4Mos. 12 - BUKO SIPUNENAN

Tuukum si Maryam

¹ Si Maryam samba leu si Aron masitiboi si Mose pagalaiat sinanalep tai Kush sialania, kalulut kirenangan aiala sara sinanalep tai Kush.

² Kuarangan, “Bulatnia leu pa' sarat katubut Mose le ipaninibo si Tuhan Ta pa' ka sita leu et Ipanibo si Tuhan?” Arepnangannia si Tuhan pagalaiat nenda.

³ Si Mose nene iate bulat simaleppe baga le nia, bele peile senen sirimanua ka polak.

⁴ Sinulut panibonangan si Tuhan katubut Mose, katubut Aron samba katubut Maryam: “Belaake kam telumui ka ujat pusapougat.” Oto bela sia telutda.

⁵ Iageti tugorosotnangan si Tuhan ka bagat tanai rusa sipununuinuijat, samba murio ka matatbaliu sapou nenda, lepa sogainangan si Aron samba si Maryam; lepa ei sia ruadda.

⁶ Iageti kuanangan si Tuhan: “Arepake kam tiboietKu nene. Ke ai ka talagamui sara nabi, oto Aku, Tuhan kupatoila tubukKu katubunia kabagat itcot mata, manibo le Aku katubunia kabagat pangamutet.

⁷ Ta kisedda ka paguguletKu si Mose, simariuriu topit kabagat UmangKu.

⁸ Sipamamatai le Kupanibo katubunia, sipaitco mata, bulat simakolou ta mupatura, samba nia masiitco pumataat Tuhan. Angoi ta' maloto kam masitiboi paguguletKu si Mose?”

⁹ Kalulut nenda bara golut Tuhan katubutda, lepa tuituiNia.

¹⁰ Kateteret aitusakai tanai rusa barania ka uddut sapou, oraknangan si Maryam besit bokbong, mabulau kele salju; kateteret aipitcaake matania si Aron katubut Maryam, oto itconangannia, aiorakngannia besik bokbong!

¹¹ Lepa kuanangan si Aron katubut Mose: “Ah tuanku, bui' nuorakake katubumai jo nene, sigalaiakenenmai kabagat taiagaimai patuat.

¹² Bui' nuobaakenia sibailiu toga simakakatai, kateteret aibela ka suruket inania amakabutean akkulania.”

¹³ Iageti pusoganangan si Mose katubut Tuhan, “Ale Taikamanua, aleakean le nia!”

¹⁴ Iageti panibonangan si Tuhan katubut Mose: “Ke' iluiji bai matania ukkuinia, ta pa isisilo puailaat pitu ngagogoi burunia? Eddangan tusaraakenia pitu ngagogoi ka ujat pusapougat, iageti momoian itusilonia minca.”

¹⁵ Oto saraakerangan si Maryam ka ujat kudduat pusapougat pitu ngagogoi burunia, samba bangsa nenda ta' amutuitui sia ke tapei tusilo minca si Maryam.

¹⁶ Iageti putuituirangan baratda ka Hazerot samba pusapourangan ka kudduat simatangeu Paran.