4Mos. 1 - BUKO SIPUNENAN

Pangandeat saladdu Israel

¹ Kuanangan si Tuhan katubut Mose ka simatangeu ka Sinai, kabagat Sapou Paailiat, ka gogoi sikasara laggo sikarua karura sikarua lepat arabela ka laggai Misir:

² “Adde igit sangamberi paamian Israel siripot sangamberi muntogat sibabara kabagat sukutda, samba suratake sangamberi taimanteu ka Israel

³ sipururura rua pulu ka pata siooi pasaggak, senesenen sirimanua. Ekeu samba si Aron buita nusurat kam siripot senesenen mungkuat saladdu.

⁴ Ka senen suku, buita bara sara sia muntogat sipaalei ekeu, iate ute kabagat suku sibailiu punu tubu.

⁵ Nene te oninda sangamberi sirimanua sipaalei ekeu. Sibara ka suku Ruben: Elizur togat Syedeur;

⁶ sibara ka suku Simeon: Selumiel togat Zurisyadai,

⁷ sibara ka suku Jehuda: Nahason togat Aminadab,

⁸ sibara ka suku Isakhar: Netaneel togat Zuar;

⁹ sibara ka suku Zebulon: Eliab togat Helon;

¹⁰ sibara ka muntogat Josep: Elisama togat Amihud sibara ka suku Efraim, samba Gamaliel togat Pedazur sibara ka suku Manasye;

¹¹ sibara ka suku Benjamin: Abidan togat Gideoni;

¹² sibara ka suku Dan: Ahiezer togat Amisyadai;

¹³ sibara ka suku Asyer: Pagiel togat Okhran;

¹⁴ sibara ka suku Gad: Eliasaf togat Rehuel;

¹⁵ sibara ka suku Naftali: Ahira togat Enan.”

¹⁶ Nenda te oninda sipili sibara ka paamian nenda, sene-senenda ibailiu ute sibara ka suku taikebbukatda; sia nene te ute saladdut Israel.

¹⁷ Lepa si Mose samba si Aron masisogai sangamberi sisausau' oninia nenda,

¹⁸ samba ka gogoi sikasara laggo sikarua koiniakerangan raparuru sangamberi paamian. Iageti galairangan tiboi tubutda siripot muntogatda, sibabara kasenen sukutda, oninda sipurura dua puluh kapata tusurat senesenenda,

¹⁹ kele' sikoiniakenen Tuhan katubut Mose. Kisedda te aisurat oninda si Mose ka kudduat simatangeu ka Sinai.

²⁰ Kateteret tiboi tubu suku Ruben, iate reddenan togat Israel sikebbukat, tugalai siripot muntogat sibabara ka sukutda, oto suratrangan sangamberi onida tatoga taimanteu sipurura rua puluh kapata, sangamberi sirimanua siooi pasaggak.

²¹ Igitda sisurat sibara ka suku Ruben ai sia epat puluh enam ngaribu lima ngotu.

²² Kateteret tiboi tubu suku Simeon tugalai siripot muntogatda sibabara ka sukut da, oto suratrangan sangamberi onida tatoga taimanteu sipurura rua puluh kapata, sangamberi sirimanua siooi pasaggak.

²³ Igitda sisurat sibara suku Simeon ai sia lima pulu siba ngaribu telungotu sia.

²⁴ Kateteret tiboi tubu suku Gad tugalai siripot muntogatda sibabara ka sukutda, oto suratrangan sangamberi oni da tatoga taimanteu sipurura rua puluh kapata, sangamberi sirimanua siooi pasaggak.

²⁵ Igitda sisurat sibara ka suku Gad ai sia epat puluh lima ngaribu enem ngotu lima pulu sia.

²⁶ Kateteret tiboi tubu suku Jehuda tugalai siripot muntogatda sibabara ka sukutda, oto suratrangan sangamberi onida tatoga taimanteu sipurura rua puluh kapata, sangamberi sirimanua siooi pasaggak.

²⁷ Igitda sisurat sibara ka suku Jehuda ai sia pitu pulu epat ngaribu enem ngotu sia.

²⁸ Kateteret tiboi tubu suku Isakhar tugalai siripot muntogatda sibabara ka sukutda, oto suratrangan sangamberi onida tatoga taimanteu sipurura rua puluh kapata, sangamberi sirimanua siooi pasaggak.

²⁹ Igit sisurat kabagat suku Isakhar ai sia lima puluh epat ngaribu epat ngotu sia.

