4Mos. 14 - BUKO SIPUNENAN

Pukelakat paatuat paamian Israel

¹ Iageti pugereirangan sabeu nganga paamian nenda samba ka soibo nenda pusourangan bangsa nenda.

² Pungunyukrangan sangamberi tai Israel katubut Mose samba katubut Aron; samba kuarangan sangamberi paamian nenda katubutda: “Ah, Maeru peile kumatei kai ka laggai Misir, ele ka kudduat simatangeu nene!

³ Angoi iambit kai si Tuhan ka laggai nene, bule kumatei kai ka lanjau, samba sinanalepmai samba tatogamai ibailiu tangsiakenen? Ta pa maeru peile kutoili kai ka laggai Misir?”

⁴ Samba kuarangan ka pasasambatda: “Kauan tauddetake sara saute, lepa toili sita ka Misir.”

⁵ Lepa purapporangan si Mose samba si Aron ka matatda sangamberi paamian Israel siparururu sedda.

⁶ Tapoi si Josua togat Nun samba si Kaleb togat Jefune, rua katalagatda sipananaiko nenda, biritakerangan leppeira,

⁷ samba kuarangan ka sangamberi paamian Israel: “Laggai sienungimai samba sitaikomai nenda iate bulat simakope eru.

⁸ Ke ioba bagania si Tuhan katubutta, oto abbitnangan leu sita tuguru ka laggai nenda samba akenangannia geti katubuta, sara laggai sipususukkra susu samba suat mani.

⁹ Sarat, bui tumakela patuat katubut Tuhan, samba bui' numaloto kam katubutda tai bangsa ka laggai nenda, kalulut takokoilo le' sia ratata. Sipasisakkeri sia arakaddiuakean sia, tapoi si Tuhan ipaalei le' sita; ba' maloto kam katubutda.”

¹⁰ Lepa lotorangan sia paamian Israel rapabaijungi sia bukku. Tapoi matoilanangan pulatsanan Tuhan ka Sapou Paailiat ka sangamberi tai Israel.

¹¹ Kuanangan si Tuhan katubut Mose, “Pigangan le' burunia rapaloloi Aku tai bangsa nene, samba pigangan le burunia ta raoba mutonem baga katubukKu, kenanen Akugalaian maigi kiseiet ka talagatda!

¹² Kubo'bo le sia geti pasamba besi simasappo samba masitataake sia, tapoi ekeu Kubailiuake le geti bangsa bulat siabeu samba bulat simaron bele peile sia.”

¹³ Lepa kuanangan si Mose katubut Tuhan, “Ke' raarep bai pagalaiat nenda tai Misir, siripokatnia anupalulungan bangsa nene kabagat gegem sibara katalagatda,

¹⁴ rapumumuanake le geti katubut sikudduiji laggai nene, sipasiarep, Ekeu, Tuhan, ai katalagat bangsa nene, samba Ekeu, Tuhan masipatoila tubu kamatatda, sipamamatai, kateteret aipurio tanai rusam kapata ka ipo'ra samba kateteret anupuenung muboiki ka sia kabagat tanai rusa sipununuijat kateteret sinago samba ka arigit obengan katetetret sinoibo.

¹⁵ Oto ke' Numateiake bangsa nene pat sappru, iageti sangamberi bangsa sipasiarep katuareman pagalaiat Ekeu nenda, kuarangan:

¹⁶ Kalulut taanai geget Tuhan masiambit bangsa nene tuguru' ka laggai sipalelekakenenNia ka suppa katubutda, iageti Ija'ja' le sia ka kudduat simatangeu.

¹⁷ Oto kineneiget, eddangannia puroron Tuhan nenda matoila puaabeunia, kele sitiboakenNu:

¹⁸ Tuhan nenda simaom baga samba katet bagaNia sipususukkra, iappeake le' puseleat samba pinasabau, tapoi bulat ta' ibebelaake sirimanua simasele kabagat ukuman, samba leu ilumunake le puseleat ukkui katubutda tatogania, ka reddenan sikatelu samba sikaepatnia.

¹⁹ Appeake le' puseleat bangsa nene siripot beunannia katet bagam, kele anuappeake bangsa nene barania peile ka Misir pat aili sene'.”

²⁰ Kuanangan si Tuhan, “Kuappeake le siripot sinindounu.

²¹ Sarat, kalulut Aku sipuririmanua samba pulatsanan Tuhan masilakkup sangalio polak:

²² sangamberi sirimanua sipasiitco pulatsananKu samba sangamberi kiseiet sigalaiakenenKu ka Misir samba ka kudduat simatangeu, tapoi pulungamincaan aisibo Aku samba ta' ioba masiarepi tiboietKu,

²³ bulat taiitco te laggai sipalelekanenKu kabagat suppa katubut taikebbukatda! Sangamberi sipaloloi Aku nene ta raiitconia.

