3Mos. 25 - BUKO SIPUNENAN

Rura Sabat samba rura Jobel

¹ Kuanangan si Tuhan katubut Mose ka leleu Sinai:

² “Panibo ka tai Israel samba kua katubutda: Ke atuguruan kam ka laggai akenenKu kakam, oto polak nenda buita bara puariat sibailiu sabat katubut Tuhan.

³ Enem ngarura burunia buita nuapauremi kam monemui, samba enem ngarura burunia buita nupasabaiji monen anggurnu samba masiruruake buat polak nenda,

⁴ tapoi ka rura sikapitu buita bara ka polak nenda gogoi sabat, tetere puariat simasun, sara sabat kai Tuhan. Bui nupauremi kam monen anggurmui bui nusaba kamnia.

⁵ Samba aponia sipututu'tu sarania ka simoneiatmui nenda, bui numonei kamnia samba buat anggurmui sitaisasabaet, bui nuappek kamnia. Rura nenda buita ibailiu rura puariat simasun ka polak nenda.

⁶ Buat siuremanmui ka burut sabat nenda buita ibailiu komenmui, iate uktukmui saramui, uktuk paguguletmui taimanteu, samba paguguletmui tainanalep, ka sirimanua siupaiji samba ka sirimanua siooiake katalagmui sikuddu katubumui.

⁷ Ia leuet terimeumui, samba tarimeu simalia' sikuddu ka polakmui, sangamberi buat siureanmui nenda ibailiu komenmui.

⁸ Samba leu minca buita nuadde kam pitu ngarura sabat, iate pitungaminca, pitu ngarura; bailiu tetere pitungarura sabat nenda makere le epat pulu siba ngarura.

⁹ Lepa geti buita nupaarep kam nau pipiau ka senen kudduat kabagt laggo sikapitu ka gogoi sikapulu laggo nenda; ka gogoi punen sabeu Pasiabanan, buita nupaarep kam nau pipiau nenda ka sangaliot laggaimui.

¹⁰ Buita nupusipunenanake kam rura sikalima pulu, samba masisegeake kabeleiat ka laggai nenda samba ka sikudduijinia. Nenda buita ibailiunia rura Jobel kakam, samba senesenemui buita toili ka polak bakkatmui samba ka muntogatmui.

¹¹ Ka rura sikalima pulu nenda buita ibailiu rura Jobel kakam, bui nupasiurep kam, samba aponia sipututu'tu ka sarania kabagat rura nenda bui numonei kamnia, samba loinat anggur siraisasabaet bui nuappek kam buania.

¹² Kalulut rura nenda iate rura Jobel, buita sipunenan nenda kakam, bua sibabara nenda buita nuala kam ka mone.

¹³ Kabagat rura Jobel nenda senesenemui buita toili kam ka polak laggaimui.

¹⁴ Ke nusakiake kam aponia pa ka saaleimui sirimanua ele nusaki aponia pa katubunia, bui' nugalaiake pajoat ka kasei pa.

¹⁵ Ke nusaki aponia pa ka saaleinu buita siripot igit rura kalepat rura Jobel, samba ke isakiake katubum buita siripot igit rura pasimoneiat.

¹⁶ Memei maiigi rurat polak nenda, maiigi le sakinia, samba ke magogoiso le rura nenda, magogoiso le sakinia, kalulut igit simoneieat le aisakiake katubum.

¹⁷ Bui' nupataju pasasambamui, tapoi buita maloto kam ka Taikamanuamui, kalulut Aku te Tuhan, Taikamanuamui.

¹⁸ Oto buita nugalaiake kam siteuakenenKu samba mariuriu masiukkaake surukatKu samba leu nugalaiake kamnia, oto pukuddumuian geti ka polakmui kabagat pusanangan.

¹⁹ Ibabaraake te geti bua ka polak nenda, samba pukommuian geti teret ektek samba mukuddu sedda kabagat pusanangan.

²⁰ Ke parere kam: Aponia kukokom kai kabagat pitungarura nenda, ta pa tuobaake kupangurep kai samba tamomoi kururuake kai buat siuremanmui?

²¹ Oto parentaakekungan geti panukananKu katubumui kabagat rura sikaenem, bule iake bua kabagat telungarura.

²² Mangunngurep te kam kabagat rura sikabalu, tapoi nukom le kam geti buat siuremanmui siburu teret ka rura sikasiba teret bara buania, nukom le kam geti bua siburu.”

Pasitebui polak

²³ “Bui mariuriu nusakiake kam polak, kalulut Aku le sibakkat polak nenda, oto kam iate sirimanua siooiake katubukKu.

²⁴ Ka sangaliot polak bakkatmui buita nukau kam bakkat pasitebui polak.

²⁵ Ke mageba sasarainamui, bailiu sakiakenangan sangarubeiat bakkatnia, oto sara muntogatnia bulat simateu masitebui, iate muntogatnia simalegere katubunia buita tamoinia samba masuitebui sisakiakenen sarainania nenda.

²⁶ Ke taanai pasitebuinia, tapoi ka sara gogoi oinangan itebuinia, bailiu bara pasitebui bakkatnia nenda,

²⁷ oto buita iguruake sangamberi rura kalepat aisakiakenia nenda kabagat pangandeat, samba legeinia buita tutoiliake ka sirimanua sipasisasaki katubunia, bule ioi itoili ka polak bakkatnia.

²⁸ Tapoi ke tamoi itoiliakenia katubunia, oto sisakiakenenia nenda mariuriu le ka kabei sirimanua sipasisasaki teret aili ka rura Jobel; kabagat rura Jobel tuobaake le geti polak nenda, samba sirimanua nenda momoi itoili ka polak bakkatnia.”

