4Mos. 16 - BUKO SIPUNENAN

Pukelakat patuat Korah, Datan samba Abiram

¹ Si Korah togat Jizhar togat Kehat, togat Lewi, pasamba si Datan samba si Abiram tatogat Eliab, samba si On togat Pelet, telutda sibara ka suku Ruben masina'na sangamberi sirimanua

² bule ramakela patuat rasaggangi si Mose, samba leu rua ngotu lima pulu sia tai Israel, sautet paamian nenda, iate sangamberi sirimanua sipili kabagat parurukat, sangamberidda siabeu tiboi tubu.

³ Iageti parururangan rapurut si Mose samba si Aron, samba kuarangan katubutda ruatda: “Kineneiget metnangan nenda! Sangamberi paamian nenda iate sirimanua sipunenan, samba Tuhan ai katalagatda. Angoi nupabuak tubum ka paamian Tuhan?”

⁴ Kateteret aiarep pagalaiat nenda si Mose, purekkuknangan.

⁵ Samba kuanangan katubut Korah samba ka sipasitututnia, “Mansep simanseman ipaagai te si Tuhan, kasei bulat bakkatNia, samba kasei sipunenan, samba iobaake le sirimanua nenda ramalegre katubuNia; kokoiakenen ka tubuNia; sirimanua sipiliNia iobaake le ramaelgre katubuNia

⁶ Galaiake kisene: ala sangamberi kudduat obengan, ale Korah, samba kam sangamberi sipasitututnia,

⁷ kau ka bagania obengan samba kau kumanyang ka uddutnia, ka mansepnia kamatat Tuhan, samba sirimanua sipilit Tuhan, nia te sipunenan. Metnangan nenda, ale sangamberi tai Lewi!”

⁸ Lepa kuanangan si Mose katubutda Korah, “Arep pei kam boiki, ale tai Lewi!

⁹ Tapei pa metnangan kakam, ipasaraake le' kam Taikamanuan Israel ka paamian Israel samba iobaake numalegre kam katubuNia, bule nugalaiake kam galajet ka Sapou Sipunenan Tuhan samba mupuukuket ka paamian nenda nupasikeli kam sia,

¹⁰ samba tuobaake le' ekeu numalegre pasamba sangamberi sasarainam tai Lewi? Samba kineneiget nutitiddou peile minca puukuket imam?

¹¹ Kalulut nenda, ekeu nene samba sangamberi sipasittutut ekeu, musara kam masisaggangi si tuhan. Kalulut kasei pa' si Aron, bailiu pungunyumuian katubunia?”

¹² Si Mose aikoiakean sirimanua masisogai si Datan samba si Abiram, tatogat Eliab, tapoi alegiatda: “Ta koba kai moi.

¹³ Tapei pa metnangan, nuuteake kai bela ka sara laggai sipususukkra susu samba suat mani bule nuobaake kumatei kai ka kudduat simatangeu, bailiu aipeile nubabailiuake tubum tuan katubumai?

¹⁴ Bulatnia, ta anuambit kai ka laggai sipususukkra susu samba suat mani, ele nuake kakai sangamberi monen anggur sibailiu bakkat ikepakenen. Kipangan le' nupajojo sangamberi sirimanua nene? Ta'kuobakai moi.”

¹⁵ Iageti magolunangan simakope si Mose samba kuanangan katubut Tuhan, “Bui' nupuletsei sangamberi panguruatda. Tapei amuaili akuala sangamuneng kalidei sibara ka sia, samba tapei anai akugalai sikatai ka sara sirimanua katalagatda.”

¹⁶ Lepa kuanangan si Mose katubut Korah: “Mansep ekeu nene samba sangamberi sipasitutut ekeu buita mei kamatat Tuhan, ekeu samba sia samba leu si Aron.

¹⁷ Senesenemui buita nuambit kam kudduat obenganmui kaumuian kumanyang ka uddutnia, lepa senesenemui panguruatakemuian kudduat obenganmui kamatat Tuhan, ruangotu limapulu kudduat obengan; kisedda leu ekeu samba si Aron senesenenda masiambit kudduat obenganda.”

¹⁸ Iageti senenda masiambit kudduat obenganda, kaurangan obengan ka uddutnia, kaurangan kumanyang ka uddutnia, lepa puriorangan kamatat matatbaliu Sapou paailiat, kisedda leuet si Mose samba si Aron.

¹⁹ Kateteret airururuake si Korah sangamberi paamian nenda rasaggangi sia ruatda kamatat matatbaliu Sapou Paailiat, makoinongnangan pulatsanan Tuhan sangamberi paamian nenda.

²⁰ Lepa kuanangan si Tuhan katubut Mose samba katubut Aron,

²¹ “Saraake kam tubumui ka talagat paamian nene, bule Kusubuake sia kabagat sangapeipeikat mata.”

²² Tapoi murekkuk le' sia ruatda samba kuarangan, “Oi Taikamanua, Taikamanua sibara ka ketsat sangamberi sipungongongoi! Sara lesirimanua simajo, Kipangan le Nupugogolu ka sangamberi parurukat nene?”

²³ Iageti kuanangan si Tuhan katubut Mose:

²⁴ “Kua katubutda paamian nenda: Putuitui kam ka sangaliot bebet kudduat Korah, Datan samba Abiram.”

²⁵ Lepa ei si Mose samba katubut Datan samba Abiram, samba sangamberi sikebbukat laggai Israel.

