4Mos. 13 - BUKO SIPUNENAN

Sipulurua sipananaiko

¹ Panibonangan si Tuhan katubut Mose:

² “Koiniake piga pa' sirimanua masitaiko laggai Kanaan, kaunenKu ka tai Israel; sibara ka senen sukut taikebbukatda buita nukoiniake sara sirimanua, sangamberitda saute ka talagatda.”

³ Lepa koiniakenangan sia si Mose baradda ka kudduat simatangeu Paran, siripot parentat Tuhan, sangamberidda nenda iate saute ka talagatda tai Israel.

⁴ Samba nene te oninda: Sibara ka suku Ruben: Syamua togat Zakur;

⁵ sibara ka suku Simeon: si Safat togat Hori;

⁶ sibara ka suku Jehuda: si Kaleb togat Jefune;

⁷ sibara ka suku Isakhar: si Jigal togat Josep;

⁸ sibara ka suku Efraim: si Hosea togat Nun:

⁹ sibara ka suku Benjamin: Palti togat Rafu;

¹⁰ sibara ka suku Zebulon: si Gadiel togat Sodi;

¹¹ sibara ka suku Josep iate sibara ka suku Manasye: si Gadi togat Susi;

¹² sibara ka suku Dan: si Amiel togat Gemali;

¹³ sibara ka suku Asyer: si Setur togat Mikhael;

¹⁴ sibara ka suku Naftali: si Nahbi togat Wofsi;

¹⁵ sibara ka suku Gad: si Guel togat Makhi.

¹⁶ Nenda te oninda sangamberitda sikoiniakenen Mose sipasitataiko laggai nenda, samba si Mose masioniake si Hosea togat Nun nenda bailiu Josua.

¹⁷ Oto koiniakenangan sia si Mose masilelekake laggai Kanaan, kuanangan katubudda: “Putuitui kam baramui sene nuei kam Polak Negeb samba panatra kam ka leleu,

¹⁸ samba lelekngake kam kipa pagalaiat laggai nenda, maron leu pa tubutda silaggijinia ele ta maron tubutda, goiso le sia, ele maigi sia;

¹⁹ samba kipa laggai kudduijietda, maeru ele makatai, kipa sangamberi laggai sabeu kudduijietda, mukuddu pa sia ka sangamberi kudduat simauja ele ka kudduat pujagoat simaron,

²⁰ samba kipa polak nenda, mamo'mo leu pa ele makainang, aileu pa' sedda paloinaloina ele taanai. Omake kam bagamui samba ambit kam goiso bua sibara ka laggai nenda.” Tereret nenda iate gogoi pubuaijat buat anggur siboiki.

²¹ Iageti ei sia sedda, lepa lelekakerangan laggai nenda barania ka kudduat sumatangeu Zin pat aili ka Rehob, ka enungan siei ka Hamat.

²² Puenungrangan masienungi Polak Negeb, lepa aili ka Hebron; seda ai si Ahiman, Sesai samba Talmai, muntogat Enak. Aiturioake Hebron pitu ngarura kepei laggai Soan ka Misir.

²³ Kateteret aeasege ka su'sut Eskol, tippurangan sedda sara ran pasamba sangaonti buat anggur, lepa bairatrangannia ruatda; samba leu ambitrangan piga pa buat delima samba buat sileu.

²⁴ Kudduat nenda raoniake sirimanua su'sut Eskol, kalulut ottit buat anggur sitippura tai Israel sedda.

²⁵ Lepat aitusabau epat pulu ngagogoi toili sia baratda ka pasitaikoat laggai nenda,

²⁶ samba riuriuakerangan raei katubut Mose, katubut Aron samba ka sangamberi paamian Israel ka Kadesh, ka kudduat simatangeu Paran. Ambinrangan katuareman katubutda ruatda samba ka sangamberi paamian nenda samba patoilarangannia ka sangamberitda bua kaju sibara ka laggai nenda.

²⁷ Pumumuanakerangannia katubunia: “Atuguruan kai ka laggai, siripot pakoinietnu, samba kirenangan laggai nenda musukkra le susu samba suat mani, samba nene te buat kajunia.

²⁸ Sarat, bangsa sikudduiji laggai nenda maron tubutda samba sangamberi laggai sabeu maron samba bulat sabeu, kisedda leuet muntogat Enak akuitcoan kai sedda.

²⁹ Tai Amalek ka mukuddu ka Polak Negeb, tai Het, tai Jebus samba tai Amori mukuddu ka paleleuleleu, tai Kanaan mukuddu ka sanganantat koat samba ka sanganantat bebet bagat oinan Jordan.”

³⁰ Iageti pusuibinangan si Kaleb patuatda bangsa nenda kamatat Mose, kuanangannia, “Ta! Memei le sita samba kudduijittangan laggai nenda, kalulut bulat momoi le takalaakenia!”

³¹ Tapoi sangamberi sirimanua siiei sedda pasambania masikua: “Tamomoi taei tasaggangi bangsa nenda, kalulut sia peile maron ka sita.”

³² Rasegeake leu ka tai Israel katuareman sitaimaeru pagalaiat laggai sitaikotda, kuarangan: “Laggai sienungimai bule itutaiko iate sara laggai sipasikokom sipulalaggai, samba sangamberi sirimanua siitcomai sedda iate sangamberitda sirimanua simananta tubu.

³³ Akuitco leu kai sedda sangamberi sirimanua bulat sabeu tubu, tai Enak sibara ka sirimanua bulat sabeu tubu, samba itcomaian tubumai kele sit, samba kisedda leuet sia kakai.”