²⁹ Ke sara sirimanua masisakiake lalep ka sara laggai sipukele irip, oto abeu sigoilik tembok, iageti ai ronnia masitebui lalepnia sangarura burunia tuadde barania ka gogoi aitusakiake.

³⁰ Tapoi ke tatebui lalep nenda kabagat sangarura, oto lalep nenda bailiunangannia bakkat sipasisasaki sipupaninikat; kabagat rura Jobel lalep nenda ta tutotoiliake.

³¹ Tapoi addeat lalep ka laggai sigoiso sitaigogoilingen tembok bui tatuaddeake makere le mone ka kupkumen laggai nenda, katubunia bui tabara puroron masitebui samba karura Pasitoiliat lalep nenda buita tutoiliake.

³² Pagalaiat sangamberi lalep ka laggaira tai Lewi, ron pasitetebui sangamberi lalep nenda ai katubutra tai Lewi teret buru-buru.

³³ Ke'bai sara tai Lewi masisakiake lalepnia ka sara laggai nenda samba taaitebui, lalep nenda buita tutoiliake katubunia ka Rura Pasitoiliat. Aipoi lalepra tai Lewi ka sangamberi laggaira iate bakkatra sikukuddu siturerere' katalagat bangsa Israel.

³⁴ Tapoi susut parou kabebet laggai suku Lewi tamomoi tusakiake. Nenda iate bakkatra tai Lewi teret buru-buru.

Baleakene ka simageba

³⁵ Ke'bai sara sabangsam sikukuddu katalagamui ibailiu mageba samba taan momoi ipasikeli puririmanuania, bui tanuropmakenia kele sara sitoi ele siooiake, bule ioi ipurimanua simariuriu katalagamui.

³⁶ Bui' nutiddou bulagat katubunia, kaule nukalotoake geti Taikamanuam, bule sasarainam tai Israel momoi ipurimanua katalagamui.

³⁷ Bui' nutiddou bulagat ka bulagat sibaleakenennu katubunia, samba bui' nuala ukktuk ka komen sisakiakenennu katubunia.

³⁸ Nene te parentat Tuhan Taikamanuamui sipasiaambit kam bela ka laggai Misir, addeat iake katubumui polak Kanaan, bule Nia ibailiu Taikamanuamui.

Kabelaiat pagugulet

³⁹ Ke'bai sabangsam sikukuddu ka talagamui mageba pat sakiakenangan tubunia katubum bailiu pagugulet, bui' nukoiniakenia masigalaiake galaiakenen pakoiniet.

⁴⁰ Eddangan ikuddu katalagamui sebailiu sara siupa samba mugalai katubumui teret Rura Pasitoiliat.

⁴¹ Ka rura nenda, buita nuobaake ibela katubum pasamba tatogania, lepa toili ka muntogatnia samba kapolak bakkat taikebbukatnia.

⁴² Paamian Israel iate sapaguguletKu siambitKu bela ka laggai Misir, lulut nenda tamomoi tusakiake sia sibailiu pagugulet.

⁴³ Oto tai Israel sisakiake tubuna katubum tamomoi nupaguglu katugrut tubu. Kau le nukalotoakekam Taikamanuamui.

⁴⁴ Ke'nuoba pagugulet, momoi le nusakinia ka sangamberi bangsa sikukuddu ka be'be'mui.

⁴⁵ Ekeu leu momoi le nusaki tatogada siooiake sikukuddu katalagamui. Tatogada siooiake siputu'tu'tu mata ka kupkumen laggaimui momoi le ibailiu bakkatmui

⁴⁶ samba momoi leu nupaikep katubudda tatogamui addeat ibailiu paguguletda kasanganantat puririmanua. Tapoi pasasambamui tai Israel tamomoi nupaguglu katugrut tubu.

⁴⁷ Ke'bai sara siooiake sikukuddu katalagamui ibiliu makayo, samba ai pasasambamui tai Israel mageba pat sakiakenangan tubunia sibailiu pagugulet katubut siooiake nenda ele ka muntogatnia,

⁴⁸ tai Israel nenda mariuriu le ai ron itutebui. Sara sibara kasasarainania simanteu,

⁴⁹ ele kamamannia, ele sasaraina kapaeppuat ele sabagei saalei simalegre, momoi itebuinia. Ele ke' ai bulagatnia, ia leu momoi itebui tubunia sarania.

⁵⁰ Pakoiniet nenda bui tapatibo le sia pasamba sirimanua sipasisasakinia. Buita ragalai pangandeat igit rura kateteret aitusakiakenia sibailiu pakoiniet pat aili Rura Pasitoiliat kasibabara, lepa teuake sakit pasitebuinia. Sakit pasitebui nenda buita tuteuake siripot upah kaunen katubut sara sirimanua siupah.

⁵¹ Ke' igit rura nenda mabeu peile, iageti sakit pasisakiatnia buita tutoiliake sibailiu panebui tubunia siripot igit rura nenda.

⁵² Ke' teteret sipulelegi pat aili ka Rura Pasitoiliat aipei goiso, iageti buita igalai pangandeat pasamba sirimanua nenda, siripokat igit rura nendat te buita ilului bulagat pasitebui tubunia.

⁵³ Kise te buita mukuddunia katubunia sibailiu sara sirimanua upaet kasangantat rura. Buita paguglunia katugrut tubu.

⁵⁴ Tapoi ke' tamoi itutebui kaenungan kele nene, nia samba tatogania buita tubelaake kabagat Rura Pasitoiliat kasibabara.

⁵⁵ Tai Israel tamomoi ibailiu pakoiniet teret buru-buru, kalulut bangsa Israel iate pagugulet Tuhan le. Tuhan le sipasiaambit sia bela ka laggai Misir. Nia le Tuhan, Taikamanuandra.