4Mos. 18 - BUKO SIPUNENAN

Galaiakenen samba siloket imam samba tai Lewi

¹ Kuanangan si Tuhan katubut Aron, “Ekeu nene samba tatogam samba leu sangamberi sukum buita masibairat siript senen puseleat kam kudduat sipunenan; tapoi sarat ekeu samba leu tatogam le bulat masibabairat senen puselat sigalaiakenen kabagat puukuketnu sibaliu imam.

² Koiniake leu sasarainam, suku Lewi, sukut taikebbukatnu, numalegre kam sambamui, bule rataddeake tubutda katubum samba rapasikeli ekeu, ke ai ekeu samba tatogam kamatat Sapou surukat.

³ Buita ragalaiake galaiakenenda katubum, samba galaiakenenda pagalaiat sapou sangamberinia; sarat ka bibilet kudduat sipunenan ka kudduat pasibuluat bui' ralegreake tubutda, babara mamatei sia, ele sia samba leu ekeu.

⁴ Buita rataddeake tubutda katubum samba masigalaiake galaiakenenda pagalaiat Sapou Paailiat siripot sangamberi galajet ka Sapou nenda; tapoi sirimanua simaturere' bui' ramalegre.

⁵ Samba ekeu nene buita nugalaiake galaiakenennu pagalaiat kudduat sipunenan samba galaiakenennu pagalaiat kudduat pasibuluat, bule ta' iorak minca golu tai Israel.

⁶ Bulatnia, Aku nene amasila sasarainam, tai Lewi sibara ka talagatda tai Israel sibailiu panguruat katubum, sibailiu sirimanua sisegeakenen katubut Tuhan bule ragalaiake galaiet ka Sapou Pailiat;

⁷ tapoi ekeu nene samba leu tatogam buita raukkaake puukuketnu sibailiu imam kabagat sangamberi sipaorak ka kudduat pasibuluat samba sangamberi sibabara ka teitei kekre komak, samba buita nugalaiake; sibailiu sara puukuket panguruat Kuakenia katubum puukuketnu sibailiu imam nenda; tapoi sirimanua simaturere malegre buita tuukumake simateiakenen.”

⁸ Kuanangan minca si Tuhan katubut Aron: “Bulatnia te Akusegeakean katubum pasijajago sangamberi panguruat sikokoi katubukKu; sangamberi panguruat sipunenan sipanguruatakenenda tai Israel Kuake katubum samba ka tatogam sibailiu rubeiatmui; nenda sara siteuakenen teret buruburu.

⁹ Nene te rubietnu sibara ka sangamberi panguruat bulat sipunenan nenda, iate sibara ka rubeiat ta laboakenen: sangamberi panguruatda ele buluakenen sinantatakenen, buluakenen pasiappet jo, samba buluakenen pasiposat pusitebui sele, siluluira katubukKu; nenda rubeiat bulat sipunenan sibailiu rubeiatnu samba ka tatogam.

¹⁰ Sibailiu rubeiat bulat sipunenan buita nukom; sangamberi taimanteu momoi rakomnia; buita rubeiat sipunena nenda kekeu.

¹¹ Samba nene leu rubeiatnu: panguruat sikokoi sibara ka siakera bagei, kisedda leuet sangamberi panguruat sitotoiakenenda tai Israel; sangamberinia nenda Kuake katubum samba ka tatogam taimanteu samba tainanalep pasambamui; nenda sara siteuakenen teret buruburu. Sangamberi sirimanua simalina kabagat lalepnu momoi rakomnia.

¹² Sangamberi bulat simaeru sibara ka tula samba sangamberi bulat simaeru sibara ka anggur samba gandum, iate sibailiu bua siboiki rapanguruatake katubut Tuhan, Kuake katubum.

¹³ Bua siboiki sibara ka sangamberi sipututu'tu ka polak rapanguruatake katubut Tuhan iate leuet rubeiatnu; senen sirimanua simalina kabagat lalepnu momoi rakomniania.

¹⁴ Sangamberi sikokoiakenen rubeiat Tuhan katalagatda tai Israel ibailiu rubeiatnu.

¹⁵ Sangamberi siputututu mata siboiki sibara ka suruket sangamberi sipuririmanua, sipanguruatakenenda katubut Tuhan, ele sirimanua ele tarimeu, iate rubeiatnu; sarat kau le nutebui togat sirimanua sikebbukat, kisedda leuet togat tarimeu sikebbukat kasitsitakenen buita nutebui.

