3Mos. 26 - BUKO SIPUNENAN

Panukanan ka sirimanua simareddet

¹ Kuanangan si Tuhan, “Bui'an nugalaikam sabulungan ele masirioake tularat ele arigi bukku sitularani panindogiet. Aku le Tuhan Taikamanuamui.

² Punenikam gogoi Sabat samba suru'kam kudduat sipunenan addeat masipanindogi Aku. Aku le Tuhan.

³ Ke' murimanua kam kasiripot ukumKu samba mureddet ka surukatKu,

⁴ Kubebeleake le geti kekeu urat kateterenia bule polak nenda ibelaake buania samba mubua le geti sangamberi paloina-loina.

⁵ Buat monem malilimai le geti, pat ke' aiailingan teterenia masimonei buat anggur, aipeile ekeu masimomonei gandum. Samba ke'aiailingan teterenia mangurep gandum, aipeileu ekeu masimomonei anggur. Bara le geti kakam komenmui pat ektek, samba murimanua simakolou ka kupkumen laggaimui.

⁶ Kujago le geti pusanangan ka kupkumen laggaimui pat oinangan leu nuperep kam samba beri sara loto katubut kasei pa'. Tarimeu simasakbak Kutataake le ka kupkumen laggai nenda, samba taan geti babara minca pasaggangan ka kupkumen laggaimui.

⁷ Momoi le geti nukalaakekam sangamberi saggakmui;

⁸ lima kam momoian nukalaakekam sangotu sirimanua samba sangotu kam momoian nukalaakekam puluribu sirimanua.

⁹ Kusukatnake le geti kam samba Kuake le migi sapunuteteu katubum. Apa sipalelekKu katubum, Kususutnake le.

¹⁰ Buat siuremanmui malilimai le geti, pat metnangan addeat sangarura. Nubebesiake peile kam nubelaake kam buat simonei siboiki bule ibara kudduat pasikoirikat buat simonei sibau.

¹¹ Mukuddu le geti Aku katalagamui kabagat SapouKu, samba ta Kukekera kam.

¹² Kupaalei le kam; ibailiu le geti Aku Taikamanuamui samba kam ibailiu paamianKu.

¹³ Aku, Tuhan Taikamanuamui, sipasiaambit kam bele ka laggai Misir bule taibailiu kam pakoiniet minca. Pugegeat sipaoreiji kam Aku takkiaakean, samba Kubailiuake le kam sirimanua situaaroi.”

Ukum ka sirimanua sitaimareddet

¹⁴ Kuanangan si Tuhan, “Ke'tanuarepikam Aku samba tanugalaiakekam surukatKu,

¹⁵ ke'nupasabau kam palelengan sigalaiKu pasamba kam samba tanuobakam masireddet sangamberi ukum samba surukatKu,

¹⁶ Kuukum te geti kam. Kuake le geti katugegekat katubumui, oringen samba roket sitaiooi tualeake, pat matamui bailiu mapeset samba pangorikamuia ka purimanuaiatmui. Mangurep le geti ekeu tapoi tanukokom buania, aipoi sangamberi saggakmui momoi te geti masikalaake kam samba masisapruake apa siurepmui.

¹⁷ Kuukum le geti kam, pat kalaakerangan kam sasaggakmui samba silagakikam baga masikupkupmake kam. Ibailiu le geti kam simakope loto pat putuituimuan, kenanen taanai sikukru kam.

¹⁸ Ke'alepaan anuenungikam sangamberi ukuman nenda ta leuet nureddet kam Aku, ukumanmui Kutuppai le geti pitu ngaminca pitu.

¹⁹ Kubakbakake le geti gege atsiakenenmui. Taan te geti bebele urat, tenan le polaknu bailiu magarak samba makele kele laba'.

²⁰ Sangamberi besit tubumui taanai lulunia, aipoi polakmui taan ibebelaake bua samba sangamberi siuremanmui taan mububua.

²¹ Ke'mariuriu peile nusaggangikam Aku samba tanuobakam mureddet katubukKu, Iageti ukumanmui Kutuppai le geti minca pitu ngaminca pitu.

²² Kubabaraake le geti tarimeu simasakbak ka talagamui. Taimeu nenda imateiake le geti tatogamui samba ipakomi le tarimeumui samba legeina le kam goiso samba sangamberi enungan ka kupkumen laggaimui ibailiu le matangeu.

²³ Ke'anuenungingan kam sangamberi ukum nenda, tapoi ta leuet nuarepi kam Aku, tapoi mariuriu le nusaggangi kam Aku,

²⁴ iageti saggangingkungan ekeu samba Kuukum le ekeu pitu ngaminca pitu bele peile kasilelepa'.

²⁵ Kubabaraake le geti pasaggangan ka talagamui addeat masiukum kam kalulut anupasabauan poi kam palelenganKu pasamba kam. Samba ke' paruru kam ka laggaimui addeat masigaba sakkerat, Kubabaraake le geti besi' sitaiooi tualeake, pat obaakemuian tubumui ka saggakmui.