³⁰ Kateteret tiboi tubu suku Zebulon tugalai siripot muntogatda sibabara ka sukutda, oto suratrangan sangamberi onida tatoga taimanteu sipurura rua puluh kapata, sangamberi sirimanua siooi pasaggak.

³¹ Igit sisurat kabagat suku Zebulon ai sia lima puluh pitu ngaribu epat ngotu sia.

³² Pagalaiat muntogat Josep: kateteret tiboi tubu suku Efraim siripot muntogatda sibabara ka sukutda, oto suratrangan sangamberi oni da tatoga taimanteu sipurura rua puluh kapata, sangamberi sirimanua siooi pasaggak.

³³ Igit sisurat kabagat suku Josep ai sia epat pulu ngaribu lima ngotu sia.

³⁴ Kateteret tiboi tubu suku Manasye tugalai siripot muntogatda sibabara ka sukutda, oto suratrangan sangamberi oni da tatoga taimanteu sipurura rua puluh kapata, sangamberi sirimanua siooi pasaggak.

³⁵ Igitda sisurat kabagat suku Manasye ai sia telu puluh rua ngaribu rua ngotu sia.

³⁶ Kateteret tiboi tubu suku Benjamin tugalai siripot muntogatda sibabara ka sukutda, oto suratrangan sangamberi oni da tatoga taimanteu sipurura rua puluh kapata, sangamberi sirimanua siooi pasaggak.

³⁷ Igitda sisurat kabagat suku Benjamin ai sia telu puluh lima ngaribu epat ngotu sia.

³⁸ Kateteret tiboi tubu suku Dan tugalai siripot muntogatda sibabara ka sukutda, oto suratrangan sangamberi onida tatoga taimanteu sipurura rua puluh kapata, sangamberi sirimanua siooi pasaggak.

³⁹ Igitda sisurat kabagat suku Dan ai sia enem puluh rua ngaribu pitu ngotu sia.

⁴⁰ Kateteret tiboi tubu suku Asyer tugalai siripot muntogatda sibabara ka sukutda, oto suratrangan sangamberi oni da tatoga taimanteu sipurura rua pulu kapata, sangamberi sirimanua siooi pasaggak.

⁴¹ Igitda sisurat kabagat suku Asyer ai sia epat pulu sara ngaribu lima ngotu.

⁴² Kateteret tiboi tubu suku Naftali tugalai siripot muntogatda sibabara ka sukutda, oto suratrangan sangamberi oni da tatoga taimanteu sipurura rua puluh kapata, sangamberi sirimanua siooi pasaggak.

⁴³ Igitda sisurat kabagat suku Naftali ai sia lima pulu telu ngaribu epat ngotu sia.

⁴⁴ Nenda te igitda sisuratakenen Mose samba si Aron samba leu sipulurua utet suku Israel sibailiu punutubut ka senen sukutda.

⁴⁵ Oto sangamberi tai Israel sisuratakenen siripot sukutda, iate sangamberi sirimanua sipururura rua pulu kapata samba sioi pasaggak,

⁴⁶ igitda sisurat iate enem ngotu telu ngaribu limangotu lima pulu sia.

⁴⁷ Tapoi sia siripot suku taikebbukatda samba leu tai Lewi, ta atusuratnake pasamba suku-suku bagei.

⁴⁸ Kalulut aikuangan poi si Tuhan kai Mose,

⁴⁹ “Bui nusurat suku Lewi samba bui nuadde igitda pasamba tai Israel,

⁵⁰ tapoi koiniake sia rapasikeli Sapou Sipunenan, kudduat surukat Taikamanua samba sangamberi bibilet sibabara ka bagania; buita raakkatake Sapou Sipunenan samba sangamberi bibiletnia; buita rapasikeli samba buita musapou sia rabokko Sapou nenda.

⁵¹ Ke' mutuitui kam, Sapou Sipunenan buita raragat Lewi, samba ke musapou sia, Sapou Sipunenan buita rarioake; tapoi siberikabaga silegeri Sapou nenda buita tuukum simateiakenen.

⁵² Tai Israel sabagei buita musapou sia sedda ka pusapougatda samba senenda kalegret toggaiatda, siripoi saladdutda,

⁵³ tapoi tai Lewi geti buita musapou sia masibokko Sapou Sipunenan, kudduat surukat Taikamanua bule ta iorak sia golu tai Israel; buita rajago tai Lewi Sapou Sipunenan, kudduat surukat nenda.”

⁵⁴ Iageti galaiakerangan kisedda tai Israel; siripot sikoiniakenen Tuhan katubut Mose, kisedda te aragalaiakenia.