4Mos. 21 - BUKO SIPUNENANPasaggangan ka bebet Horma 1 Rimata laggai Arad, tai Kanaan sikuddu ka Polak Negeb, masiarep, tai Israel moi baratda ka enungan Atarim, lepa einia pasaggak masisaggangi tai Israel, samba ambinangan pigapa sirimanua sikabe' ka talagatda. 2 Lepa galaiakerangan pupalelengan tai Israel ka tubut Tuhan kisene, “Ke' Nuake kamanangan simasun ka tubumai kalulut bangsa nenda, sirimanuania samba sangamberi laggaira tataakemaiannia geti teret sappru.” 3 Arepinangan si Tuhan panindogatdda tai Israel samba masiropake sia masikalaake tai Kanaan. Iageti pamateirangan tai Israel sangamberi tai Kanaan nenda samba sangamberi laggaira, lepa oniakerangan kudduat nenda Horma. Ulou sigalai ka tembaga 4 Lepa geti kadiuakerangan tai Israel leleu Hor, samba masienungi enungan siailiake Gukguk Akaba, addeat masibokko kupkumen laggai Edom. Tapoi katengan enungan, bangsa nenda sappru ombagadda, 5 samba paniborangan ka Taikamanua samba ka tubut Mose. Kuarangan, “Angoi anuabit kai bela sibara ka Misir? Ta' leu pa addeat masimateiake kai ka simatangeu nene? Sene' ta anai komen, samba oinan leu et ta anai. Amangauan kai komen sitaimananam nene!” 6 Iageti akenangan si Tuhan ulou simigi simalaga son ka talagat bangsa nenda. Migi amatei tai Israel aipila ulou simigi nenda. 7 Lepa oi bangsa nenda masiailiake si Mose samba kuarangan, “Amajongan kai kalulut kungunyuki kai Tuhan samba ekeu. Panindou le ka tubut Tuhan bule ulou simigi nene iareuake ka tubumai.” Iageti patiddouakenangan si Mose bangsa nenda. 8 Lepa koiniakenangan si Tuhan si Mose masigalai samuneng ulou sibara ka tembaga samba masikaunia ka pata ka sara arigi. Senen sirimanua sipilat ulou male geti ke masiitco ulou sibara ka tembaga nenda. 9 Iageti galainangan si Mose ulou sibara ka tembaga samba masikaunia ka pata ka sara arigi. Sibara ka leleu Hor ka su'sut Moab 10 Tuitui tai Israel minca, lepa pusapourangan ka laggai Obot. 11 Lepat arakaddiuake kudduat neda, pusapourangan ka karaganan Abarim ka simatangeu saigit kaiaman kupkumen laggai Moab. 12 Lepa geti pusapourangan ka su'sut Zeret. 13 Baradda sedda tuitui sia minca samba musapou ka silat bagat oinan Arnon, ka simatangeu simalio ka kupkumenda tai Amori. Bagat oinan Arnon nenda sibailiu song ka kupkumen laggaira tai Moab pasamba kupkumen laggaira tai Amori. 14 Nenda te lulunia ka bagat “Buko Pasaggangan Tuhan” atusuratake: “Desa Waheb, ka kupkumen laggai Sufa samba sangamberi su'sunia, bagat oinan Arnon 15 samba gilak sangamberi su'su simalio teret ka desa Ar samba siali ka pasongan kupkumen laggaira tai Moab.” 16 Baradda sedda ei sia ka kudduat kuanen Beer, katukolobatnia sumur simigi. Sedda aikua si Tuhan ka tubut Mose, “Koiniake sia paruru paamian, Aku masikau geti oinan ka tubudda.” 