4Mos. 24 - BUKO SIPUNENAN

¹ Kineneiget aiagaian si Bileam oba'na si Tuhan masipanukani bangsa Israel. Lulut nenda ta'ameinia masigaba toggaiat kele sigalaiakenennia silelepa. Itconangan si Bileam ka ipot simatangeu,

² samba masiitco bangsa Israel sipusasapou siripot suku bangsania.

³ Samba kuanangan sibalat nene, Nene te patonekat Bileam, togat Beor, galai paninibot sara sirimanua simakoinong mata

⁴ sipasiarep ngangan Taikamanua samba siitco pamoilianan sibara ka Sipulugege, aimemerep, tapoi aitutubuka mata.

⁵ Apate lainge sapounu ale Jakob, samba kudduat kudduijietnu, ale Israel!

⁶ Kele su'su simalio situnganga'nga, ele mone ka bebet bagat oinan, kele loinat simoite siurep Tuhan, ele loinat aras ka bebet oinan.

⁷ Bara ka sia urat simalilimai, bara oinan ka uremen simigi. Bara erut puririmanua ka rimatania, sisaliu si Agag, samba purimataatnia tuabeuake geti.

⁸ Taikamanua siabbit sia bela ka laggai Misir, kele banteng simalia' ipasaggak ka sia. Tai bangsa sibailiu saggaknia guknangannia sappru, samba sangamberi tolatda pabubunangannia, samba sangamberi rouroura ibakbakngake.

⁹ Bangsa nenda kele singa simateu samba singa sinanalep, sipugugurui samba sipurarappo; kasei simagege masisuruakenia? Bule sirimanua sipanukani ekeu tupanukani, samba sirimanua sipateleiji ekeu tupaleiji.”

¹⁰ Ka golu si Balak kupkupakenangan siteimutnia samba kuanangan kai Bileam, “Kusogai ekeu addeat masitelei sangamberi saggakku, tapoi masipanukani sia le anugalai aili telu ngaminca.

¹¹ Kineneiget momoi nuei, toili ka lalepnu! Kupalelek le' upa ka tubum, tapoi ta' ioobake si Tuhan nusilo upa nenda.”

¹² Aleginangannia si Bileam, “Ta' bai akukuangan katubutda sangamberi sikoiniakenen tuanku,

¹³ kenanen Tuanku masiake kaku sangamberi perak samba mas sibabara ka lalep purimataat tuanku, ta momoi kupasabau parentat Tuhan samba masigalaiake apapa siobat bagakku? Aku momoi masikua sarat apa sikoiniakenen Tuhan kukua.”

Sangamberi pamoilianan sikateitei

¹⁴ Kuanangan si Bileam kai Balak, “Kineneiget kuoba toili ka bangsaku, Tapoi kepei mei, maeru le kupaagaiake kai tuanku pagalaiat aponia ragagalaiake geti bangsa Israel ka tubut bangsa tuanku ka gogoi sikateitei.”

¹⁵ Lepa si Bileam masitiboake pamolianan nene, “Nene te patonekat Bileam, togat Beor; galai paninibot sara sirimanua simaitco mata

¹⁶ silepa masiarep ngangan Tuhan, samba momoi masiagai Sipulugege, sipasiitco panoilakat sibara ka Sipulugege sialei merep tapoi mata aimumamata.

¹⁷ Kuitconia, tapoi ta'pei kineneiget, kukinerenia, tapoi sibara ka sareunan. Sara rimata sibara ka Israel kabaraiatnia, ioi geti kelean le panyanyat simakope toro. Sangamberi sautera tai Moab palekleknangannia bangsa Set sappruakenangannia geti.

¹⁸ Polak Edom rakudduiji le geti saggaknia, tapoi Israel masigalaiake galajet simakope ron.

¹⁹ Sibara kai Jakob tuottou geti sara sirimanua simagege, sipamatei sangamberi saggaknia.”

²⁰ Lepa geti ka panoilakat nenda itconangan si Bileam sangamberi tai Amalek. Iageti tiboakenangan pamoilianannia nene, “Sibara ka sangamberi bangsa ka polak, Amalek simakope pugegege ka polak. Tapoi bangsa nenda ka kalepakatnia, sasappru leu et geti addeat teret buruburu.”

²¹ Ka bagat panoilakat nenda si Bileam masiitco paninikat Keni, lepa masitiboake pamoilianan nene, “Kudduat pukudduatnu kirenangan maron, kele rumun ka uddut leleu bukku.

²² Tapoi kam, tai Keni, tutata'ake le geti, taan mabuburu Asyur iambit kam sibailiu tangsiakenen.”

²³ Lepa geti si Bileam tiboakenangan pamoilinanan nene leu et, “Paan te! Kasei sipuririmanua, ke Taikamanua masigalaiake pagalaiat nenda?

²⁴ Tapoi sibara ka Siprus moi geti sara kapal, kalaakerangan geti Asyur samba Heber, lepa geti kapa' sabeu nenda leu tutatata'ake geti.”

²⁵ Lepa patareknangan tubunia si Bileam bule itoili ka kudduatnia mulaggai, samba si Balak ei leu et.