²⁴ Tapoi paguguletKu si Kaleb, kalulut bagei le patuatnia samba itutake le Aku ka muinet patuatnia, Kuambit le nia tuguru ka laggai sigurukinia nenda, samba bakkatirangannia geti samuntogatnia.

²⁵ Tai Amalek samba tai Kanaan mukuddu ka su'su. Kalulut nenda toiliake kam mansep samba kenan kam ka kudduat simatangeu, ka isit Koat Tiberau.”

²⁶ Kuanangan minca si Tuhan katubut Mose samba katubut Aron:

²⁷ “Pigangan le' burunia rapungunyuk paamian sikatai nene katubukKu? Akuarepan sangamberi ngunyukra tai Israel.

²⁸ Kua katubutda: Kalulut Aku sipuririmanua, kise te tiboiet Tuhan, kele sikuamui katubukKu, kisedda te Kugagalaiake katubumui.

²⁹ Musaragai le' geti sangamberi tolatmui ka kudduat simatangeu nene, iate sangamberi sirimanua katalagamui sitususurat oni, sangamberi sipururura rua pulu kapata, kalulut amungunyu' kam katubukKu.

³⁰ Bulania te ta' tuguguru kam ka laggai kabagat suppa sipalelekanenKu akenenKu kudduijietmui, sarat si Kaleb togat Jepune samba si Josua togat Nun le'!

³¹ Pagalaiat kam tatogamui sikuamui: Ibailiu le sia geti tangsiakenen, sia le geti Kuambit tuguru, bule raagai laggai sipaloloimui nenda.

³² Tapoi pagalaiat kakam, sangamberi tubumui simamatei musaragai le geti ka kudduat simatangeu nene,

³³ amba mujaujau le geti tatogamui sibailiu sipasijago tarimeu ka kudduat simatangeu epat pulu ngarura burunia samba bairatrangan geti siripot taimariuriu topit, teret itata tubumui simamatei ka kudduat simatangeu.

³⁴ Siripot igit gogoi anutaiko kam laggai nenda, iate epat pulu ngagogoi, sangagogoi tuaddeake sangarura, oto epat pulu ngarura burunia buita nubairat kam siripot puseleatmui, bule nuagai kam besiknia, ke mutuitui Aku katubumui:

³⁵ Aku, Tuhan, amasikua kisedda. Bulatnia te Kugagalaiake te nenda ka sangamberi nenda katubut paamian sikatai nene sipukekere baga masisaggangi Aku. Sappru le sia geti ka kudduat simatangeu nene samba sene te ramamatei.”

³⁶ Sangamberi sirimanua sikoiniakenen Mose masitaiko laggai nenda, sitotoili samba sibailiuake rapungunyuk sangamberi paamian nenda katubut Mose kabagat masiambit katuareman sikatai pagalaiat laggai nenda,

³⁷ sangamberi sirimanua nenda matei, aiorak sia ukuman kamatat Tuhan.

³⁸ Tapoi sipuririmanua katalagat sangamberi sirimanua sieei masitaiko laggai nenda sarat si Josua togat Nun samba si Kaleb togat Jepune.

Taipuririuriunia pasaggangan ka rubeiat sikaiaman

³⁹ Lepat aisegeake si Mose tiboiet nene ka sangamberi tai Israel, oto pureureurangan baga simakope bangsa nenda

⁴⁰ Samba ka mansepnia tusururangan simanseman rapanatra ka uddut leleu sialei masikua: “Kineneiget mei sita ka laggai sikuat Tuhan nenda; kirenangan atagalaiakean jo.”

⁴¹ Tapoi kuanangan si Mose: “Angoi nuoba kam masipasabau parentat Tuhan? Ka pagalaiat nenda ta babara puuktungan.

⁴² Bui' nuei kam, kalulut taanai si Tuhan katalagamui, bule bui' rakalaake kam saggakmui,

⁴³ kalulut tai Amalek samba tai Kanaan ai sia sedda kamatamui samba matei le kam geti ka lanjau; aikabaraijinia kalulut anukateiteiake kam si Tuhan, oto si Tuhan ta' ipaalei kam.”

⁴⁴ Kenanen kisedda, matuggru le sia manatra ka uddut leleu nenda, tapoi peti pakerekat bagat Tuhan samba si Mose leu ta' arakaddiuake kudduat pusapougat.

⁴⁵ Iageti tugorotrangan tai Amalek samba tai Kanaan sikukuddu paleleuleleu nenda samba saggangirangan sia; iageti sangamberi sirimanua nenda saragaiakerangan sia pat aili ka Horma.