4Mos. 11 - BUKO SIPUNENAN

Obengan Tuhan

¹ Ka sara gogoi bangsa nenda mungunyu' kamatat Tuhan pagalaiat besit purimanuaiatda, samba kateteret aiarepnia si Tuhan bara goluNia, iageti pujulunangan obengan Tuhan katalagatda samba raratnangan ka kudduat pusapougat.

² Iageti pugereirangan bangsa nenda katubut Mose, samba panindounangan si Mose katubut Tuhan; iageti penangan leu obengan nenda.

³ Kalulut nenda oniakerangan sirimanua kudduat nenda Tabera, kalulut amujulu obengan Tuhan katalagatda.

Si Tuhan mupalelengan masikau akkula

⁴ Sangamberi sirimanua sikatai sibabara katalagatda mabotbot tubutda ereu kokom; samba pusourangan leu tai Israel sialei masikua: “Kaseian le' masiaake komenta akkula”

⁵ Tarepdep le iba sikomta ka Misir sita saki, timun, simangko, bawang, bawang simabonan samba bawang simabulau.

⁶ Tapoi kineneiget aikainangan sita, taanai aponia pa', sarat manna nene le taitco.”

⁷ Tubut manna nenda kele katumbar samba ituitco kele ramak bedolah.

⁸ Bangsa nenda mubalau le' sia ka senen kudduat rapasiabbut, lepa gulutrangannia pasamba bukku pasigulut ele ratuddunia kabagat pasigulunan. Seurangannia kabagat pariok samba galairangannia bailiu roti simamuine; nanamnia kele kan sigoreng.

⁹ Samba ke tugorosot tinobut ka kudduat pusapougat kateteret sinoibo, oto tugorosotnangan leu manna sedda.

¹⁰ Kateteret aiarepnia si Mose bangsa nenda, iate sangamberi sirimanua sibara ka senen muntogat, musou kamatat matatbaliu sapounia, bara golut Tuhan simakope, samba pagalaiat nenda sikatai le' iaddeakenia si Mose.

¹¹ Iageti kuanangan si Mose katubut Tuhan: “Angoi Nugalaiake sikatai katubut paguguletNu nene angoi ta' kusilo katet baga kamatam, bailiu Nubairatake katubuku sangamberi bangsa nene?

¹² Aku pa' sisuruketake sangamberi bangsa nenen ele aku pa' situ'tuake matadda, bailiu kuanungan katubukku: kupkupake le nia kele sipasijajago ikupkupake toga siputotottot, muenung ka polak sipalelekakenenNu kabagat suppa katubut taikebbukatnia?

¹³ Kaipa kuala akkula bule itukau ka sangamberi bangsa nene? Kalulut musou le sia katubukku sialei masikua: Ake kakai akkula komenmai.

¹⁴ Tamomoi kubairatnia sarakku pupasikelanan ka sangamberi bangsa nene, kalulut masane galajet nene kaku!

¹⁵ Ke' kisene Nugalaiake katubukku, maeru peile Numateiake aku, ke kusilo katet baga kamatam, bule bui' kuitco pangoringanku.”

¹⁶ Lepa kuanangan si Tuhan katubut Mose, “Ruruake le kamataKu pitupulu sia sibara ka talagat sangamberi sikebbukat laggai Israel, siagainu sibailiu sikebbukat bangsa samba sipasikeli saladdunia, iageti ambitnungan sia ka Sapou Paailiat, bule rapurio sedda pasamba ekeu.

¹⁷ Tugogorosot te Aku samba manibo ka tubum ka kudduat nenda, lepa geti alakungan sangarubeiat Ketsat situguguru katubum nenda samba kaukungannia geti katubutda, iageti sambamuian le simakere masibairat pupasikelanan ka bangsa nenda, oto taan saram masibabairat.

¹⁸ Tapoi buita nukua ka bangsa nenda: Mansep sipunenanake kam tubumui, iageti kommuian te geti akkula; kalulut amusouan kam kamatat Tuhan sialei masikua: Kasei masiake komenmai akkula? Bulat maeru purimanuaiatta ka Misir, ele? – Iake le geti si Tuhan akkula komenmui.

