3Mos. 4 - BUKO SIPUNENAN

Buluakenen pasiappet jo

¹ Kuanangan si Tuhan katubut Mose:

² “Kua katubutda tai Israel: Ke igalai jo sara sirimanua taipapaliket baga ka pagalaiat keraet Tuhan samba bulat aigalaiake sara ka keraet nenda,

³ oto ke sigalai jo nenda iate imam sisukatakenen, bailiu maselerangan leu tai Israel, buita ipanguruatake katubut Tuhan sangamuneng jaui simanteu sibau tubu simaeru tubu, sibailiu buluakenen pasiappet jo.

⁴ Buita iambit jaui nenda ka matatbaliu Sapou Paailiat, ka matat Tuhan, lepa buita igalakake kabeinia ka utet jaui nenda, samba jajanangan jaui nenda ka matat Tuhan.

⁵ Imam sisukatakenen nenda buita iala sangarubeiat logau jaui nenda, lepa ambitnangannia kabagat Sapou Paailiat.

⁶ Buita isosopake singongainia si imam kabagat logau nenda, samba soksokakenangan goiso logau nenda, pitu ngaminca ka matat Tuhan, ka matat kekre komak kudduat sipunenan.

⁷ Iageti imam nenda buita igaraiake goiso logau nenda ka sangamberi ban kudduat pasibuluat pasilabokat pusinginan, sibabara ka matat Tuhan kabagat Sapou Paailiat, samba sangamberi legei logau buita ipiliake ka rubeiat ka tei kudduat pasibuluat buluakenen silabo ka kamatat matatbaliu Sapou Paailiat.

⁸ Sangamberi tabet jaui simanteu buluakenen pasiappet jo nenda buita ikokoiake sibara ka jaui nenda, iate tabe silakkup tinanai samba sangamberi tabe situettet ka tinanai nenda,

⁹ samba ka rua gagla samba tabenia situettet katubunia, sibabara ka tenga samba tabe situeetet ka atei bulat saraakenennia pasamba gagla nenda,

¹⁰ makere kele sikokoiakenen sibara ka jaui buluakenen pasiaraugat. Buita ilabo sangamberinia nenda si Imam ka uddut kudduat pasibuluat buluakenen silabo.

¹¹ Kisedda leu et kulit jaui simanteu nenda samba sangamberi akkulania, pasamba ute, bitinia, tinanainia samba leu simalolitnia,

¹² oto jaui simanteu nenda, sangamberinia buita iambit ka ujat pusapougat, ka sara kudduat simalina, ka kudduat pasiribaiat abu, samba jaui nenda buita ilabo teret sappru ka uddut loina sipuoobek ka kudduat pasiribbaiat abu.

¹³ Ke sigalai jo taipapaliket baga nenda iate sangamberi paamian Israel, samba ta ibagai bagatda sapaamian, bailiu galaiakerangan sara keraet Tuhan, samba maselerangan,

¹⁴ samba ke maagai jo sigalaiakenenda nenda, buita rapanguruatake sapaamian sangamuneng jaui simanteu sibau tubu sibailiu buluakenen pasiappet jo. Jaui nenda buita raambit ka matat Sapou Paailiat.

¹⁵ Lepa geti sia sikebbukat laggai paamian nenda buita ragalakake kabeira ka utet jaui nenda ka matat Tuhan, samba jaui nenda buita tujaja ka matat Tuhan.

¹⁶ Imam sisukatakenen nenda buita iambit sangarubeiat logau nenda kabagat Sapou Paailiat.

¹⁷ Buita isopsopake singongainia si imam kabagat logau nenda, samba soksokakenangan goiso logau nenda, pitu ngaminca ka matat Tuhan, ka matat kekre komak.

¹⁸ Iageti imam nenda buita igaraiake goiso logau nenda ka sangamberi ban kudduat pasibuluat, sibabara ka matat Tuhan kabagat Sapou Paailiat, samba sangamberi legei logau buita ipiliake ka rubeiat ka tei kudduat pasibuluat buluakenen silabo ka kamatat matatbaliu Sapou Paailiat.

