4Mos. 15 - BUKO SIPUNENAN

Buluakenen silabo

¹ Kuanangan si Tuhan katubut Mose:

² “Panibo katubutda tai Israel samba kua katubutda: Ke' tuguru kam ka laggai akenenKu katubumui ibailiunia kudduatmui,

³ samba nupanguruatake kam buluakenen silabo katubut Tuhan, jaui ele biribiri, ele buluakenen sirarak ele buluakenen sija'ja, ele pasilului sara palelengan sikokoi, ele sibailiu panguruat ka teu baga ele kateteret punenmui, samba kabagat nenda masipatarek singin siangkaake bagat Tuhan,

⁴ oto sirimanua sipanguruatake panguruatnia nenda katubut Tuhan, buita ipanguruatke sibailiu buluakenen sinantatakenen seperpulu efa tapung bulat simaeru, tugalai pasamba seperempat hin tula.

⁵ Samba pasamba buluakenen sirarak ele buluakenen sija'ja nenda buita nupanguruatake leu seperempat hin anggur sibailiu buluakenen siuruakkenen, ka senen ngamuneng biribiri panguruatakenen.

⁶ Tapoi ke panguruatnu nenda sangamuneng biribiri simanteu, buita nupanguruatake sibailiu buluakenen sinantatakenen rua perpulu efa tapung bulat simaeru, tugalai pasamba sepertelu hin tula,

⁷ samba sibailiu buluakenen siuruakenen buita nupanguruatake sepertelu hin anggur, sibailiu singin siangkaake bagat Tuhan.

⁸ Samba ke nugalai sangamuneng jaui, sibailiu buluakenen sirarak ele sibailiu buluakenen sija'ja, ele pasilului sara palelengan sikokoi ele sibailiu buluakenen puaraugat katubut Tuhan,

⁹ oto pasamba jaui nenda tupanguruatake sibailiu buluakenen sinantatakenen telu perpulu efa tapung bulat simaeru, tugalai pasamba iletalaga hin tula,

¹⁰ samba sibailiu buluakenen siuruakenen buita nupanguruatake iletalaga hin anggur. Nenda te singin buluakenen silabo siangkaake bagat Tuhan.

¹¹ Kisedda te bulat tugagalaike senen ngamuneng jaui samba senen ngamuneng biribiri simanteu samba ngamueng biribiri ele kambing.

¹² Kenanen piga pa' iginia tarimeu nugalai, ka senen tarimeu nenda buita nugalai kisedda leuet.

¹³ Senen tai Israel siturerere buita igalaiake kisedda, ke ipanguruatke buluakenen silabo singinnia siangkaake bagat Tuhan.

¹⁴ Ke sirimanua siooiake aturerengannia mukuddu katubumui, ele sabagei sikuddu katalagamui ele katalagat muntogatmui, ioba ipanguruatake buluakenen silabo singinnia siangkaake bagat Tuhan, oto kele sigalaiakenenmui, kisedda leuet igagalai.

¹⁵ Pagalaiat paamian nenda, buita ai sara siteuakenen kakam samba ka sirimanua siooiake sikuddu katubumui; nenda te sara siteuakenen teret buruburu kakam sipupaninikat: kakam samba ka sirimanua siooiake buita makere kamatat Tuhan.

¹⁶ Sara surukat samba sara enung galaiakenen tugalaiake kakam samba ka sirimanua siooiake sikuddu katubumui.”

¹⁷ Kuanangan minca si Tuhan katubut Mose:

¹⁸ “Panibo katubutda tai Israel samba kua katubutda: Ke' tuguru kam ka laggai, kaipa geti Kuambit kam,

¹⁹ oto ke nukom kam roti bua sibara ka laggai nenda buita nuoanguruatake kam panguruat sikokoi katubut Tuhan.

²⁰ Tapung jelaimui siboiki buita nupanguruatake kam sibialiu panguruat sikokoi kele roti simamuine; sibara ka bua pasigetaiatmui, kisedda te bulat nupanguruatake kamnia.

²¹ Sibara ka tapung jelaimu siboiki buita nusegeake panguruat sikokoi katubut tuhan, sipupaninikat.”

