4Mos. 25 - BUKO SIPUNENAN

Bangsa Israel ka leleu Peor

¹ Ai bangsa Israel mukuddu ka Su'sut Sitim, sangamberi sirimanua taimanteu taddaakerangan masigalai paelenan pasamba sangamberi tainanalep Moab sibara sedda.

² Sangamberi tainanalep nenda masina'na sia ka sangamberi punen buluakenen addeat masisuru taikamanuandra. Tai Israel leu et sambadra mukom buluakenen nenda samba masipanindogi taikamanuandra tai Moab.

³ Kalulut tai Israel masipanindogi sabulungan Baal ka Peor, pugolunangan si Tuhan katubutda samba kuanangan kai Mose,

⁴ “Laba' kam sangamberi sirimanua siuteake bangsa nenda samba mateiake kam sia ka matatdra sirimanua simigi sibailiu pasigagalaiake parentaKu, bule ta Kupugolu minca ka bangsa nenda.”

⁵ Lepa geti kuanangan si Mose ka tubut sangamberi sipasiukum ka Israel, “Senemui buita masimateiake sangamberi sirimanua ka sukumui sipasipaninindogi sabulungan Baal ka Peor.”

⁶ Ka teteret si Mose samba sangamberi paamian ai musosou ka matatbaliu Sapou Tuhan, itcorangan sara tai Israel masiabbit sara sinanalep tai Midian tuguru' ka bagat sapounia.

⁷ Ka teteret si Pinehas, togat Eleazar, punuteteu imam Aron masiitco pagalaiat nenda, rionia samba kaddiuakenangan parurukat nenda. Alanangan sara simuine bakkat

⁸ lepa kukrunangan simanteu samba sinanalep nenda ka bagat sapou. Ruatdra sirimanua nenda pununangan sia pasamba simuine bakkat nenda, iageti puarinangan pugejaat baga simaoloi ka Israel nenda.

⁹ Tapoi simaruei nenda simamatei aian rua puluepat ngaribu sia.

¹⁰ Lepa kuanangan si Tuhan kai Mose,

¹¹ “Si Pinehas togat Eleazar, punuteteu imam Aron, bulat ipasikeli le puabea ka talagat sangamberi tai Israel, bailiunangan pugogoluKu lebak samba ta'an amuriuriu Akupamatei bangsa nenda.

¹² Oto kua le kai Pinehas Kugalaile sara palelengan pasambania.

¹³ Nia samba paninikatnia Kuuddetnake sibailiu Imam teret buru-buru, kalulut nia bulat mauku airopmake Aku, Taikamanuania, samba aibaraakean paabanan ka jo tai Israel.”

¹⁴ Tai Israel simateiakenen pasamba tainanalep Midian nenda sipuoni Zimri, togat Salu, Ute ka sara keluarga sibara ka suku Simeon.

¹⁵ Sinanalep nenda sipuoni Kozbi, togat Zur, sara ute muntogat ka Midian.

¹⁶ Kaunangan si Tuhan parenta nene kai Mose,

¹⁷ “Saggangi le tai Midian, samba subuake le sia

¹⁸ kalulut pukakatai sipinaatutdra ka tubumui ka Peor, samba kalulut si Kozbi togat sara ute muntogat ka Midian. Si Kozbi nenda sinanalep simateiakenen ka teteret aipuaili pugejaat baga kalulut ukuman ka Peor.”