¹⁶ Pagalaiat bulagat pasitebuinia, barania ka sipurura sangalaggo buita nutebui siripot iginia, iate lima ngasyikal perak tukilo siripot syikal sipunenan; syikal nene ruapulu gera sanenia.

¹⁷ Tapoi togat jaui sikebbukat, biribiri ele kambing bui' nutebuinia; sangamberinia nenda sipunenan; logaunia buita nusubuiake ka kudduat pasibuluat samba tabenia tulabo sibialiu buluakenen silabo singinnia siangkaake bagat Tuhan;

¹⁸ tapoi akkulania iate rubeiatnu makere kele ukduk panguruat samba bakkapat sikattoet.

¹⁹ Sangamberi panguruat sikokoi, iate panguruat sipuenan sipanguruatakenenda tai Israel katubut Tuhan, Kuake katubum samba ka tatogam taimanteu samba tainanalep sambamui; nenda sara siteuakenen teret buruburu; nenda te sara palelengan garam teret buruburu kamatat Tuhan kakam samba ka muntogatnu.”

²⁰ Kuanangan si Tuhan katubut Aron: “Taanai nusisilo kalaggaira bakkat ikepakenen samba ta nusisilo rubeiat katalagatda; Aku le' rubeiatnu samba bakkat ikepakenennu katalagatda tai Israel.

²¹ Pagalaiat suku Lewi, bulatnia te Kukau katubutda sangamberi panguruat seperpulu katalagatda tai Israel sibailiu ikepakenennia, masisaili galajet sigalaiakenenda, galajet ka Sapou Paailiat.

²² Oto buian ramalegre tai Israel ka Sapou Paailiat, bailiu rabaraake le jo katubutda, lepa matei sia;

²³ tapoi tai Lewi, sia le bulat masigagalaiake galajet ka Sapou paailiat samba buita rabairat siripot puseleatda; nenda sara siteuakenen teret buruburu sipupaninikat kam. Ta' rasisilo bakkat ikepakenen katalagatda tai Israel,

²⁴ kalulut panguruat seperpulu sipanguruatakenenda tai Israel katubut Tuhan sibailiu panguruat sikokoi Kukau katubutda tai Lewi sibailiu bakkat ikepakenenda; nenda lulunia akukuania pagalaiat sia: Ta rasisilo bakkat ikepakenen katalagatda tai Israel.”

²⁵ Kuanangan si Tuhan katubut Mose:

²⁶ “Samba leu minca buita manibo ekeu katubutda tai Lewi samba masikua katubutda: Ke nusilo kam sibara ka rubeiatda tai Israel panguruat seperpulu siakeKu katubumui sibara ka rubeiatda sibailiu bakkat ikepakenennu, oto buita nupanguruatake kam sangarueiat sibara kapanguruat nenda sibailiu panguruat sikokoi katubut Tuhan, iate panguruat seperpulumui sibara ka panguruat ka seperpulu nenda,

²⁷ samba panguruat nenda tuaddeake le geti sibailiu panguruatmui sikokoi, makere kele gandum sibara kudduat pasigulunan samba makere kele bua sibara ka kudduat pasipionan anggur.

²⁸ Ka enungan kele kisedda kam leu buita nupanguruatake kam sibailiu panguruat sikokoi katubut Tuhan sangarubeiat sibara ka sangamberi panguruat seperpulu sisilomui sibara ka rubeiatda tai Israel. Samba sipanguruatakenen sibara katubutda sibailu panguruat sikokoi katubut Tuhan buita nukau katubut imam Aron.

²⁹ Ka sangamberi siake katubum, iate sibara katalaga sangamberi bulat simaeru, buita nupanguruatake sangamberi panguruat sikokoi katubut Tuhan, sibailiu rubeiat sipunenan katubunia.

³⁰ Samba kua minca katubutda: ke nukokoiake kam bulat simaeru sibara katubunia, oto ka tai Lewi pagalaiat nenda buita tuaddeake sibailiu bua kudduat pasigulunan samba bua pasipionan anggur;

³¹ momoi nukomnia ka senen kudduat, ekeu samba sangalalepnu, kalulut upam te nenda, masisiliake pugagalainu ka Sapou Paailiat.

³² Samba kabagat pagalaiat nenda ta ibabaraake jo katubum, sarat kau le nukokoiake bulat simaeru sibara sedda; kisedda ta' nupasabau geti pusisipunenannia sangamberi panguruatda tai Israel sibailiu panguruat sipunenan, samba ta' mamatei ekeu.”