Suham.

⁴³ Igitdra taimanteu ka bagat muntogat nene iate enem puluepatngaribu epatngotu sia.

⁴⁴ Sibara ka suku Asyer: muntogat Jimna, Jiswi samba Beria.

⁴⁵ Muntogat Heber samba Malkiel iate paninikat Beria.

⁴⁶ Si Asyer ai togania sinanalep sipuoni Serah.

⁴⁷ Igitdra taimanteu ka bagat muntogat nene iate lima pulutelungaribu epatngotu sia.

⁴⁸ Sibara ka suku Naftali: muntogat Jahzeel, Guni,

⁴⁹ Jezer samba Syilem.

⁵⁰ Igitdra taimanteu ka bagat suku nene iate epat pululimangaribu epatngotu sia.

⁵¹ Tadde'ra taimanteu sibara ka tai Israel enem ngotusarangaribu pitungotu telupulu sia.

⁵² Kuanangan si Tuhan, kai Mose,

⁵³ “Rubeiake polak nenda ka sangamberi suku bangsa Israel siripot beunan senen sukutdra.

⁵⁴ Ka tubudra suku sabeu buita nukau rubeiatdra sabeu, samba ka suku sigoiso, rubeiat sigoiso.”

⁵⁵ Galaiake pasirubeiat polak nenda ka enungan pauktuk.

⁵⁶ Kipa siripot siteuakenen pauktungan nenda buita nurubeiake sibailiu ikepmakenen senen suku, ka talagat sabeu samba sigoiso igitdra.”

⁵⁷ Kaum Suku Lewi siate muntogat Gerson, Kehat samba Merari.

⁵⁸ Ka bagat paninikatdra ai leu muntogat Libni, Hebron, Mahli, Musi samba Korah. Si Kehat iate ukkui Amran.

⁵⁹ Si Amran masitalimouake si Jokhebed, togat Lewi. Aiputu'tu matania si Jokhebed ka Misir. Si Amran samba si Jokhebed ai rua tatogatdra taimanteu: si Aron samba si Mose, samba sara sinanalep, si Miryam.

⁶⁰ Si Aron ai epat tatogania taimanteu: si Nadab, Abihu, Eleazar samba Itamar.

⁶¹ Si Nadab samba si Abihu matei sia ka teteret arapanguruatnake obengan sitaiobaket bagat Taikamanua.

⁶² Taimanteu sibara ka suku Lewi sipururura kapatat sangalaggo igitdra iate rua pulu telungaribu sia. Atusaraake le ka sia surat oninda sibara ka sabangsadra, kalulut ta anai ikepmakenendra polak ka Israel.

⁶³ Nenda te surat oininda sigalai Mose samba Imam Eleazar pagalaiat sangamberi muntogat Israel ka teteret arabaraake pasisuranan oni ka polak simagaktuk ka Moab ka silat bagat oinan Jordan ka bebet Jerikho.

⁶⁴ Ka talagat sangamberi sirimanua siboiki sinuratnakenen Mose samba si Aron ka simangetau ka Sinai, ta anai beri sia sara sipuririmanua.

⁶⁵ Aikuangan si Tuhan mamatei le sia sangamberidra ka simatangeu. Samba kirenangan amatei sia sangamberidra, sarat si Kaleb togat Jefune samba si Josua togat Nun le amulegei sipuririmanua.