²⁶ Kuanangan katubutda paamian nenda: Eddangan nualegi kamnia ai kam ka sapoura sangamberi sirimanua sikatai nene samba bui' iorak kam aponia pa' bakkatda bule bui numatei kam kalulut sangamberi jotda.”

²⁷ Lepa areuakerangan tubudda kasangalio kudduat Korah, Datan samba Abiram. Bela si Datan samba si Abiram, lepa puriorangan kamatat matatbaliu sapoura sambatda tainanalepda, tatogania samba togatda sigoiso.

²⁸ Lepa nenda kuanangan si Mose: “Ka nene te nuaagai kamnia, aikoiniakean aku si Tuhan masigalaiake sangamberinia nene, samba nenda ta sibara ka patuatku:

²⁹ ke matei sangamberi nene kele ramatei senen sirimanua, samba rananam sinanamra senen sirimanua, oto aku ta sikoiniakenen Tuhan.

³⁰ Tapoi, ke ibaraake si Tuhan sitapei amuaili, samba polak ingangaake ngungunia samba ikoilo sia samba leu sangamberi bakkatda, bailiu tugorosotrangan sipuririmanua ka laggaira simamatei, oto agaimuiannia, sangamberi sirimanua nene arapaloloian si Tuhan.”

³¹ Simaruei le ailepa aitiboake sangamberi tiboiet nenda, oto masilanangan polak kateira,

³² samba nga'ngaakenangan ngungunia polak samba koiloknangan sia pasamba sangamberi sibabara ka lalepnia samba sangamberi sirimanua sibabara katubut Korah samba leu sangamberi sibabara katubutda.

³³ Kisedda te sia pasamba sangamberi sirimanua sibabara katubutda tujunung sipuririmanua ka laggaira simamatei; samba tabbonangan sia polak, bailiu masuburangan katalagat paamian nenda.

³⁴ Samba sangamberidda tai Israel sigoilik sia pabalaurangan raarep gereira, kalulut rakua: “Babara ikokoilo leuet sita polak!”

³⁵ Samba leu bela obengan, sibara kai Tuhan, lepa labonangan si rua ngotu lima pulu sia sipangunguruatake kumanyang nenda.

³⁶ Kuanangan si Tuhan katubut Mose:

³⁷ “Kua katubut Eleazar, togat imam Aron, bule iakkatake sangamberi kudduat obengan katalagat simalalabo nenda, lepa soksokake nungan obengan nenda ka sareunan, kalulut sangamberinia nenda sipunenan,

³⁸ iate kudduat obenganda sangamberi sirimanua sijo silepa ilului engania, iageti sangamberinia nenda buita tupaddai simanimpi ibailiu lakket kudduat pasibuluat, aipoi araambitnannia sangamberi sirimanua nenda ka matat Tuhan, oto sangamberinia nenda sipunenan; oto kisedda pagalaiat nenda ibailiu toggaiat ka tai Israel.”

³⁹ Iageti imam Eleazar masiala sangamberi kudduat obengan sigalai katembaga siambitda sirimanua simalalabo nenda, lepa paddainangannia ibailiu lakket kudduat pasibuluat.

⁴⁰ Nenda bailiunangan repdemen ka tai Israel, bule bui' tuottou sirimanua sabagei ta sibara ka muntogat Aron masilabo kumanyang kamatat Tuhan, samba bui' ibailiunia kele si Korah samba sipasitututnia – siripot sikuat Tuhan katubunia sisegeakenen katubut Mose.

⁴¹ Tapoi ka mansepnia pungunyukrangan sangamberi paamian Israel katubut Mose samba katubut Aron, kuarangan: “Anumateiakean kam paamian Tuhan.”

⁴² Kateteret ai parururu paamian nenda rasaggangi si Mose samba si Aron, samba pitcaakerangan matatda ka isit Sapou Paailiat, itcorangan tanai rusa nenda masitabbonia samba matoilanangan pulatsanan Tuhan.

⁴³ Lepa ei si Mose samba si Aron kamatat Sapou Paailiat,

⁴⁴ iageti kuanangan si Tuhan katubut Mose:

⁴⁵ “Tuitui le' katalagatda sapaamian nene, bule kusubuake sia kabagat sangapeipeikat mata.” Lepa purekkukrangan.

⁴⁶ Kuanangan si Mose katubut Aron, “Ala kudduat obengan, kau ka bagania obengan sibara ka kudduat pasibuluat samba kaunungan kumanyang, samba kenan simaruei katubutda paamian nenda samba baraake pasiabanan katubutda, kalulut golut Tuhan amuoloian, samba ukuman aian itatatdaake.”

⁴⁷ Iageti alanangan si Aron kudduat obengan, siripot sikuat Mose, samba pabalaunangan katalagat paamian nenda, samba matoilanangan ukuman aian itatatdaake katalagat bangsa nenda; lepa garaiakenangan kumanyang samba baraakenangan pasiabanan ka bangsa nenda.

⁴⁸ Kateteret aipurio katalagat sangamberi sirimanua simamatei samba sirimanua sipuririmanua, puarinangan ukuman nenda.

⁴⁹ Samba sia simamatei kalulut ukuman pulu epat ngaribu pitungotu sia igitda, tapei atuadde sangamberi sirimanua simamatei kalulut pakarot Korah.

⁵⁰ Kateteret aitoili si Aron katubut Mose ka matat matatbaliu Sapou Paailiat, ukuman nenda amuaringan.