Jo taipapaliket

²² Ke' sitaipapaliketmui ta nupuuku kam sara ka sangamberi parenta nene, sikuat Tuhan katubut Mose,

²³ iate sangamberi siparentaakenen Tuhan katubumui sisegeakenen katubut Mose, barania ka gogoi aiake si Tuhan sangamberi parentaNia samba simariuriu teret mupaninikat,

²⁴ samba ke' paamian nenda masigalaiake taiaagaietda, taipapaliket baga, oto sangamberi paamian buita ragalai sangamuneng jaui simanteu sibau tubu sibailiu buluakenen sirarak sibailiu singinnia siangkaake bagat Tuhan, sialei buluakenen sinantatakenen samba buluakenennia siuruakenen, siripot enung galaiakenen; samba leu sangamuneng kambing simanteu sibailiu buluakenen pasiappet jo.

²⁵ Oto si imam buita igalaiake si pasiabanan ka sangamberi paamian Israel, bailiu silorangan katuappekat, kalulut aipuaili pagalaiat nenda taipapaliket baga, samba kalulut araambit sangamberi panguruatda sibailiu buluakenen silabo katubut Tuhan, samba leu buluakenen pasiappet jotda kamatat Tuhan, kalulut pagalaiat taipapaliket baga nenda.

²⁶ Sangamberi paamian Israel rasilo geti katuappekat, kisedda leu sirimanua siooiake sikuddu ka talagamui, kalulut nenda ragalaiake le' sangamberi bangsa nenda ka taipapaliket baga.

²⁷ Ke' sara sirimanua le' amasigalai jo sitaipapaliket baga, iageti buita ipanguruatake kambing sinanalep sisangarura sibailiu buluakenen pasiappet jo;

²⁸ samba imam buita ibaraake pasiabanan kamatat Tuhan ka sirimanua sigalai jo taipapaliket baga nenda, bailiu sirimanua nenda silonangan katuappekat kalulut atubaraakean pasiabanan katubunia.

²⁹ Ka tai Israel siturerere samba leu sirimanua siooiake sikuddu katalagmui, sara surukat le' tugalaiake katubutda sipaorak ka sirimanua pasigagalai jo taipapaliket baga.

³⁰ Tapoi sirimanua sigalaiake sara sipalit baga, ele tai Israel siturerere, ele sirimanua siooiake, sirimanua nenda ibailiu sipaloloi si Tuhan, buita tutataakenia katalagat bangsania,

³¹ kalulut aiaddeake le' loloiet tiboiet Tuhan samba ipasili le' parentaNia; bulat tutataake le sirimanua nenda, ibairat le siripot puseleatnia.”

Sirimanua sipasabau enung galaiakenen gogoi Sabat

³² Kateteret ai sia tai Israel ka kudduat simatangeu, ailinangan sia sara sipasirururuake loina paneu ka gogoi Sabat.

³³ Lepa ailirangannia sirimanua airururuake loina paneu, ambitrangannia katubut Mose samba katubut Aron samba ka sangamberi paamian nenda.

³⁴ Lepa sirimanua nenda guruakerangannia ka bagat tangsi, kalulut tapei atuteuake aponia tugagalaiake katubunia.

³⁵ Iageti kuanangan si Tuhan katubut Mose, “Sirimanua nenda buita tuukum ukuman simateiakenen; sangamberi paamian Israel buita rapabaijunginia bukku ka ujat kudduat pusapougat.”

³⁶ Lepa giritrangannia sangamberi paamian ka ujat kudduat pusapougat, iageti pabaijungirangannia bukku, bailiu mateinia, siripot sikuat Tuhan katubut Mose.

Pasirepdeman simajai ka leppei

³⁷ Kuanangan si Tuhan katubut Mose:

³⁸ “Panibo le' ka tai Israel samba kua katubutda, buita ragalai simajai ka tu'tut leppeira, samba kabagat simajai nenda buita tukau banang simasuat laiket simakalimun.

³⁹ Oto simajai nenda masiparepdep kam, ke' nuitso bai kam, ka senen parentat Tuhan, pat galaiakemuiannia samba taan nututut kam patuatmui ele matamui, kele simatukkle nugalaiake kam kabagat tai matopitmui katubut Tuhan.

⁴⁰ Bule nurepdep kamnia samba nugalaiake kam sangamberi parentakKu samba bailiunangannia sipunenan ka Taikamanuamui.

⁴¹ Aku te Tuhan Taikamanuamui, sipasiambit kam bela ka laggai Misir, bule ibailiu Aku Taikamanuamui; Aku te' Tuhan, Taikamanuamui.”