4Mos. 23 - BUKO SIPUNENAN

¹ Kuanangan si Bileam kai Balak, “Rioake le ka kudduat nene pitu kudduat pasibuluat addeatku, samba patarek leu senen pitu ngamuneng jaui simanteu samba pitu ngamuneng biribiri simanteu.”

² Galaiakenangan si Balak kele sikuat Bileam ka tubunia. Ka uddut senen kudduat pasibuluat nenda rapanguruatake sangamuneng jaui simanteu samba sangamuneng biribiri simanteu.

³ Lepa kuanangan si Bileam kai Balak, “Purio le ka legret buluakenen rarangen Tuanku. Ta' mauju nenda ei aku masiitco ta leu pa ioba Tuhan paaili pasamba aku ele ta. Aileu kupaagai sangamberi apapa sikuat Tuhan katubukku.” Iageti ei si Bileam sarania ka uddut sara tinambu,

⁴ samba sedda oi Taikamanua ka tubunia. Kuanangan si Bileam ka Taikamanua, “Alepaan akurioake pitu kudduat pasibuluat samba panguruatakenen sangamuneng jaui simanteu samba sangamuneng biribiri simanteu ka uddut senen kudduat pasibuluat nenda.”

⁵ Lepa paagainangan si Tuhan kai Bileam apa bulat kuanennia, samba masikoiniakenia toili kai Balak masisegeake patonekat Tuhan ka tubunia.

⁶ Toili si Bileam samba masiailiake si Balak sipuririo peile ka legret buluakenen rarangennia, simakere pasamba sangamberi utera tai Moab.

⁷ Lepa tiboakenangan si Bileam pamoilianan nene, “Sibara ka Aram, polak simabuak simigi leleu ka kabelaiat sulu, si Balak, rimata Moab masisogai aku, kuanangan, “Konan le, panibo le addeatku. Telei le bangsa Israel nenda!”

⁸ Momoi leu pa kupasitelei, ke ta masitelei Taikamanua? Momoi leu pa kupasiukum ke ta masiukum Taikamanua?

⁹ Sibara ka uddut sangamberi leleu kuitco sia, sibara ka sangamberi tinambu kulelekngake sia. Itco, sara bangsa sipukukuddu saradda ta anai sia ka rubeiat sangamberi bangsa bagei.

¹⁰ Kelan le ngai punuteteu Jakob tamomoi tuadde, bangsa Israel iginia ta magulai. Bule matei aku kele sirimanua simaroipo baga bule teteret purimanuaiatku kele teteret purimanuaiatda sangamberi sirimanua nenda.”

¹¹ Lepa kuanangan si Balak kai Bileam, “Aponia bai sigalaiakenennu katubukku? Akuabbit ekeu sene addeat masitelei sangamberi saggakku. Tapoi masipanukani sia le anugalai.”

¹² Aleginangan si Bileam, “Aku sarat masikua apa sikoiniakenen Tuhan.”

Pamoilianan sikarua

¹³ Lepa kuanangan si Balak kai Bileam, “Konan taei simakere ka kuduat bagei, sibara sedda momoi ekeu masiitco sarat sangarubeiat sibara ka bangsa Israel. Telei le sia sibara sedda.”

¹⁴ Iageti si Balak masiabbit si Bileam ka su'sut Zofim, ka uddut leleu Pisga. Sedda leu et rioakenangan pitu kudduat pasibuluat samba masipanguruatake sangamuneng jaui simanteu samba sangamberi biribiri simanteu ka uddut senen kudduat pasibuluat nenda.

¹⁵ Kuanangan si Bileam kai Balak, “Kuddungan le sene, legret buluakenen rarangen Tuanku, mei boiki aku masiailiake si Tuhan sedda.”

¹⁶ Ailiakenangan si Tuhan si Bileam samba masipaagaiake ka tubunia apa sibulatnia kuanennia, lepa koiniakenangannia itoili ka Balak addeat masisegeake patonekat Tuhan nenda.

¹⁷ Iageti toili si Bileam samba ailinangan si Balak ainia muririo peile ka legret buluakenen rarangen, simakere pasamba sia sautet Moab. Pererenangan si Balak apa sikuat Tuhan,

¹⁸ lepa tiboakenangan si Bileam pamoilianan nene, “Ale Balak, togat Zipor, konan, arep pei apa sibulat kukukua.

¹⁹ Taikamanua ta kele sirimanua simalabbei iolei baga samba ioba paboko. Ke Taikamanua masigalai palelengan, bulat igagalaiake le! Ke maniboNia, bulatnia muririuriu! le!

²⁰ Atukoiniake aku masipanukani, samba ke Taikamanua masipanukani, tamomoi kutiktiknia minca.

²¹ Kai Jakob ta atuitco pukakatai, ka tai Israel ta atuitco simabesi'. Tuhan, Taikamanuanda, masipaalei sia. Sogaakerangan: Nia te Rimata!

²² Taikamanua siabbit sia bela sibara ka Misir, kele banteng sipuuja ipasaggak ka rubeiatda.

²³ Ta' anai tiboiet kerei simaontot kai Jakob ta anai pakokoijat simaron ka tubut Israel. Pagalaiat bangsa nenda sirimanua masikua geti, “Itco pei kiseiet sigalai Taikamanua!”

²⁴ Bangsa nenda tusuru kele singa sinanalep, samba sipuririo simaipo kele singa simanteu. Ta' memerepnia ke ta'pei ipakomi saggaknia samba ilo logau sitarakkupnia.”

²⁵ Lepa kuanangan si Balak kai Bileam, “Pa'an leu, ke ta noba masitelei bangsa Israel, tapoi bui' nusukatake sia!”

²⁶ Aleginangannia si Bileam, “Ta' pa akukuangan ka tubut Tuanku, kugagalaiake le sangamberi siparentaakenen Tuhan?”

Pamoilianan sikatelu

²⁷ Kuanangan si Balak, “Konan taei ka kudduat bagei. Ta' taagai Taikamanua masiobaake ekeu masitelei tai Israel addeatku ka kudduat nenda.”

²⁸ Iageti abbitnangan si Bileam ka uddut leleu Peor simatai ka simatangeu.

²⁹ Kuanangan si Bileam kai Balak, “Rioake pitu kudduat pasibuluat ka kudduat nene samba tarekakenungan sene pitu ngamuneng jaui simanteu samba pitu ngamuneng biribiri simanteu.”

³⁰ Galaiakenangan si Balak kele sikuat Bileam. Buluakenangan sangamuneng jaui simanteu samba sangamuneng biribiri simanteu ka uddut senen kudduat pasibuluat nenda.