¹⁹ Sangamberi tabe jaui nenda buita ikokoiake samba rarakanangannia ka uddut kudduat pasibuluat.

²⁰ Kise te igagalaiake ka jaui simanteu nenda: kele sigalainia ka jaui simanteu buluakenen pasiappet jo. Oto kabagat nene te si imam igalaiake paabanan katubutda, bailiu silorangan katuappekat.

²¹ Jaui simanteu nenda buita iambit ka ujat pusapougat, lepa labonangannia teret sappru kele irarak isappru jaui simanteu siboiki. Nenda te buluakenen pasiappet jot paamian.

²² Ke sigalaiake jo nenda iate sara siabeu tiboi tubu taipapaliket bagania igalaiake sara keraet Tuhan, Taikamanuania, bailiu maselenangan,

²³ oto ke tupaagai katubunia jo sigalaiakenennia nenda, buita iambit panguruatnia sangamuneng kambing simanteu simaeru tubu.

²⁴ Lepa buita igalakake kabeinia ka utet kambing nenda samba jajanangannia ka kudduat simaturere pasijajakat buluakenen silabo ka matat Tuhan; iate buluakenen pasiappet jo.

²⁵ Iageti imam nenda buita ikau singongainia iala logau buluakenen pasiappet jo nenda, lepa soksokakenangannia ka sangamberi ban kudduat pasibuluat buluakenen silabo. Legei logaunia buita ipiliake ka rubeiat ka tei kudduat pasibuluat buluakenen silabo.

²⁶ Tapoi sangamberi tabe buita ilabo ka uddut kudduat pasibuluat, kele leu et tabet buluakenen puaraugat. Oto kalulut kisedda imam masibaraake puaraugat ka sirimanua nenda kalulut jonia, bailiu silonangan katuappekat.

²⁷ Ke sigalaiake jo taipapaliket baga nenda iate sara sirimanua simageba katalagat siberikabaga, igalaiake sara keraet Tuhan, bailiu maselenangan,

²⁸ oto ke tupaagai katubunia jo sigalaiakenennia nenda, buita iambit panguruatnia sangamuneng kambing sinanalep simaeru tubu.

²⁹ Lepa buita igalakake kabeinia ka utet buluakenen pasiappet jo samba jajanangan buluakenen nenda ka kudduat buluakenen silabo.

³⁰ Iageti imam nenda buita ikau singongainia iala goiso logau bulauakenen pasiappet jo, lepa lokotakenangnnia ka sangamberi ban kudduat pasibuluat buluakenen silabo. Sangamberi legei logaunia buita ipiliake ka rubeiat ka tei kudduat pasibuluat buluakenen.

³¹ Tapoi sangamberi tabe buita isaraake, kele leu et tusarake tabe buluakenen pasiaraugat, lepa buita irarak si imam ka uddut kudduat pasibuluat sibailiu singinnia siangkaake bagat Tuhan. Oto kalulut nenda imam masibaraake paabanan ka sirimanua nenda bailiu silonangan katuappekat.

³² Ke iambit sangamuneng biribiri sibailiu panguruatakennia sibailiu buluakenen pasiappet jo, buita iambit sangamuneng sinanalep simaeru tubu.

³³ Lepa buita igalakake kabeinia ka utet buluakenen pasiappet jo nenda, samba jajanangannia sibailiu buluakenen pasiappet jo ka kudduat simaturere pasijajakat buluakenen silabo.

³⁴ Iageti imam nenda buita ikau singongainia iala goiso logau bulauakenen pasiappet jo nenda, lepa lokotakenangnnia ka sangamberi ban kudduat pasibuluat buluakenen silabo. Sangamberi legei logaunia buita ipiliake ka rubeiat ka tei kudduat pasibuluat buluakenen.

³⁵ Tapoi sangamberi tabe buita isaraake, kele leu et tusaraake tabet biribiri buluakenen pasiaraugat, lepa buita irarak sangamberinia nenda si imam ka uddut kudduat pasibuluat ka uddut sangamberi buluakenen sirarak katubut Tuhan. Oto kalulut nenda imam masibaraake paabanan ka sirimanua nenda kalulut jo sigalaiakenennia bailiu silonangan katuappekat.