3Mos. 22 - BUKO SIPUNENAN

Pusisipunenannia punen buluakenen

¹ Kuanangan si Tuhan katubut Mose:

² “Kua katubut Aron samba ka tatogania, bule rapagaba simakolou sangamberi panguruat sipunenan sipunenanakenen ka tai Israel katubukKu, bule bui rapasabau pusisipunenannia oningKu sipunenan; Aku te Tuhan.

³ Kua katubutda: Senen sirimanua katalagamui sipupaninikat, iate sibara katalagat sangamberi muntogatmui siooi ramalagre ka sangamberi panguruat sipunenan sipunenanakenen ka tai Israel katubut Tuhan, tapoi nia aipeile kabagat kasitsitakenen, oto sirimanua nenda tutataake le geti kamatakKu; Aku te Tuhan.

⁴ Sara sirimanua sibara ka muntogat Aron sibara besik bokbong ele sibelaake suat tubu, bui ikom sangamberi panguruat sipunenan, ke tapei amalinania; samba sirimanua siorak ka sara kasitsinakanen kalulut sirimanua simamatei ele sirimanua sibebela suat tubunia,

⁵ ele sirimanua siorak ka sangamuneng leiti sipugugurui sibailiuakenia kasitsitakenen ele ka sara sirimanua sibailiuakenia kasitsitakenen, kasitsitakenen aponia pa sibailiuakenia kasitsitakenen,

⁶ sirimanua siorak kele nenda ibailiu le nia kasitsitakenen teret bele sulu samba bui ikom sangamberi panguruat sipunenan, ke tapei ibui tubunia pasamba oinan.

⁷ Lepat ibele sulu iapei malinanangan samba lepa nenda momoian ikom panguruat sipunenan nenda, kalulut nenda te sibailiu komennia.

⁸ Bui ikom tubu simamatei ele legei sikoman tarimeu simasabbak, bule bui ibailiunia kasitsitakenen; Aku te Tuhan.

⁹ Samba buita mariuriu raukkaake ka galaiakenenda katubukKu, bule kabagat nenda bui rabaraake jo katubutda samba matei kalulutnia, kalulut arapasabau galaiakenen sipunenan nenda; Aku te Tuhan, sipunenanake sia.

¹⁰ Senen sirimanua ta tai imam bui ikom panguruat sipunenan; kisedda leuet sirimanua siooiake sikukuddu katubut imam ele sirimanua siupaiji.

¹¹ Tapoi ke aikauan bulagat si imam isaki sirimanua nenda bailiu pagugulet sisakinia, oto sirimanua nenda momoi ikomnia ka sia, kisedda leuet sia sipututu'tumata ka lalepnia.

¹² Ke togat imam sinanalep musimanteu pasamba sirimanua sitaipuimam, bui ikom panguruat sokokoiakenen sibara ka senengamata panguruat sipunenan.

¹³ Tapoi ke sinanalep nenda ibailiu silumang ele tusaraake, samba taanai togania, samba atoilingannia ka lalep ukkuinia kele kateteret siokko peile nia, oto momoi ikom komen ukkuinia; tapoi senen sirimanua ta imam tamomoi ikomnia.

¹⁴ Ke sara sirimanua sitaipapaliket bagania ikom panguruat sipunenan, buita ikau silinia katubut imam samba ituppai seperlima.

¹⁵ Tai imam tamomoi rapasabau pusisipunenan sangamberi panguruat sipunenanda tai Israel sikokoiakenen katubut Tuhan,

¹⁶ kalulut kisedda te rabaraake ka tai Israel puseleat bulat tebuiet, ke rakom senengamata panguruatda sipunenan, kalulut Aku te Tuhan, sipunenanake sia.”

¹⁷ Kuanangan si Tuhan katubut Mose:

¹⁸ “Panibo katubut Aron samba ka tatogania samba ka sangamberi tai Israel samba kua katubutda: Kenanen kasei pa sibara katalagat paamian Israel samba sibara ka sirimanua siooiake katalagatda tai Israel sipanguruatake panguruatnia, ele panguruat palelengan ele panguruat sibara kateubaga, panguruatakenenda katubut Tuhan sibailiu buluakenen silabo,

¹⁹ oto bule imakiliu bagat Tuhan katubumui, panguruat nenda buita simaeru tubu iate jaui simanteu, biribiri samba kambing.

²⁰ Sangamberi sitaimaeru tubu bui nupanguruatake kamnia, kalulut ka panguruat nenda taiobanangan kam si Tuhan.

²¹ Samba leu ke sara sirimanua masipanguruatnake katubut Tuhan buluakenen katuaraugat sibailiu pasilului palelengan sikokoiakenen ele sibailiu buluakenen kateubaga iate jaui ele kambing samba biribiri, oto buluakenen nenda buita simaeru tubu, bule imakiliu bagat Tuhan katubunia, bui ibara goiso katai tubunia.

²² Tarimeu simapeset ele simabababak tolat, sibara mauju ele sibara appu, sibara belua ele simaguluk, sangamberinia nenda bui nupanguruatake kam katubut Tuhan samba tarimeu kele nenda bui nukau kamnia sibailiu buluakenen sirarak katubut Tuhan ka uddut kudduat pasibuluat.

²³ Tapoi sangamuneng jaui ele biribiri simakope nanta ele simakope tete laddou tubunia momoi nupanguruatnake kamnia sibailiu buluakenen kateubaga, tapoi sibailiu buluakenen palelengan Tuhan ta iooba si Tuhan ka tarimeu nenda.

²⁴ Tapoi tarimeu situlalaptib keikeietnia, situddu, sitippu ele sikikkik, bui nupanguruatnake kamnia katubut Tuhan; bui nugalaiake kam kisedda ka laggaimui.

²⁵ Kisedda leuet sibara ka kabei sirimanua siooiake bui nupanguruatnake kamnnia aponia pa sibara ka sangamberinia nenda sibailiu komen Taikamanuamui, kalulut sangamberinia nenda amakataian samba amakataian tubunia; ta ioba kam si Tuhan kalulut sangamberi panguruat nenda.”

²⁶ Kuanangan si Tuhan katubut Mose:

²⁷ “Ke sangamuneng togat jaui ele togat biribiri ele togat kambing siputu'tu' mata, oto buita mukuddu nenda pitungagogoi burunia ka inania, tapoi barania ka gogoi sikabalu samba sanganantania, ioba bagaNia si Tuhan ka tarimeu nenda ke tupanguruatake sibailiu buluakenen sirarak katubuNia.

²⁸ Bui nuja'ja kam jaui ele biribiri pasamba togania ka gogoi nenda leuet.

²⁹ Samba ke nuja'ja kam buluakenen pusurakat katubut Tuhan, buita nuja'ja kam kele kisedda, pat obanangan kam si Tuhan.

³⁰ Ka gogoi nenda leuet buita nukom kam buluakenen nenda; bui nulegeiake kam aponia pa katubunia pat aili simansep; Aku te Tuhan.

³¹ Oto kalulut nenda buita nugalaiake kam samba nuukkaake tiboietKu; Aku te Tuhan.

³² Bui nupalolit kam oningKu pusisipunenan oningKu sipunenan, bule tusipunenanake katalagatda tai Israel, kalulut Aku te Tuhan, sipunenanake kam,

³³ sipasiambit kam bela ka laggai Misir, bule ibailiu Aku Taikamanuamui; Aku te Tuhan.”