4Mos. 22 - BUKO SIPUNENAN

¹ Tuitui minca bangsa Israel pusapourangan ka su'sut Moab, ka kupkumen laggai silat bagat oinan Jordan legret Jerikho.

² Si Balak togat Zipor msiarep sangamberi sigalaiakenen bangsa Israel ka tubudda tai Amori,

³ samba bangsa Israel poi nenda maigi sia sedde le nia samba sangamberi taikaumania.

⁴ Lepa kuarangan tai Moab ka tubudda sia siuteake tai Midian, “Ta'an mabuburu mungkuat nenda masipakomi sangamberi sibabara ka bebeta kele jaui masipakomi parou ka su'sut simaturu-turu.” Iageti Rimata Balak,

⁵ masikau punutubu addeat masisogai si Bileam, togat Beor sikuddu ka laggai Petor legret bagat oinan Efrat ka kupkumen laggai Amau. Arakoiniake sia masisegeake katubut Bileam patonekat nene sibara kai Balak, “Bule nuagai, ai sara bangsa siooi sibara ka Misir, sangamberi sirimanua rapasaragai tubudda kaipa-kaipa samba matarek rasaggangi kupkumen laggaimai.

⁶ Sia peile maron ka kai. Oto, konan le! Pateleiji sia addeatku. Kupaatu momoi kai masikalaake sia samba masituituiake sia ka tobbou laggai nene. Aipoi matonem bagaku sirimanua sisukatnu masisese panukanan, samba sirimanua siteleinu rasese telei.”

⁷ Iageti ei sia siuteake tai Moab samba tai Midian nenda pasamba masiabbit upa addeat Bileam bule ioba masitelei tai Israel. Kele arasege kai Bileam, segeakerangan ka tubunia patonekat Rimata Balak.

⁸ Kuanangan si Bileam ka tubudda, “Pugogoi kam sene. Mancep paagaikungan geti ka tubumui apa sikuat Tuhan ka tubuku.” Iageti sia siuteake tai Moab nenda kuddu ka kudduat Bileam.

⁹ Lepa oi Taikamanua kai Bileam samba parere', “Kasei sangamberi sirimanua nenda sikuddu ka kudduatnu Bileam?”

¹⁰ Aleginangan si Bileam, “Sia sigugluakenen Rimata Balak sibara ka Moab addeat masipaagaiake

¹¹ aipoi sara bangsa sibabara ka Misir aipakarapman sia kasene kudduat. Rimata Balak masikoiniake aku masitelei bangsa nenda addeatnia, bule ioi isaggangi samba ituituiake sia.”

¹² Kuanangan Taikamanua kai Bileam, “Bui' nuei pasamba sangamberi sirimanua nenda, samba bui' nupatelei bangsa nenda, kalulut alepan Kusukatake sia.”

¹³ Mansep simaseman kuanangan si Bileam ka sia sigugluakenen Balak nenda, “Toiliake kam, ta iobaake aku si Tuhan mei pasamba kam.”

¹⁴ Iageti toili sia kai Balak samba segeakerangan ka tubunia si Bileam ta ioba moi simakere pasamba sia.

¹⁵ Lepa si Balak masikau maka igi sigugluakenen simaka buak peile puukuketnia bele peile ka siboiki.

¹⁶ Segeakerangan kai Bileam patonekat nene sibara kai Balak, “Kutiddou bulat simakope: konan le, samba bui' nukeraake.

¹⁷ Kuake geti upa bulat simakope igi, samba masigalaiake apa le sikuam. Konan le, samba telei le bangsa nenda addeatku.”

¹⁸ Tapoi aleginangan si Bileam, Kenanen poi sangamberi perak samba mas sibabara ka bagat lalep purimataat rimata Balak tululuiake ka tubuku, ta momoi kupasabau parentat Tuhan, Taikamanua panindogietku. Kenanen ka pagalaiat sigoiso poi ta momoi aku masiasolinia.

¹⁹ Tapoi maeruan sangamberimui sene mugogoi, kele sigalaiaakenenda sia sikoiniakenen siboiki. Kuoba masiagai bule ai peile ioba ikua si Tuhan ka tubuku.”

²⁰ Soibo nenda oi Taikamanua kai Bileam samba kuanangan, “Moi sangamberi sirimanua nenda addeat masitiddou ekeu mei pasamba sia. Oto patarekngan tubum nuei. Tapoi galaiake le sarat siparentaakenen ka tubum.”