²⁶ Sapru le geti komenmui, iageti pulu tainanalep ralabo geti roti kabagat sara pasirarangan. Ratoiliake le geti rotimui siripot timbangan, samba lepat nukomkamnia, iagai peile bagamui laje.

²⁷ Ke'anuenungingan kam sangamberi ukum nenda, tapoi ta leuet nuarepi kam Aku samba tanuoba kam mureddet katubukKu,

²⁸ iageti kabagat golu Kusaggangi le geti kam, samba masiukum kam pitu ngaminca sanet ukuman kasilelepa'.

²⁹ Mulalaje le geti kam, pat pakomimuian tatogamui.

³⁰ Kupakakatai le geti sangamberi kudduat panindogatmui ka uddut tinambu, Kupabubukkat le sangamberi kudduat pasibuluat simalolitmui ka kuddut pasilabokat dupa samba masiribbaiake tubu simamateimui ka uddut buluijietmui simabubukkat nenda.

³¹ Kupabubukkat le sangamberi laggaimui bailiu siragatat, kudduat panindogatmui Kupakakai le samba sangaberi buluakenenmui ta Kusisilo.

³² Kupkumen laggaimui Kupakakatai le geti, pat sangamberi saggakmui sikudduijinia tuge'ge' masiitco kakataikat nenda.

³³ Kubabarake le geti pasaggangan ka kupkumen laggaimui samba masipasaragai kam ka kupkumen laggai sirimanua. Sangamberi monemui malilimai le geti, samba sangamberi laggaimui tuobaake le ibailiu siragatat.

³⁴ Kateteret nenda te polak nenda toili katuoreiatnia ka sangamberi rurat Sabat ujut aimagarak polak nenda samba ujut anupukuddu kam ka kupkumen laggaira sasaggakmui. Kateteret nenda polak nenda ienungi le Sabatnia samba itoiliake rura Sabat sitapei aisese'.

³⁵ Ujut pugarangannia polak nenda ienungi le geti sabat sitapeiaienungi ka senen rura sabatmui, kateteret aipeile kam mukukuddu sedda.

³⁶ Saaleimui sikukuddu ka kudduat katuribbaiat ka kupkumen laggai bagei, Kukau le sia mukarat baga, pat nau buluk sibororiat rusa leu ikau sia mutuitui. Pabalau le geti ekeu kele sikukru kapasaggangan, lepa bele kenanen taanai saggak kabebemui.

³⁷ Pababalau le geti ekeu samba tusoksok le ekeu pasamba sabagei kenanen taanai sipasikukuru. Samba tanuoom geti masisaggangi sangamberi saggakmui.

³⁸ Matei le geti ekeu kabagat katuribbaiat, samba kupkumen laggai saggaknutumateiake ekeu.

³⁹ Sangarubeiat sigoiso katalagamui sipuririmanua ka kupkumen laggai saggak mangorik le geti kalulut jomui samba jot taikebbukatmui.

⁴⁰ Tapoi muntogatmui rapoiliat le geti jotdra samba jot sapunuteteura sisaggangi Aku samba sipa paagra katubukKu,

⁴¹ pat galaikungan masisaggangi sia samba masituituiake sia ka kudduat katuribbaiat ka kupkumen laggai sasaggakdra. Kalepakatnia, ke'bai rapaepe tubu samuntogatmui samba araenungingan ukuman kalulut jo samba paaggaratdra,

⁴² Kuparepdep le geti palelenganKu pasamba si Jakob, Ishak samba Abraham. Kubabaugi le geti palelenganKu pasikakau kupkumen laggai nenda ka paamianKu.

⁴³ Tapoi polak nenda buita tukaddiuake le boiki kasipulalaggainia, bule sibulatnia ipuari. Samba sapaamianKu buita raenungi le sangamberi ukuman sikauKu katubudra kalulut taiobara masireddet sangamberi surukat samba parentaKu.

⁴⁴ Kenanen bai kisedda, aipeile sia ka kupkumen laggai saggakdra leu, ta leuet Kukakaddiuake sia ele Kususubuake sia. Aipoi ke' Kusubuake sia, katukolobatnia Akutakkiakean palelenganKu pasamba sia, beringan Aku nene Tuhan, Taikamanuandra.

⁴⁵ Kubabaugi le geti palelengan sigalaiKu pasamba taikebbukatdra, kateteret akupakoinong ge'ge'Ku katubut sangamberi bangsa pasamba masiambit paamianKu bela ka laggai Misir, bule Aku, Tuhan, ibailiu Taikamanuanda.”

⁴⁶ Nenda te sangamberi surukat samba parenta sikau Tuhan kai Mose ka uddut leleu Sinai addeat ka bangsa Israel.