4Mos. 20 - BUKO SIPUNENAN

Kamateiat Maryam

¹ Iageti sege tai Israel, iate sangamberi paamian nenda, ka kudduat simatangeu Zin, kabagat laggo siboiki, lepa pukuddurangan bangsa nenda ka Kadesh. Matei si Maryam sedda samba turateiake leu sedda.

Jot Mose samba jot Aron

² Ka sara tetere, kateteret taanai oinanda sapaamian nenda, parururangan rapurut si Mose samba si Aron,

³ samba bangsa nenda pagolurangan pasamba si Mose, kuarangan: “Maeru peile kumatei kai kateteret aramatei sasarainamai kamatat Tuhan!

⁴ Angoi nuabbit paamian Tuhan ka kudduat simatangeu nene, bule kumatei kai samba tarimeumai sedda?

⁵ Angoi nuuteake kai bela ka laggai Misir, nuambbit kai ka kudduat kamateiat nene, ta ka kudduat pasikaraman, taanai loina sileu, anggur samba delima, beringan lo' leu taanai?”

⁶ Iageti tuitui si Mose samba si Aron baratda ka paamian nenda raei ka matatbaliu Sapou Paailiat, lepa purekkukrangan manindou. Lepa matoilanangan pulatsanan Tuhan katubutda.

⁷ Kuanangan si Tuhan katubut Mose,

⁸ “Ala le' tuturanu nenda, ekeu samba si Aron, kebbunu, buita nukoiniake kam raparuru sangamberi paamian nenda; ka kamatatda kua leleu bukku nenda bule iake oinannia; kisedda te nubelaake oinan sibara ka leleu bukku nenda ka sia samba masikau lo'ra paamiaan nenda samba leu tarimeura.”

⁹ Iageti alanangan tututara nenda si Mose kamatat Tuhan, kele siparentaakenenNia katubunia.

¹⁰ Kateteret si Mose samba si Aron ailepa raruruake sapaamian ka matat leleu bukku nenda, kuanangan katubutda: “Arepake kam, ale sangamberi sirimanua sitaimareddet, Bulat kubebelaake pa kai oinan kakam sibara ka leleu nene?”

¹¹ Lepa nenda akkatnakenangan kabeinia si Mose, lepa bobonangan leleu bukku nenda pasamba tuturania rua ngaminca, iageti bela oinan simaigi, bailiu bara lo'ra paamian nenda samba leu lot tarimeura.

¹² Tapoi kuanangan si Tuhan katubut Mose samba katubut Aron: “Kalulut ta matonem bagamui ka tubukKu samba ta masuru kam pusisipunenanKu kamatatda tai Israel, iate lulunia ta nuaambit kam paamian nene tuguru ka laggai kaunenKu geti katubutda.”

¹³ Nenda te bubuaket oinan Meriba, kudduat pagolukatda ta Israel pasamba si Tuhan samba ipatoila leu pusisipunenanNia katalagatda.

Tai Edom masikeraake panindogatda tai Israel rasabau laggaira

¹⁴ Iageti kaunangan pakoiniet si Mose sibara ka Kadesh katubut rimata Edom masisesegeake patonekat: “Kise te sikuat sarainam Israel: Anuagaian sangamberi pangoringan siorak kai,

¹⁵ taikebbukatmai mei ka Misir, samba maburu akukuddu kai ka Misir samba kai samba leu taikebbukatmai ragalaiake le katubumai sikatai tai Misir;

¹⁶ pusogamaian katubut Tuhan, samba arepinangan ngangamai, koiniakenangan sara malaika samba palulunangan kai bela ka Misir. Kineneiget ai kai ka Kadesh, sara laggai kabebet pasongan laggainu.

¹⁷ Kutiddou kai bule nuobaake kusabau kai laggainu; ta mueenung kai masisabau sangamberi monen anggurnu samba ta kulolo kai oinan uggungannu; enungan sabeu le kuenungi kai ta tusosoip kai kaikatoet ele kaikatciu, teret kuaili kai pasongan laggainu.”

¹⁸ Tapoi kuarangan tai Edom katubutda, “Ta' kuobaake kai nusabau kam laggaimai, babara bebela kai kuailiake kai kam pasamba lanjau!”

¹⁹ Lepa kuarangan tai Israel katubunia: “Muenung le geti kai ka enungan sabeu, samba ke kulokai samba tarimeumai masilo oinanmui, aile kulului kainia, sarat kau le nuobaake kam kai tusubau musila, sarat nenda le.”

²⁰ Tapoi alegirangannia: “Ta momoi nutusabau kam!” Lepa bela tai Edom raei masisaggangi sia pasamba taikalaggaiatnia simigi samba leu saladdu simagege.

²¹ Kele ta araobaakenia tai Edom rasabau laggaira tai Israel, oto tusoiprangan tai Israel rakaddiuakenia.

Kamateiat Aron

²² Lepat aratuitui baratda ka Kadesh, sege sangamberi paamian Isarel ka leleu Hor.

²³ Iageti kuanangan si Tuhan kaatubut Mose samba katubut Aron kabebet leleu Hor, ka pasongan laggai Edom:

²⁴ “Si Aron tururuake le nia geti ka taikebbukatnia, kalulut ta tugugunia ka laggai kaunenKu katubutda tai Israel, kalulut ruamui ta mareddet kam ka parentaKu kabebet bubuakat oinan Meriba.

²⁵ Sogai si Aron samba si Eleazar, togania, samba ambit sia mantra ka leleu Hor;

²⁶ goloknungan bibilet Aron samba kaunungannia katubut Eleazar, togania, iageti tururuake le si Aron ka muntogat taikebbukatnia samba mateinia sedda.”

²⁷ Lepa galaiakenangan si Mose siripot siparentaakenen Tuhan. Panatrarangan ka leleu Hor oto aileu raitco sia sangamberi paamian nenda.

²⁸ Lepa goloknangan si Mose bibilet Aron samba kaunangannia katubut Eleazar, togania. Lepa matei si Aron ka uddut leleu nenda, iageti si Mose pasamba si Eleazar tugorotrangan ka leleu nenda.

²⁹ Kateteret araitconia nenda sangamberi paamian, amateian si Aron, iageti sangamberi tai Israel soibirangan si Aron telu pulu ngagogoi burunia.