¹⁹ Ta sangagogoi nukom kamnia, ta rua ngagogoi, ta lima ngagogoi, ta pulu ngagogoi ta' ruapulu ngagogoi,

²⁰ tapoi sangalaggo le burunia, pat bela sibara kabagat asakmui samba patngaunangan kam – kalulut anukeraake kam si Tuhan sikuddu katalagamui samba musou kamatatNia sialei masikua: Angoian le tabebela ka Misir?”

²¹ Tapoi kuanangan si Mose: “Bangsa sibabara katubukku nene igitda enem ngoturibu sia sipusisila, tapoi Nukua: Kukau le' geti akkula katubutda, samba sangalaggo burunia rakomnia!

²² Momoi leu pa' tuja'ja ka sia biribiri samba jaui kele igitda nene, bailiu silorangan simemetnia? Ele momoi leu pa' metnangan leu pa tuala ka sia iba ka koat, bailiu silorangan simemetnia?”

²³ Tapoi aleginangannia si Tuhan katubut Mose: “Ibebeki pa' geget Tuhan igalaiake nenda” Kineneiget nuitco le geti muaali pa tiboietKu ele ta'!”

Sipitupulu sikebbukat laggai

²⁴ Iageti bela si Mose ka uja, segeakenangan tiboiet Tuhan nenda ka bangsa nenda. Ruruakenangan pitupulu sia sibara ka sikebbukat laggai bangsa nenda samba koiniakenangan sia murio masibokko sapou.

²⁵ Lepa tugorosotnangan si Tuhan kabagat tanai rusa samba panibonangan katubut Mose, iageti alanangan sangarubeiat Ketsat situguguru' katubunia, samba kaunanganNia katubutda sipitupulu sikebbukat laggai nenda; katetetret aituleu Ketsat nenda katubutda, sopsopnangan sia kele nabi, tapoi lepa nenda tata'.

²⁶ Aipeile rua sia sipulelegei ka kudduat pusapougat; sara sipuoni Eldad, samba sara minca sipuoni si Medad. Katereret aileuleuki sia Ketsat – sia nenda sirimanua sisuratakenen oni, tapoi ta amei sia ka sapou – oto sopsopnangan sia kele nabi ka kudduat pusapougat.

²⁷ Lepa pabalaunangan sara silainge masipaagaiake katubut Mose: “Si Eldad samba si Medad aisopsopan sia kele nabi ka kudduat pusapougat.”

²⁸ Iageti aleginangannia si Josua togat Nun, sipasirorom si Mose baranangan sibau tubu peilenia aibailiuannia pagugulet Mose: “Tuanku Mose, keraake sia!”

²⁹ Tapoi kuanangan si Mose katubunia: “Bulatnia leu pa' maron patuatnu masisopo aku? Ke' sangamberi paamian Tuhan ibailiu nabi, kalulut akena si Tuhan ketsatNia tuleu katubutda!”

³⁰ Iageti toili si Mose ka kudduat pusapougat, nia samba sangamberi sikebbukat laggai Israel.

Uma' turugougou

³¹ Lepa puboroinangan rusa sibara kai Tuhan; ambitnangan sangamberi uma' turugougou sibara ka isit koat, samba saragaiakenangannia ka uddut kudduat pusapougat ka sangalionia, ai sangagogoi reunannia ituenungi ka sangamberi matat rusa, samba ai rua ngaeto buaknia barania ka uddut polak.

³² Lepa sanganantat gogoi samba sanganantat soibo nenda samba sanganantat gogoi ka mansepnia, tusururangan bangsa nenda masiruruake sangamberi uma' turugougou nenda – senen sirimanua simatatania raruruake pulu ngahomer – iageti pasaragairangan simakope lio ka sangaliot kudduat pusapougat.

³³ Kateteret ai peile akkula ka ngungunda, kepei rakom, oto bara golut Tuhan ka bangsa nenda pasamba sara ukuman bulat sabeu.

³⁴ Kalulut nenda tuoniake kudduat nenda Kibrot-Taawa, kalulut sedda te aiturateiake sangamberi sirimanua simakatai kokom.

³⁵ Putuituirangan bangsa nenda baratda ka Kibrot-Taawa raei ka Hazerot samba kuddua sia sedda.