3Mos. 24 - BUKO SIPUNENAN

Tulat alito

¹ Kuanangan si Tuhan katubut Mose:

² “Parentaake tai Israel, bule raambit katubum tula zaitun situddu simaeru tulat alito, bule ioi tutunam alito samba imariuriu ipuobek.

³ Buita mariuriu ipasikeli sangamberi alito nenda si Aron kamatat kekre komak sikekre peti surukat, kabagat Sapou Paailiat, barania kasoibokat pat aili simansep, kamatat Tuhan. Nenda te sara siteuakenen teret buruburu kakam sipupaninikat.

⁴ Ka uddut reret alito sibara ka mas simaeru buita mariuriu ipasikeli sangamberi alito nenda kamatat Tuhan.

Roti sinantatakenen

⁵ “Buita nuala tapung bulat simaeru samba labonunga pulurua roti simuine sibara katubunia, senen roti simuine buita tugalai sibara ka rua persepulu efa;

⁶ buita nupagalak simakolou ibailiu rua ngalakke, enem ngambua sangalakke, ka uddut meja sibara ka mas simaeru nenda, kamatat Tuhan.

⁷ Buita nugaraiake pumanyang simaeru ka uddut senen lakkenia; pumanyang nenda te bulat ibailiu rubeiat pasirepdeman roti nenda, iate sara buluakenen sirarak katubut Tuhan.

⁸ Senen gogoi Sabat buita mariuriu ipagalak simakolou kamatat Tuhan; nenda te ka tai Israel sara galaiakenen palelengan teret buruburu.

⁹ Roti nenda addeat kai Aron samba tatogania. Buita rakom ka sara kudduat sipunenan, iate rubeiat simasipunenan ka sia sibara ka buluakenen komen sipanguruatnakenen kai Tuhan addeat ka ta imam.

Ukuman sipaloloi onin Tuhan Pukakatai bagei

¹⁰ Ka sara gogoi oi sara simanteu, inania tai Israel tapoi ukkuinia tai Misir, katalagat pusapougatda tai Israel; samba palabarangan sirimanua nenda ka sara tai Israel ka pusapougat.

¹¹ Toga sinanalep tai Israel nenda masipaloloi onin Tuhan pasamba masitelei, lepa tuambit le nia kai Mose. Onin inania iate Selomit togat Dibri sibara ka suku Dan.

¹² Guruakerangannia kabagat tangsi itungena katakkikat siripot tiboiet Tuhan.

¹³ Lepa kuanangan si Tuhan katubut Mose:

¹⁴ “Ambit sirimanua sipatetelei nenda ka ujat pusapougat samba sangamberi sipasiarep buita ragalakake kabeira ka utet sirimanua nenda, lepa nenda sangamberi tai Israel buita rapabaijunginia bukku.

¹⁵ Buita nukua katubutda tai Israel, kise: Senen sirimanua si pateleiji Taikamanua buita ibairat puseleatnia.

¹⁶ Kasei pa masipaloloi onin Tuhan, bulat tuukumake le nia simateiakenen samba buita rapabaijunginia bukku sapaamian nenda. Ele sirmanua siooiake ele tai Israel siturerere, ke ipaloloi onin Tuhan, buita tuukumake simateiakenen.

¹⁷ Kisedda leuet ke sara sirimanua masimateiake sara sirimanua, bulat tuukumake le nia simateiakenen.

¹⁸ Tapoi kasei pa masibo'bo sangamuneng tarimeu teret matei, buita ilului silinia, sangamuneng silit sangamuneng.

¹⁹ Ke sara sirimanua masigalai saaleinia sirimanua imabesik, oto kele sigalaiakenennia, kisedda leuet tugagalai katubunia:

²⁰ bakbak silit bakbak, mata silit mata, sot silit sot, kele besik sigalaiakenenia ka sirimanua sabagei, kisedda te bulat tugagalaiake katubunia.

²¹ Kasei pa masibo'bo sangamuneng tarimeu teret matei, buita ilului silinia, tapoi kasei masimateiake sara sirimanua, buita tuukumakenia simateiakenen.

²² Sara surukat tugalaiake kakam, ele ka sirimanua siooiake ele ka tai Israel siturerere, kalulut Aku te Tuhan, Taikamanuamui.”

²³ Kisedda te aisegeake tiboiet nenda si Mose katubutda tai Israel, lepa ambitrangan sirimanua sipasitetelei nenda ka ujat pusapougat, samba tupabaijunginia bukku. Oto tai Israel galaiakerangan kele siparentaakenen Tuhan katubut Mose.