3Mos. 5 - BUKO SIPUNENAN

¹ Ke igalaiake jo sara sirimanua, iate ke iarep ipatelei sara sirimanua, samba momoi ibailiunia sipasimuneng kalulut aiitco ele iagai, tapoi ta ioba ikau katukolobat, oto buita ibairat siripot selenia.

² Kisedda leu et ke iorak sara sirimanua ka sara kasitsitakenen, ele tubut tarimeu simamatei simasabbak kasitsitakenen, ele tubut tarimeu kasitsitakenen ele tubut tarimeu simamatei sipugugurui kasitsitakenen, taipapaliket bagania, oto bailiunangannia kasitsitakenen samba masele.

³ Kisedda leu et ke ioraknia kasitsitakenen sibara ka sirimanua, kenanen aponia pa kasitsitakenen bailiunangannia kasitsitakenen, taipapaliket bagania nenda, tapoi lepa geti againangannia, oto maselenia.

⁴ Kisedda leu et ke sara sirimanua musuppa simasabau igalaiake pukakatai ele simaeru, kenanen aponia pa suppa simasabau sikuania nenda, taipapaliket bagania, tapoi lepa geti againangannia, oto maselenia kabagat sara pakaroat nenda.

⁵ Oto ke maselenia kabagat sara pakaroat nenda, buita ipoiliat jo sigalaiakenennia nenda,

⁶ samba buita ipanguruatake katubut Tuhan sibailiu panebui sele kalulut jo nenda iate sangamuneng biribiri ele kambing sinanalep, sibailiu buluakenen pasiappet jo. Oto kalulut kisedda si imam masibaraake paabanan ka sirimanua nenda kalulut jonia.

⁷ Tapoi ke tamomoi itarekake kambing ele biribiri, oto sibailiu panebui sele kalulut jo sigalaiakenennia nenda, buita ipanguruatake katubut Tuhan rua ngamuneng uma limendeu ele rua ngamuneng togat ngorut, sangamuneng sibailiu buluakenen pasiappet jo samba sangamuneng minca ibailiu buluakenen silabo.

⁸ Buita iambit nenda kai imam, samba imam nenda buita muboiki ipanguruatake uma buluakenen pasiappet jo. Buita ipilekake utenia ka bakkat tetekatnia, tapoi bui itakki.

⁹ Logau buluakenen pasiappet jo nenda buita tusoksokake goiso ka rupit kudduat pasibuluat, tapoi legei logau uma' nenda buita tuneinei ibela ka rubeiat ka tei kudduat pasibuluat; iate buluakenen pasiappet jo.

¹⁰ Uma' sikarua buita igalai ibailiunia buluakenen silabo, siripot surukat. Oto kalulut kisedda si imam masibaraake paabanan ka sirimanua nenda kalulut jo sigalaiakenennia, bailiu silonangan katuappekat.

¹¹ Tapoi ke tamomoi itarekake rua ngamuneng uma limendeu ele rua ngamuneng togat ngorut, oto buita iambit sibailiu panguruatnia kalulut jonia nenda sepersepuluh efa tapung bulat simaeru sibailiu buluakenen pasiappet jo. Bui igaluakenia ka tula samba pumanyang ka uddutnia, kalulut nenda te buluakenen pasiappet jo.

¹² Lepa buita iambit nenda kai imam samba imam nenda buita iala sangarakkut tapung nenda sibailiu pasirepdepnia, lepa raraknangannia ka uddut kudduat pasibuluat ka uddut sangamberi buluakenen sirarak katubut Tuhan; iate buluakenen pasiappet jo.

¹³ Oto kalulut kisedda imam masibaraake paabanan ka sirimanua nenda kalult jonia kabagat sara pakaroat, bailiu silonangan katuappekat. Legeinia iate rubeiat imam, makere kele buluakenen sinantatakenen.”

Buluakenen panebui sele

¹⁴ Kuanangan si Tuhan katubut Mose:

¹⁵ “Ke isili putotopitnia sara sirimanua samba taipapaliket bagania igalaiake jo kabagat sara sipunenan sipanguruatakenen katubut Tuhan, oto buita ipanguruatake katubut Tuhan sibailiu panebui selenia sangamuneng biribiri simanteu simaeru tubu ele kambing ele biribiri sibailiu panebui selenia, tukireki siripot syikal perak, iate siripot syikal sipunenan, sibailiu buluakenen panebui sele.

¹⁶ Ka pagalaiat sipunenan sibailiuake sirimanua nenda mujo, buita tulului silinia samba tuppainangan seperlima, lepa kaunangannia katubut imam. Buita ibaraake si imam paabanan ka sirimanua nenda pasamba biribiri simanteu buluakenen panebui sele nenda, bailiu silonangan katuappekat.

¹⁷ Ke sara sirimanua masigalai jo igalaiake sara keraet Tuhan taipapaliket bagania, oto maselenangan samba buita isilo siripot selenia nenda.

¹⁸ Buita iambit katubut imam sangamuneng biribiri simanteu simaeru tubu iate kambing ele biribiri, silepa tukireki, sibailiu buluakenen panebui sele. Imam nenda buita ibaraake paabanan ka sirimanua nenda kalulut sigalaiakenennia taipapaliket baga samba taiagaietnia, bailiu silonangan katuappekat.

¹⁹ Nenda te buluakenen panebui sele; sirimanua nenda bulat maselenia katubut Tuhan.”