17 Ka teteret nenda uraiakerangan urai nene tai Israel, “Ale sumur simigi, bugraake oinannu, ku lo kai nia sialei urai. 18 Sumur siuggukra taikebbukat samba sia sautet bangsa siugguk pasamba tutura puutenia samba pasamba tutura toggaiat gegedda.” Baradda ka simatangeu otca sia ka Matana, 19 samba baradda sedda ei sia ka Nahaliel, lepa geti ka Bamot, 20 iageti ka su'sut kupkumen laggaira tai Moab, legret uddut leleu Pisga simatai ka simatangeu. Pasaggangan masisaggangi Sihon, rimata Hesybon ( 5Mos. 2:26–3:11 ) 21 Iageti kauarangan tai Israel punutubu ka tubut Sihon, rimata Amori, addeat masisegeake patonekat nene, 22 “Obaake kai masienungi tobbou laggai Tuanku. Kai samba tarimeumai ta tusosoip geti sibara ka enungan samba ta tuguguru' geti ka sangamberi mone ele monen anggur ele masilo oinan sibara ka sangamberi sumur. Ta' tusosoip kai sibara ka enungan sabeu teret bela kai ka kupkumen laggai Tuanku.” 23 Tapoi ta aiobaake rimata Sihon tai Israel masienungi tobbou laggainia. Ruruakenangan saladdunia, lepa ei sia ka Jahas ka simatangeu samba masisaggangi tai Israel sedda. 24 Tapoi ka pasaggangan nenda maigi saladdu Amori aramateiake sia tai Israel. Lepa kudduijirangan tai Israel kupkumen laggaira barania ka bagat oinan Arnon teret bagat oinan Jabok, iate pasonganda kupkumen laggaira tai Amon, kalulut pasongan nenda pasiddonannia bulat maron. 25 Kele kisedda araala tai Israel sangamberi laggaira tai Amori, samba Hesybon samba sangamberi laggai sigoiso ka bebenia, lepa pukuddurangan sedda. 26 Hesybon iate inan laggai kudduat rimata Sihon. Apasaggakan nia isaggangi rimata Moab samba masiala kupkumen laggaira teret ka bagat oinan Arnon. 27 Nenda te lulunia siagai mugalai urai masikua kise: “Konan kam ka Hesybon ka laggai rimata Sihon. Koba kai masiitco laggai nene turioake samba tupaeru minca. 28 Ai sangaminca sipuaaili ka laggai nene saladdut Sihon bela kele al le obengan. Sipasikakatai laggai Ar ka Moab, samba masibakkati sangamberi tinambu ka sanganantat Arnon. 29 Ale bangsa Moab, matei te ekeu! Sipasisusuru Kamos, matei ekeu! Aiobaake ekeu Taikamanuam ibailiu sipujajaujau, samba tatogam tainanalep ibailiu kabeket rimata Amori. 30 Tapoi kineneiget tuppai tubutdra matei le, ka sanganantat enungan barania ka Hesybon ka Dibon, barania ka Nasyim ka Nofah legret Medeba.” 31 Kele kisedda te arakuddu bangsa Israel ka kupkumen laggaira tai Amori. 32 Iageti koiniakenangan si Mose sangamberi sirimanua mei masigaba enungan simakope eru addeat masisaggangi laggai Jaezer. Lepa alarangan tai Israel laggai nenda samba leu sangamberi laggai sigoiso ka bebenia samba masituituiake tai Amori sikuddu sedda. 33 Lepat nenda soksokrangannia tai Israel samba enungirangan enungan sieei ka Basan. Rimata Og sibara ka Basan bela pasamba saladdunia addeat masisaggangi tai Israel ka laggai Edrei. 34 Kuanangan si Tuhan ka tubut Mose, “Bui' numaloto ka tubunia. Aku masiake geti kamanangan ka tubum. Kalaakenungan geti nia, sangamberi taikaumania samba tobbou laggainia. Galaiake le ka tubunia kele sigalaiakenennu ka tubut Sihon, rimata Amori, sikuddu ka Hesybon.” 35 Iageti tai Israel masikalaake samba masimatei Rimata Og, tatogania amba sangamberi taikaumania, ta anai sipulelegei. Lepa geti kudduijirangan tobbou laggai nenda. |
@LAI 2015
Indonesian Bible Society