3Mos. 27 - BUKO SIPUNENAN

Enungan pagalaiat panguruat kai Tuhan

¹ Tuhan masikau kai Mose

² enungan nene addeat ka bangsa Israel. Ke'bai sara sirimanua tupanguruatnake kai Tuhan addeat masitebui kaul sikokoiakenen, sirimanua nenda momoi tutebui pasamba piga pa' bulagat

³ siripot saki siteuakenen ka Sapou Tuhan:

⁴ – sisaliu enem pulu ngarura: simanteu pulu lima bulagat perak sinanalep pulu bulagat perak

⁵ – katalagat rua pulu pat aili pulu ngarura: simanteu lima pulu bulagat perak sinanalep telu pulu bulagat perak

⁶ – katalagat lima pat aili rua pulu ngarura: simanteu rua pulu bulagat perak sinanalep pulu bulagat perak

⁷ – karepet lima ngarura: simanteu lima bulagat perak sinanalep telu bulagat perak

⁸ Ke' sirimanua sipupanguguruat nenda tamomoi ilului saki siteuakenen, bui ta iambit sirimanua sipanguruatnakenen kai Tuhan nenda kai imam. Bui ta igorosotnake le sakinia si imam siripot siooi ilului sirimanua nenda.

⁹ Ke'bai kaul nenda pagalaiat tarimeu siooi tupanguruatnake kai Tuhan, iageti senen panguruat sipanguruatnakenen kai Tuhan ibailiu le bakkat Tuhan.

¹⁰ Sirimanua sipukakaul nenda tamomoi isilinia pasamba tarimeu bagei. Ke' igalaiake kasedda, karua ngamuneng tarimeu nenda ibailiu le bakkat Tuhan.

¹¹ Tapoi ke' kaul nenda pagalaiat tarimeu simalolit sitaioi tusilo sibailiu panguruat kai Tuhan, sirimanua sipukakaul nenda bui ta iambit tarimeu nenda kai imam,

¹² samba si imam bui ta iteuake le sakinia siripot putubuat tarimeu nenda, samba kele siagai imam kisedda te ibailiunia.

¹³ Ke' sirimanua nenda ioba masitebui terimeunia, buita ilului sakinia ituppai rua pulu porsen.

¹⁴ Ke'bai sara sirimanua masipanguruatnake lalepnia kai Tuhan, iageti si imam buita iteuake le sakinia siripokat lalep nenda.

¹⁵ Ka' sirimanua nenda ioba masitebui lalepnia, bui tailului sakinia ituppai rua pulu porsen.

¹⁶ Ke' bai sara sirimanua masipanguruatnake sangarubeiat sibara ka polaknia kai Tuhan, sakinia bui tatuteuake siripot igit uremen siooi tuurepmake ka mone nenda. Senen rua pulu kilogram gandum sakinia pulu bulagat perak.

¹⁷ Ke' polak nenda ipanguruatnake kateteret Rura Pasitoiliat, sakinia bui tatulului samberinia.

¹⁸ Ke' polak nenda ipanguruatnake lepat Rura Pasitoiliat, siimam bui taiteuake le sakinia siimam siripokat igit rura sipulelegei kepei bara Rura Pasitoiliat minca, sakinia leu iabailiu manimpi.

¹⁹ Ke' sirimanua sipanguruatnake polak nenda ioba masitebuinia, bui tailului sakinia tuppai rua pulu porsen.

²⁰ Ke' isakiake polak nenda ka sirimanua sabagei tapoi aitebui boiki kai Tuhan, taananai ronnia minca masitebui monenia.

²¹ Ka Rura Pasitoiliat kasibabara, mene nenda ibailiu le bakkat Tuhan teret buru-buru samba polak nenda tukau le ka taiimam.

²² Ke' bai sara sirimanua masipanguruatnake kai Tuhan polak sinakinia,

²³ bui taiteuake le sakinia siimam siripot igit sipulelei pat bara minca Rura Pasitoiliat. Ia geti sirimanua nenda bui tailului sakinia ka gogoi nenda lauet. Bulagat nenda ibailiu le bakkat Tuhan.

²⁴ Ka Rura Pasitoiliat, mone nenda bui tatutoiliake ka sibakkatnia siboiki ele ka muntogatnia.

²⁵ Sangamberi saki buita tuteuake siripokat saki simatukle ka Sapou Tuhan.

²⁶ Tarimeu siputu'tu' mata siboiki iate ibailiu bakkat Tuhan, oto tamomoi tupanguruatnake addeat buluakenen kateubaga. Togat jaui, togat biribiri ele togat kambing siboiki mutu'tu' mata iate ibailiu bakkat Tuhan.

²⁷ Tapoi tarimeu simalolit siboiki mutu'tu' mata momoi tutebui siripot simatukele ka Keman Tuhan, tuppai rua pulu porsen. Ke' tatutebui, tarimeu nenda momoi tusakiake ka sirimanua sabagei siripot saki simatukele ka Keman Tuhan.

²⁸ Beri sara sirimanua momoi masisakiake ele masitebui apa sikokoiakenennia ketaanai enungannia kai Tuhan, ele nenda sirimanua, terimeu ele polak. Nenda bakkat Tuhan teret buru-buru.

²⁹ Senen sirimanua sikokoiakenen kai Tuhan addeat tusubuake tamomoi tutebui, buita tumateiake le nia.

³⁰ Seperpulu saibara kasangamberi buat siureman, ele nenda gandum, buat kaju iate ibailiu le bakkat Tuhan.

³¹ Ke' sara sirimanua ioba masitebui sangarubeiat sibara kabuat nenda, buita ilului sakinia siteuakenen tuppai rua pulu porsen.

³² Sara kasenen sipulungamuneng tarimei iate bakkat Tuhan. Ke' tarimeu nenda tuadde, senen muneng sikapulu ibailiu le bakkat Tuhan.

³³ Sibakkat tarimeu nenda tamomoi isausau kaipa simaeru, kaipa sikatai. Ia leu tamomoi isilinia. Ke' isili, karuangamuneng tarimeu nenda ibailiu le bakkat Tuhan samba tamomoi tutebui.

³⁴ Nenda te parenta siparentaakenen Tuhan kai Mose ka leleu Sinai addeat tusegeake ka bangsa Israel.