²¹ Mansep simanseman si Bileam masipakei pelana ka kalideinia, lepa tutnangan sia sautet Moab nenda.

Si Bileam samba kalideinia

²² Tapoi ka teteret iei si Bileam pugolunangan Taikamanua. Aian si Bileam mukakalidei ka kalideinia rua sia sipuukunia masipaenungake, purionangan ka talagat enungan malaikat Tuhan addeat masisailania.

²³ Masiitco ipurio malaika sedda sibara lanjau situooppat, kalidei nenda tusoip sibara ka enungan samba biluakenangan ka mone. Si Bileam masisibo kalidei nenda samba abbitnangan minca ka enungan.

²⁴ Lepa geti purionangan Malaikat Tuhan ka rubeiat enungan simaokkip, oggak rua monen anggur sibara irip bukku ruangasilania.

²⁵ Ka teteret kalidei nenda masiitco malaikat Tuhan, ei nia ka bebe bailiunangan reret Bileam tulaptip ka irip, si Bileam masibo'bo minca kalidei nenda.

²⁶ Lepa otca malaikat Tuhan, samba murio ka kudduat simaokkip peile bailiunangan ta'an anai enungan mai tusabau kai katciu ele kai kattoetnia.

²⁷ Masiitco malaikat Tuhan, kalidei nenda masiibuake tubu. Si Bileam bailiu magolu samba bo'bonangan kalidei nenda pasamba tutura.

²⁸ Lepa si Tuhan masigalai kalidei nenda momoi manibo. Kuanangan tarimeu nenda kai Bileam, “Apa bai sigalaiku kai Tuan pat si Tuan masibo'bo aku aili telu ngaminca?”

²⁹ Aleginangannia si Bileam, “Ekeu masipaguileake aku! Kukuangan lenia ai bai lanjau kaku, bulatnia kumamateiake ekeu!”

³⁰ Aleginangan kalidei nenda, “Ta' pa aku nene kalidei Tuan? Sibara ka siburunangan Tuan masikalideiake? Aian leu pa aku ta masireddet kai Tuan?” Aleginangannia si Bileam, “Ta'.”

³¹ Lepa si Tuhan masigalai si Bileam momoi masiitco malaikat Tuhan sipuririo sedda sibara lanjau situooppat. Simaola si Bileam murekkuk ka polak samba masipanindogi.

³² Parerenangan malaikat Tuhan, “Angoi nubo'bo kalideinu aili telu ngaminca? Moi Aku masisaila ekeu, aipoi siripot sipinatukku, ta maeru nuei.

³³ Ka teteret kalideinu masiitco Aku, ei nia ka bebe aili telu ngaminca. Ke ta, bulat akumateiakean ekeu, tapoi kalidei nenda kuobaake murimanua.”

³⁴ Aleginangannia si Bileam, “Amajongan aku. Ta' kuagai poi ai muririo si Tuhan ka talagat enungan masisaila aku. Tapoi kineneiget, ke masitut sipinatut Tuan ta maeru kuriuriuake puenunganan nene, totoilingan le aku.”

³⁵ Tapoi kuanangan malaikat Tuhan, “Tutnan le sangamberi sirimanua nenda. Tapoi ekeu sarat masikua apa kugugluake.” Iageti si Bileam masiriuriuake puenunganannia pasamba sangamberi sikoiniakenen Balak nenda.

Si Balak masiailiake si Bileam

³⁶ Kele aiarep si Balak aipoi si Bileam momoi, ei nia masiailiake si Bileam ka laggai Moab sikukuddu ka bebet bagat oinan Arnon ka pasongan kupkumen laggai Moab.

³⁷ Kuanangan si Balak ka tubunia, “Angoian le ta anuoi ka teteret kusogai ekeu bulat siboiki? Ta'leu pa nupaatu ta momoi kulului upam?”

³⁸ Aleginangan si Bileam, “Kineneiget amoian aku. Tapoi ta anai ronku masikua apapa sarat sigugluakenen Taikamanua le kukukua.”

³⁹ Iageti ei si Bileam pasamba si Balak ka laggai Huzot.

⁴⁰ Sedda buluakenangan si Balak piga ngamuneng pa jaui samba biribiri. Sangarubeiat sibara ka akkula nenda kaunangannia kai Bileam samba ka saute sikere pasambania.

Si Bileam masikua pamoilianannia siboiki

⁴¹ Mansep simanseman si Balak masiabbit si Bileam manatra tinambut Bamot Baal. Sibara sedda momoi iitco sangarubeiat sibara ka bangsa Israel.